Te Tusi a Iuta 1:1-25
1 Au ko Iuta, ko te pologa a Iesu Keliso, kae ko te taina o Iakopo,+ ki tino kolā ne kalagagina+ kae e alofa ki ei te Atua te Tamana kae kolā e tausigina mō Iesu Keliso:+
2 Ke ‵fonu faeloa koutou i te alofa fakamagalo mo te filemu mo te alofa o te Atua.
3 Aku fagasele, e tiga eiloa ne taumafai malosi au o tusi atu ki a koutou e uiga ki te fakaolataga telā e maua fakatasi ne tatou,+ ne ‵tau foki o tusi atu au o fakamalosi atu ke taua malosi koutou mō te fakatuanaki+ telā ko leva ne tuku atu fakatasi eiloa mō taimi katoa ki tino tapu.
4 A te pogai me isi ne tāgata ko oti ne ulu lēmū atu ki loto i a koutou kolā ko leva ne ‵valo mai i te Tusi Tapu me ka maua ne latou te fakamasinoga tenei; ko tāgata sē amioatua kolā ko ‵fuli ne latou a te alofa tauanoa o te ‵tou Atua mo fai se fakamasakoga ke fai ne latou a amioga matafatu mo te sē āva,*+ kae kolā ko fakafiti ne latou te ‵tou matai mo te Aliki e tokotasi ko Iesu Keliso.+
5 E tiga eiloa e iloa ‵lei ne koutou a mea katoa konei, e manako au o fakamasaua atu ki a koutou me ne faka‵sao ne Ieova* se potukau o tino mai te fenua o Aikupito,+ oti aka fakaseai ei ne ia a tino kolā ne seki fakaasi mai ne latou te fakatuanaki.+
6 Kae ko agelu kolā ne seki tumau i olotou tulaga mua kae ne tiaki ne latou a koga kolā ne ‵tau o ‵nofo latou i ei,+ ko oti ne tausi fakapagota ne ia latou i se koga pouli tagataga ke oko ki te aso lasi o te fakamasinoga.+
7 E penā foki a Sotoma mo Komolo mo fakai i lā tafa, ne fai foki ne latou a amioga fakatauavaga sē ‵tau* kae matagā kae kausaki ki manakoga faka-te-foitino sē ‵tau;+ e tuku mai a mea konā i ‵tou mua ke fai mo fakamasauaga e uiga ki te fakasalaga ko te ‵sunu ki te afi se-gata-mai.+
8 E tiga te mea tenei, e aofia foki a tāgata konei i moemiti, e fakalailai atu ki te foitino, e takalia‵lia ki pulega, kae muna ma‵sei ne latou a tino ‵malu.+
9 Kae i te taimi ne seki lotoma‵lie ei a Mikaele,+ te agelu pule,+ mo te Tiapolo ki se mea kae fakatau kinau e uiga ki te foitino o Mose,+ ne seki fakaaoga ne ia a pati ‵mafa ke fakamasino ei a ia,+ kae ne fai atu fua: “Ke fakamalaia atu a Ieova* ki a koe.”+
10 Kae ko tāgata konei e muna masei faeloa latou e uiga ki mea kolā e se malamalama latou i ei.+ Kae ko mea katoa kolā e malamalama latou i ei e pelā mo manu kolā e seai ne lotou mafaufau,+ e fakamasei ne latou a latou eiloa.
