Eseta 9:1-32
9 I te po 13 o te 12 o masina, telā ko te masina o Atala,*+ ko te taimi telā e ‵tau ei o fakataunu a te pati mo te tulafono a te tupu,+ ko te aso telā ne fakamoe‵moe ki ei a fili o tino Iutaia ke fakatakavale i ei latou, ne ‵fuli fakakotua te mea ne tupu, kae ne fakatakavale ne tino Iutaia a tino kolā e takalia‵lia ki a latou.+
2 Ne maopoopo fakatasi a tino Iutaia i olotou fakai i kogā fenua katoa o te Tupu ko Asuelu+ o taua atu ki tino kolā e taumafai o ‵ta latou, kae e seai eiloa se tagata ne mafai o taua atu ki a latou, me ne ma‵taku a tino katoa i a latou.+
3 Kae ko pelenise katoa o kogā fenua, tino pule,+ kovana mo tino kolā e fai ne latou a galuega a te tupu ko ‵lago atu ki tino Iutaia, me e ma‵taku latou i a Moletekai.
4 A Moletekai ko maluga ‵ki+ i te fale* o te tupu, kae ko salalau atu a tena takutakua ki kogā fenua katoa, me i a Moletekai ko gasolo aka faeloa o maluga.
5 Ne ‵ta ne tino Iutaia olotou fili katoa ki te pelu, ne tamate kae fakaseai atu latou; ne fai ne latou so se mea e ma‵nako latou ki ei ki tino kolā e takalia‵lia ki a latou.+
6 I Susana*+ te taoa malosi* ne tamate kae fakaseai atu i ei ne tino Iutaia a tāgata e toko 500.
7 Ne tamate foki ne latou a Pasanatata, Talafoni, Asipati,
8 Polata, Atalaia, Alitata,
9 Palamasita, Alisai, Alitai mo Vaisata,
10 ko tama tāgata e tokosefulu a Hamanu te tama tagata a Hametata, te fili o tino Iutaia.+ Kae mai tua o te tamatega o latou, ne seki ai ne olotou mea ne puke.+
11 I te aso tenā ne fakailoa atu ki te tupu a te aofaki o tino kolā ne tamate i Susana* te taoa malosi.*
12 Ne fai atu te tupu ki te Tupu Fafine ko Eseta: “I Susana* te taoa malosi* ne tamate kae fakaseai i ei ne tino Iutaia a tāgata e toko 500 mo tama tāgata e tokosefulu a Hamanu. Kae ne a olotou mea ne fai i te ‵toega o kogā fenua o te tupu?+ Se a tau fakamolemole i te taimi nei? Ka tuku atu eiloa ki a koe. Kae se a foki te suā mea e manako koe ki ei? Ka fai eiloa te mea tenā.”
13 Ne tali atu a Eseta: “Kafai e fiafia ki ei te tupu,+ ke talia aka la a tino Iutaia kolā e ‵nofo i Susana* ke fai foki ne latou i te aso ma taeao a te tulafono o te aso nei;+ kae ke fakatau‵tau ki te pou+ a tama tāgata e tokosefulu a Hamanu.”
14 Ne avatu ne te tupu a fakatonuga ke fai te mea tenā. Ne fai se tulafono i Susana,* kae ne fakatau‵tau ei a tama tāgata e tokosefulu a Hamanu.
15 Ne toe maopoopo fakatasi a tino Iutaia i Susana* i te po 14 o te masina o Atala+ kae tamate ne latou a tāgata e toko 300 i Susana,* kae ne seki ai ne olotou mea ne puke.
16 A te ‵toega o tino Iutaia i kogā fenua o te tupu ne maopoopo fakatasi foki o puipui olotou ola.+ Ne fakaseai ne latou olotou fili+ mai te tamatega o te toko 75,000 o tino kolā e takalia‵lia ki a latou; kae ne seki ai ne olotou mea ne puke.
17 A te mea tenā ne tupu i te po 13 o te masina o Atala, kae ne ma‵nava latou i te po 14 kae fai ne latou mo fai se aso o ‵kaiga fia‵fia.
18 A tino Iutaia i Susana* ne maopoopo fakatasi i te po 13+ mo te po 14,+ kae ne ma‵nava latou i te po 15 kae fai ne latou mo fai se aso o ‵kaiga fia‵fia.
