Se Fakaasiga ki a Ioane 1:1-20
1 Se fakaasiga mai i a Iesu Keliso, telā ne tuku atu ne te Atua ki a ia,+ ke fakaasi atu ki ana tavini+ a mea kolā ko pili o ‵tupu. Kae ne uga atu ne ia tena agelu kae ne fakaasi atu ne ia te mea tenā i te faiga o fakailoga e auala i a ia ki tena tavini ko Ioane,+
2 telā ne molimau atu e uiga ki te muna ne tuku mai ne te Atua mo te molimau ne tuku mai ne Iesu Keliso, ao, ki mea katoa kolā ne matea ne ia.
3 E fiafia te tino telā e faitau ki luga mo latou kolā e lagona ne latou a pati i te valoaga tenei kae e faka‵logo ki mea kolā ne tusi i ei,+ me ko pili o oko mai te taimi ne fuafuagina.
4 Au ko Ioane, kae e tusi atu au ki fakapotopotoga e fitu+ kolā e ‵tu i te kogā fenua o Asia:
Ke i luga i a koutou te alofa tauanoa mo te filemu mai i “te Atua telā e ola nei, ne ola mai mua eiloa, kae ko ia telā ka vau,”+ kae mai i agaga e fitu+ kolā e ‵tu i mua o tena nofogaaliki,
5 kae mai i a Iesu Keliso, “te Molimau Fakamaoni,”+ “te tino muamua ne toe fakatu aka mai te mate,”+ mo “te Pule o tupu o te lalolagi.”+
Ko ia telā e alofa mai ki a tatou+ kae ne fakasaoloto ne ia a tatou mai i ‵tou agasala e auala i tena toto eiloa+—
6 kae ne fai ne ia tatou ke fai mo fai se malo,+ ko faitaulaga+ ki tena Atua mo te Tamana—ao, ke i luga i a ia te ‵malu mo te malosi ki te se-gata-mai. Amene.
7 Kiloke! Ka vau a ia i kaumana,+ kae ka lavea a ia ne mata o tino katoa, mo latou kolā ne velo ne latou a ia; kae ko matakāiga katoa o te lalolagi ka ‵tagi fanoa‵noa ona ko ia.+ Ao, Amene.
8 “Au ko te Alefa mo te Omeka,”*+ ko muna a Ieova* te Atua, “ko te Atua telā e ola nei, ne ola mai mua eiloa, kae ko ia telā ka vau, ko te Atua Malosi Katoatoa.”+
9 Au ko Ioane, ko te otou taina telā e ‵kau fakatasi mo koutou i puapuaga+ mo te malo+ mo te kufaki+ i te tautali atu i a Iesu,+ ne nofo i te motu ko Patamo ona ko te mea ne faipati atu au e uiga ki te Atua kae molimau atu e uiga ki a Iesu.
10 Mai i te fakamalosiga a te agaga ne oko atu ei au ki te aso o te Aliki, kae ne lagona ne au i oku tua se leo lasi e pelā mo te tagi o se pu,
11 ana muna: “A mea kolā e matea ne koe, tusi ki lalo i se peluga tusi kae avatu ki fakapotopotoga e fitu: i Efeso,+ i Semulana,+ i Pelekamo,+ i Tuatila,+ i Salataisa,+ i Filatelafia,+ e penā foki mo Laotikaia.”+
12 Ne mafuli atu au ke matea ne au me ko oi e faipati mai ki a au, kae i taku mafuliatuga ne matea ne au a tugamoli aulo e fitu,+
13 kae ne tu mai i te kogaloto o tugamoli konā se tino e pelā me se tama a te tagata,+ ne pei ki se gatu ‵loa telā e oko ki ana vae kae ne fusi i tena fatafata se fusi aulo.
14 E se gata i ei, a tena ulu mo ana laulu e ‵kena e pelā mo te ‵kena o fulufulu mamoe, e pelā mo te kiona, kae ko ana mata e pelā me se afi ‵ka ulaula,+
15 kae ko ana vae ne fai e pelā mo te kopa ‵lei+ māfai e malapulapu mai i se ogaumu, kae ko tena leo e pelā mo te ‵gulu mai o vai e uke.
16 Kae ne puke ne ia i tena lima fakaatamai a fetū e fitu,+ kae ne sae mai i tena gutu se pelu mata ‵kai kae loa telā e ‵kai ana feitu e lua,+ kae ko ana foliga ne fai pelā mo te la māfai ko ‵kasa malosi mai.+
17 I taku kiloatuga ki a ia, ne siga ifo ei au ki ana vae e pelā me se tino ko mate.
Kae ne tuku mai tena lima fakaatamai ki luga i a au, kae fai mai: “Sa mataku. Au ko te tino Muamua+ mo te tino Fakaoti,+
18 mo te tino telā e ola,+ kae ko au ne mate,+ kae kiloke! au e ola ki te se-gata-mai, se-gata-mai eiloa,+ kae ko maua ne au a kī o te mate mo te Tanuga.*+
19 Tela la, tusi ki lalo a mea kolā ne matea ne koe, mo mea ko ‵tupu i te taimi nei, mo mea ka ‵tupu ma oti atu a mea konei.
20 Kae e pelā mo te mea ‵funa kae tapu o fetū e fitu kolā ne matea ne koe i toku lima fakaatamai mo tugamoli aulo e fitu: A fetū e fitu e fakauiga ki agelu o fakapotopotoga e fitu, kae ko tugamoli e fitu e fakauiga ki fakapotopotoga e fitu.+
Fakamatalaga mai lalo
^ Ko tena uiga: te kamataga mo te fakaotiga. A te Alefa mo te Omeka ko te mataimanu muamua mo te mataimanu fakaoti i te fakasologa o mataimanu i te ‵gana Eleni.