11 Ko malaia eiloa latou, me ne tau‵tali latou i te auala o Kaino+ kae ne ‵tele fakavave atu i te auala sē tonu o Palaamo+ ke maua se taui, kae ne ‵mate atu latou ona ko olotou pati ‵teke+ e pelā mo Kola!+
12 Konei eiloa a akau ‵masa kolā e ‵galo i lalo i te pisipisitai i taimi o otou ‵kaiga*+ māfai ko ‵kai fakatasi latou mo koutou, ko tausi mamoe kolā e fagai ne latou a latou eiloa e aunoa mo te ma‵taku;+ ko kaumana ‵masa kolā e agi valevale ne te matagi;+ ko lakau i te fakaotiga o te tau e ‵to ei a lau o lakau, kae seai ne lotou fuataga e ‵fua mai, ko oti ne ‵mate fakalua* kae ko oti ne unu kea‵tea;
13 ko galu ‵fati o te tai kolā e ‵pei aka ne latou a kapiaga o olotou amioga fakamasiasi;+ ko fetū kolā e olo valevale fua, kae ka ‵pei atu ki te pouliga lasi ki te se-gata-mai.+
14 Ao, ne ‵valo mai foki a Enoka,+ telā ko te tokofitu o tino mai tua o Atamu, e uiga ki a latou, i ana pati: “Kiloke! Ne o‵mai a Ieova* fakatasi mo ana agelu tapu e se lausia,*+
15 o fakaoko atu te fakasalaga ki tino katoa,+ kae fakamasino foki a tino sē amioatua katoa i olotou amioga sē ‵lei kolā ne fai i se auala sē amioatua, mo faifaiga matagā katoa kolā ne fai atu ne tino agasala ki a ia.”+
16 A tāgata konei ne tino mui‵mui,+ e fameo faeloa e uiga ki olotou mea e maua i te olaga e ‵tusa mo olotou manakoga,+ kae fai‵pati olotou gutu ki pati fakamata‵mata e uiga ki a latou eiloa, kae tavae fakaloi‵loi ne latou a nisi tino mō te lotou ‵lei eiloa.+
17 Kae e pelā mo koutou, e aku fagasele, ke masaua a pati kolā ne fai* atu muamua ne apositolo a te ‵tou Aliki ko Iesu Keliso,
18 kolā ne fai sāle atu ne latou ki a koutou: “Ka isi ne tino fakatauemu i aso fakaoti kolā ka tau‵tali i olotou manakoga mō te faiga o mea ma‵sei.”+
19 Konei eiloa a tino e faka‵tupu ne latou a mavae‵vaega,+ ne tāgata e amio e pelā me ne manu,* kae e seai se lotou malosi faka-te-agaga.
20 Kae ko koutou, e aku fagasele, ke ati aka koutou i luga i te otou fakatuanaki e sili i te tapu, kae ‵talo fakatasi mo te agaga tapu,+
21 ko te mea ke tumau koutou i loto i te alofa o te Atua,+ kae koi fakatali‵tali koutou ki te alofa fakamagalo o te ‵tou Aliki ko Iesu Keliso telā e iku atu ki te ola se-gata-mai.+
22 Ke tumau foki i te fakaasi atu o te alofa fakamagalo+ ki a latou kolā e fakalotolotolua;+
23 faka‵sao latou+ e auala i te ‵futi mai o latou ki tua mo te afi. Kae tumau i te fakaasi atu o te alofa fakamagalo ki nisi tino, kae fai penā mo te ma‵taku, kae ke takalia‵lia koutou ki te gatu telā ko pisipisia i lailaiga o te foitino.+
24 Kae nei la, ki te tino telā e mafai o puipui ne ia ke mo a ma ‵siga koutou kae fai ne ia koutou ke tumau i te sē lai‵lai+ i mua o tena ‵malu mo te fiafia lasi,
25 ke i luga i te Atua fua e tokotasi te ‵tou Fakaola e auala i a Iesu Keliso te ‵tou Aliki, te ‵malu, te malosi mo te pule mai te se-gata-mai ke oko atu eiloa ki te se-gata-mai. Amene.
Fakamatalaga mai lalo
^ Ko ‵kaiga e fai ke fakaasi atu ei te alofa.
^ Io me “ko ‵mate katoatoa atu.”
^ Io me “fia sefuluafe.”
^ Io me “mea ne ‵valo mai.”
^ Io me “tāgata faka-te-foitino.”
