Failauga 9:1-18
9 Ne tausi ne au a mea katoa konei i toku loto kae fakaiku aka me i tino amio‵tonu mo tino ‵poto, fakatasi mo olotou galuega, ko ‵nofo katoa i lima o te Atua tonu.+ E se iloa ne tino a te alofa mo takalialiaga kolā ne ‵tupu mai mua atu i a latou.
2 E tasi eiloa te ikuga e maua ne tino katoa,+ ko tino amio‵tonu mo tino amio ma‵sei,+ ko tino ‵lei mo tino ‵ma mo tino sē ‵ma, ko tino e fai olotou taulaga mo tino e se fai olotou taulaga. A te tino ‵lei e ‵pau eiloa mo te tino agasala; a te tino e fai tena tautoga e ‵pau eiloa mo te tino telā e fakaeteete e uiga ki te faiga o se tautoga.
3 A te mea tenei se mea fakafanoanoa telā ko tupu i lalo o te la: Me e tasi eiloa te ikuga e maua ne tino katoa,+ a loto o tino e ‵fonu foki i mea ma‵sei; kae e isi se valea i olotou loto i te lotou olaga, ka oti ko ‵mate ei latou!
4 E isi se fakamoemoega mō so se tino ola, me i te kuli ola e ‵lei atu i lō te leona mate.+
5 Me i tino ola e iloa ne latou i a latou ka ‵mate,+ kae ko tino ‵mate e seai eiloa se lotou mea e iloa,+ e seai foki se lotou taui,* me i mea katoa e uiga ki a latou ko fakapuli atu.+
6 A te lotou a‵lofa foki mo te lotou takalia‵lia mo te lotou loto ma‵sei ko ‵galo atu katoa, kae ko seai se lotou vaega i mea kolā e fai i lalo o te la.+
7 Fano, kai au meakai mo te fiafia kae inu au uaina mo te loto fiafia,+ me i te Atua tonu e fiafia ki au galuega.+
8 Ou gatu e ‵tau faeloa o ‵kena,* kae ke mo a ma puli o ‵mili tou ulu ki sinu.+
9 Ke fiafia ki te olaga fakatasi mo tau avaga pele+ i aso katoa o tou olaga sē aoga, kolā ne tuku atu ne Ia ki a koe i lalo o te la, i aso katoa o tou olaga sē aoga, me tenā tou vaega i te olaga mo galuega ‵mafa kolā e galue malosi koe ki ei i lalo o te la.+
10 So se mea e fai ne ou lima, ke na fai eiloa mo tou malosi kātoa, me e seai ne galuega io me ne palani io me ko te iloaga io me ko te poto i te Tanuga,*+ ko te koga telā ka fano koe ki ei.
11 Ne lavea ne au se isi mea i lalo o te la, a tino ‵tele ma‵kini e se ‵sili faeloa i te fakatau‵telega, a tino ‵mafi e se manumalo faeloa i te taua,+ a tino ‵poto e se maua faeloa olotou meakai, a tino malamalama e se maua faeloa olotou maumea,+ a latou kolā e isi se iloaga i ei e se manuia faeloa,+ me i taimi o fakalavelave mo mea ‵tupu fakafuasei* e ‵tupu ki tino katoa.
12 Me i te tagata e se iloa ne ia tena taimi.+ E pelā eiloa mo ika kolā e ‵lave i se tili mo manu eva e ‵poa i loto i se matasele, e penā foki a tama a tāgata e maleigina latou i taimi o fakalavelave, māfai ko ‵tupu fakapoi ki a latou.
13 Ne lavea foki ne au te mea tenei e uiga ki te poto i lalo o te la—kae ne fiafia au ki ei:
14 E isi se tamā fakai mo nai tāgata i loto i ei; kae ne vau se tupu mafi o taua atu ki ei kae nikoi ne ia kae faite a ‵pui lasi i ei.
15 I loto i ei e isi se tagata mativa kae poto, kae ne fakasao ne ia te fakai e auala i tena poto. Kae e seai se tino ne masaua ne ia te tagata poto tenā.+
16 Kae ne fai ifo au ki a au eiloa: ‘A te poto e ‵lei atu i lō te mafi;+ kae ko te poto o te tagata mativa tenei e takalia‵lia ki ei a tino, kae e se fia faka‵logo ki ana pati.’+
17 E ‵lei atu ke fakalogo ki pati filemu a tino ‵poto i lō pati e pakalaga mai ne te tino e pule i tino va‵lea.
18 A te poto e ‵lei atu i lō meatau o te taua, kae ko te tino agasala fua e tokotasi e mafai o fakamasei ne ia a mea ‵lei e uke.+
Fakamatalaga mai lalo
^ Io me “peofuga.”
^ Telā ko gatu mainaina kolā e fakaata mai i ei te tulaga fiafia, kae e se ko gatu o te fanoanoa.
^ Io me “fakalavelave seki fakamoemoegina.”
