Iosua 1:1-18
1 Mai tua o te mate o Mose te tavini a Ieova, ne fai atu a Ieova ki a Iosua*+ te tama tagata a Nuno, te tavini+ a Mose:
2 “A taku tavini ko Mose ko mate.+ Tu nei ki luga kae fano ki te suā feitu o te Iolitana, ko koe mo tino katoa konei, kae olo atu ki te fenua telā ka tuku atu ne au ki a latou, ko tino o Isalaelu.+
3 Ka tuku atu ne au ki a koe a koga katoa kolā e ‵laka ki ei ou vae, e pelā eiloa mo taku tautoga ki a Mose.+
4 A tou kogā fenua ka vau mai te koga lavaki ke oko ki Lepanona mo te vaitafe lasi, ko te Eufilate—ko fenua katoa o tino Heti+—mo te Tai Lasi* i te feitu ki togala.*+
5 Ka seai eiloa se tino e mafai o ‵teke atu ki a koe i te taimi e ola ei koe.+ E pelā eiloa mo au ne fakatasi atu ki a Mose, ka fakatasi atu foki au ki a koe.+ Ka se mafai eiloa o fulitua atu au ki a koe io me tuku tiaki koe.+
6 Ke loto toa kae loto malosi,+ me ko koe ka fai ne koe ke ‵nofo a tino konei i loto i te fenua telā ne tauto au ki olotou tupuga me ka tuku atu ne au ki a latou.+
7 “Ko koe fua ke loto toa kae ke loto malosi kae fakalogo faka‵lei ki te Tulafono kātoa telā ne fakatonu atu ne taku tavini ko Mose ki a koe. Ke mo a eiloa ma ‵fuli kea‵tea koe mai ei, ki te feitu fakaatamai io me ki te feitu fakamaui,+ ko te mea ke gasuesue koe mo te poto i so se koga e fano koe ki ei.+
8 A te tusi o te Tulafono tenei e se ‵tau o mavae kea‵tea mai tou gutu,+ kae ‵tau mo koe o faitau ki ei i se leo malalo* i te ao mo te po, ko te mea ke mafai o fakalogo faka‵lei koe ki mea katoa kolā e tusi i loto i ei;+ kae ka manuia ei ou auala kae ka gasuesue foki koe mo te poto.+
9 E a, e se ko au ne fakatonu atu ki a koe? Ke loto toa kae loto malosi. Ke mo a koe ma poi io me mataku, me i a Ieova tou Atua e fakatasi faeloa mo koe i so se koga e fano koe i ei.”+
10 Tenā ne fakatonu ei ne Iosua a ofisa o tino:
11 “Olo i loto i te fakai kae fai atu te fakatonuga tenei ki tino, ‘Fakatoka otou mea, me i loto i se tolu o aso ka olo atu koutou ki te suā feitu o te Iolitana o puke mō koutou te fenua telā ka tuku atu ne Ieova te otou Atua ke fai mō koutou.’”+
12 Kae ne fai atu a Iosua ki tino Leupena, tino Kato mo te āfa o te matakāiga o Manase:
13 “Ke masaua a te fakatonuga ne fai atu ne Mose te tavini a Ieova ki a koutou:+ ‘A Ieova te otou Atua ka avatu ne ia ki a koutou te malōlōga kae ko oti ne tuku atu ne ia te fenua tenei mō koutou.
14 A otou avaga fāfine, otou tama‵liki mo otou lafu manu ka ‵nofo i te laukele telā ne tuku atu ne Mose ki a koutou i te feitu tenei* o te Iolitana,+ kae ko koutou e toa ‵mafi+ katoa e ‵tau o olo atu e pelā me se kautau i mua o otou taina.+ E ‵tau mo koutou o fesoasoani ki a latou
15 ke oko ki te taimi e tuku atu ei ne Ieova a te malōlōga ki otou taina, e pelā eiloa mo te tukuatuga ne ia ki a koutou, kae puke foki ne latou a te fenua telā e tuku atu ne Ieova te otou Atua ki a latou. Tenā ko toe ‵foki ei koutou ki te fenua ne tuku atu ki a koutou ke ‵nofo i ei kae ke puke mō koutou, ko te fenua telā ne tuku atu ne Mose te tavini a Ieova ki a koutou i te feitu ki saegala o te Iolitana.’”+
16 Ne tali atu latou ki a Iosua: “Ka fai ne matou a mea katoa kolā ne fakatonu mai ne koe, kae ka olo atu matou ki so se koga e uga ne koe matou ki ei.+
17 E pelā eiloa mo te motou faka‵logo ki pati katoa ne fai mai ne Mose, ka faka‵logo foki matou ki a koe. Ko Ieova fua tou Atua ke fakatasi atu ki a koe e pelā eiloa mo ia ne fakatasi atu ki a Mose.+
18 So se tagata e ‵teke ne ia tau fakatonuga kae se fakalogo ki fakatonuga katoa e tuku atu ne koe ki a ia ka tamate eiloa.+ Ko koe fua ke loto toa kae loto malosi.”+
Fakamatalaga mai lalo
^ Io me “Ieosua,” tena uiga “A Ieova ko te Fakaolataga.”
^ Telā ko te Metitilani.
^ Io me “ki te feitu e tō ei te mata o te la.”
^ Io me “mafaufau ‵loto ki ei.”
^ Telā ko te feitu ki saegala.
