Se Fakaasiga ki a Ioane 7:1-17
7 I te otiga o te mea tenei ne matea ne au a agelu e tokofa e ‵tu i feitu e fa o te lalolagi, e taofi ‵mau ki matagi e fa o te lalolagi, ko te mea ke seai se matagi e agi mai ki te lalolagi io me ki te tai io me ki so se lakau.
2 Kae ne matea ne au a te suā agelu e fanaka mai i saegala, mo te fakamailoga a te Atua ola; kae ne kalaga atu a ia i se leo maluga ki agelu e tokofa kolā ne tuku atu ki a latou te taliaga ke fakamasei te lalolagi mo te tai,
3 ana muna: “Sa fakamaseigina te lalolagi io me ko te tai io me ko lakau, ke oti mua ne fakamailoga ne tatou+ a tavini a te ‵tou Atua i olotou lae.”+
4 Kae ne lagona ne au te aofaki o latou kolā ne fakamailogagina, e toko 144,000,+ kolā ne fakamailoga mai i matakāiga katoa o fanau a Isalaelu:+
5 Mai i te matakāiga o Iuta e toko 12,000 ne fakamailoga;mai i te matakāiga o Leupena e toko 12,000;mai i te matakāiga o Kato e toko 12,000;
6 mai i te matakāiga o Asela e toko 12,000;mai i te matakāiga o Nafatali e toko 12,000;mai i te matakāiga o Manase+ e toko 12,000;
7 mai i te matakāiga o Simeona e toko 12,000;mai i te matakāiga o Levi e toko 12,000;mai i te matakāiga o Isakala e toko 12,000;
8 mai i te matakāiga o Sepulona e toko 12,000;mai i te matakāiga o Iosefa e toko 12,000;mai i te matakāiga o Peniamina e toko 12,000 ne fakamailoga.
9 I te otiga o te mea tenei, ne kilo atu au, kae kiloke! se vaitino e tokouke, telā e se mafai o lau aka ne se tagata, mai i atufenua mo matakāiga mo tino mo ‵gana katoa,+ e ‵tu i mua o te nofogaaliki kae i mua o te Tamā Mamoe e ‵pei ki gatu ‵loa ‵kena;+ kae e isi ne laupama i olotou lima.+
10 Kae ne ka‵laga atu faeloa latou i se leo maluga, olotou muna: “A te ‵tou fakaolataga e maua mai i te ‵tou Atua, telā e sagasaga i te nofogaaliki+ mo te Tamā Mamoe.”+
11 A agelu katoa ne ‵tu fakatamilo i te nofogaaliki mo toeaina+ mo manu ola e fa, kae ne to‵tuli ifo latou mo olotou mata e ‵fuli ki lalo i mua o te nofogaaliki o tapuaki ki te Atua,
12 olotou muna: “Amene! Ke i luga i te ‵tou Atua a tavaega mo te ‵malu mo te poto mo te fakafetai mo te fakaaloalo mo te ‵mana mo te malosi ki te se-gata-mai, se-gata-mai eiloa.+ Amene.”
13 Ke tali atu ki ei, ne fai mai se toeaina e tokotasi ki a au: “Ko oi a tino konei e ‵pei ki gatu ‵loa ‵kena,+ kae ne o‵mai latou mai fea?”
14 Ne fai fakavave atu au ki a ia: “Toku aliki, ko koe te tino e iloa ne koe.” Kae ne fai mai a ia ki a au: “Konei a tino ne ‵sao i te fakalavelave lasi,+ kae ne ‵ta ne latou olotou gatu ‵loa kae faka‵kena ki te toto o te Tamā Mamoe.+
15 Tenā te pogai e ‵tu atu ei latou i mua o te nofogaaliki o te Atua, kae e fai ne latou te taviniga tapu ki a ia i te ao mo te po i tena faletapu; kae ko te Atua telā e sagasaga i te nofogaaliki+ ka ‵fola ne ia tena faleie mai i luga i a latou.+
16 Ka se toe fia‵kai latou io me fiainu, ka se toe ‵kasa malosi atu te la io me ko so se mea ‵vela ki luga i a latou,+
17 me i te Tamā Mamoe,+ telā e nofo i tafa o te nofogaaliki, ka tausi ne ia a latou+ kae ka takitaki ne ia a latou ki vaipuna o vai o te ola.+ Kae ka ‵solo kea‵tea ne te Atua a loimata katoa mai i olotou mata.”+