19 Tenā te pogai e fai ei ne tino Iutaia kolā e ‵nofo i fakai ‵mao a te po 14 o te masina o Atala mo fai se aso o ‵kaiga fia‵fia, se aso fiafia,+ kae se taimi e avatu ei a meakai ki nisi tino.+
20 Ne tusi ki lalo ne Moletekai+ a mea konei ne ‵tupu kae avatu a tusi ki tino Iutaia katoa i kogā fenua katoa o te Tupu ko Asuelu, i koga ‵pili mai mo koga ‵mao.
21 Ne fakatonu atu a ia ke fakamanatu ne latou a te po 14 o te masina o Atala, e pelā foki mo te po 15 i tausaga takitasi katoa,
22 me i aso konā ne ma‵nava a tino Iutaia mai olotou fili kae i te masina tenā ne ‵fuli ei te lotou mafatia ki te fiafia kae ko te lotou fanoanoa+ ki se aso fiafia. E ‵tau o fakamanatu ne latou a aso konā e pelā me ne aso o ‵kaiga fia‵fia kae se taimi ke avatu ei a meakai ki nisi tino mo meaalofa ki tino ma‵tiva.
23 Kae ne talia ne tino Iutaia ke fakatumau a fakafiafiaga ne kamata ne latou kae fai a mea ne tusi atu ne Moletekai ki a latou.
24 Me i a Hamanu+ te tama tagata a Hametata te tino Akako,+ te fili o tino Iutaia katoa, ne fai tena togafiti ke fakaseai a tino Iutaia,+ kae ne fai ne ia te Pulo,+ telā ko te Vili, ke fai ei latou ke manava‵se kae ke fakaseai latou.
25 Kae i te taimi ne vau ei a Eseta ki mua o te tupu, ne tusi atu ne tou tagata a fakatonuga:+ “Ke toe taui atu eiloa ki tena ulu a tena togafiti masei ne fai ki tino Iutaia”;+ kae ne fakatautau ne latou a ia mo ana tama tāgata ki luga i te pou.+
26 Tenā te pogai ne taku ei ne latou a aso konā ko te Pulima, mai te igoa o te Pulo.*+ Tela la, ona ko mea katoa ne tusi i te tusi tenei mo mea ne lavea ne latou e uiga ki te mea tenei mo mea ko ‵tupu ki a latou,
27 e ‵tau eiloa mo tino Iutaia mo tino ne ‵tupu mai i a latou mo tino katoa kolā e ‵kau atu ki a latou+ o fakamanatu a aso e lua konei kae ke fai eiloa a mea kolā ne tusi ki lalo e uiga ki a latou i te taimi tonu i tausaga takitasi katoa.
28 A aso konei e ‵tau eiloa o fakamasaua kae fakamanatu i kautama katoa ne kāiga takitasi, kogā fenua takitasi, mo fakai takitasi; kae ko aso konei o te Pulima e se ‵tau o fakagata ne tino Iutaia, kae e se ‵tau foki o fakagata te fakamanatuga o aso konā ne tino kolā ne ‵tupu mai i a latou.
29 Tenā ne tusi atu ei ne te Tupu Fafine ko Eseta, te tama fafine a Apihaila, mo Moletekai te tino Iutaia mo te pule katoatoa ke fakamautinoa atu a te tusi i te lua e uiga ki te Pulima.
30 Ne avatu ne ia a tusi ki tino Iutaia katoa i kogā fenua e 127,+ i te malo o te Tupu ko Asuelu,+ i pati filemu kae ‵tonu
31 ke fakamautinoa ei a te fakamanatuga o aso o te Pulima i olotou taimi tonu, e pelā eiloa mo fakatonuga a Moletekai te tino Iutaia mo te Tupu Fafine ko Eseta ne fai ki a latou ke fai,+ e pelā eiloa mo mea e ‵tau o fai ne latou mo tino ne ‵tupu mai i a latou,+ e aofia i ei te fakaliki‵liki+ mo te faiga o ‵talo.+
32 Kae ko te fakatonuga a Eseta ne fakamautinoa aka i ei a mea konei e uiga ki te Pulima,+ kae ne fakamau ki lalo i se tusi.
Fakamatalaga mai lalo
^ Io me “palesi.”
^ Io me “Susa.”
^ Io me “palesi; ‵pui malosi.”
^ Io me “Susa.”
^ Io me “palesi; ‵pui malosi.”
^ Io me “Susa.”
^ Io me “palesi; ‵pui malosi.”
^ Io me “Susa.”
^ Io me “Susa.”
^ Io me “Susa.”
^ Io me “Susa.”
^ Io me “Susa.”
