Esekielu 17:1-24
17 Ne toe oko mai te fekau a Ieova ki a au, ana muna:
2 “Te tama a te tagata, fai mai aka se tala fakatusa kae fai mai se faigamuna e uiga ki te kāiga o Isalaelu.+
3 E ‵tau mo koe o fai atu, ‘Konei a pati a te Aliki Sili ko Ieova ne fai mai: “A te aeto lasi,+ mo ana kapakau ‵lasi kae ‵loa, mo ana fulu lanu kese‵kese ne vau ki Lepanona+ kae ‵paki ne ia te taulu o te lakau ko te alasi.+
4 Ne ‵paki ne ia te somo tafa ki luga kae aumai ne ia ki te fenua o tino fai pisinisi* kae tuku atu i te fakai o tino fai pisinisi.+
5 Tenā ne puke ei ne ia a nisi fuaga o te fenua+ kae tuku atu i se laukele ola ‵lei. Ne ‵toki ne ia e pelā mo te lakau ko te uilou i tafa o vai e uke.
6 Ne tupu aka kae ne fai pelā me se vine ola malalo kae ‵solo+ kae ko ana lau e ‵fuli ki loto kae ko ana aka e ola mai lalo i ei. Tenā ne fai ei pelā me se vine kae ne ‵sae aka ana somo kae ‵tupu aka ana kaula.+
7 “‘“Kae ne toe vau te suā aeto lasi,+ mo ana kapakau ‵lasi kae ma‵tolu.+ Ne ‵solo malosi atu a aka o te vine tenei ki ei, e ‵mao kea‵tea mo te fatoaga telā ne ‵toki i ei, kae ko ana lau ko ‵fuli atu ki ei ko te mea ke fakasiusiu ne ia.+
8 Ne ‵toki a te vine tenā i se fatoaga ‵lei i tafa o vai e uke, ko te mea ke ‵tupu mai i ei a kaula, ke ‵fua mai i ei a fuagalakau, kae ke fai pelā me se vine gali.”’+
9 “Fai atu, ‘Konei a pati a te Aliki Sili ko Ieova ne fai mai: “E mata, ka manuia te vine tenā? E a, ka seai se tino e unu kea‵tea ne ia ana aka+ kae fai ke ma‵sei ana fuagalakau kae fai ana somo ke mage‵mage?+ Ka pakupaku malosi eiloa te vine telā ko seai ei se lima malosi io me ne tino e tokouke e manakogina ke ‵futi aka te vine mai i ana aka.
10 E tiga eiloa e laga ki se isi koga, e a, ka manuia te vine tenā? E a, ka se pakupaku katoatoa māfai ko agi mai ki ei te matagi mai te feitu ki saegala? Ka pakupaku eiloa i te fatoaga telā ne somo aka i ei.”’”
11 Kae ne toe oko mai te fekau a Ieova ki a au, ana muna:
12 “Fakamolemole fai atu ki te kāiga ‵teke, ‘E se iloa ne koutou te uiga o mea konei?’ Fai atu, ‘Kiloke! A te tupu o Papelonia ne vau ki Ielusalema kae puke ne ia tena tupu mo tena pelenise kae ‵foki fakatasi atu mo ia ki Papelonia.+
13 E se gata i ei, ne puke ne ia se tokotasi o tama a te tupu+ kae fai ne ia se feagaiga mo ia kae fai a ia ke tauto.+ Tenā ne ave kea‵tea ei ne ia a tāgata lauiloa o te fenua,+
14 ko te mea ke fakamalalo ifo te malo, ke se mafai o tu aka, kae mai te tausiga fua ki tena feagaiga e mafai ei o tumau te malo.+
15 Kae ko te tupu ne ‵teke fakamuli atu ki a ia+ mai te ugaatuga o ana avefekau ki Aikupito ke maua mai i ei ne solofanua+ mo se kautau lasi mai i a latou.+ E a, ka manuia a ia? E mata, ka ‵sao mai i te fakasalaga a tino kolā e fai ne latou a mea konei? E mata, e mafai o ofa ne ia te feagaiga kae sao eiloa?’+
16 “‘“E pelā eiloa mo au e ola,” ko te folafolaga a te Aliki Sili ko Ieova, “ka mate a ia i Papelonia, i te koga telā e nofo ei te tupu* telā ne fai ne ia a ia* ke fai mo tupu, ko te tino telā ne takalialia a ia ki tena tautoga kae ofa ne ia tena feagaiga.+
17 Kae ko te kautau lasi mo potukau e uke a te Falao ka se mafai o fesoasoani atu i te taimi o te taua,+ māfai ko faka‵tu aka a mea ma‵luga kae faite aka a pā ma‵luga ke fakaseai ei a ola o tino e tokouke.
18 Ne takalialia a ia ki se tautoga kae ofa ne ia se feagaiga. E tiga eiloa ne tauto atu a ia, ne fai ne ia a mea katoa konei, kae ka se sao eiloa a ia.”’
19 “‘Tela la, konei a pati a te Aliki Sili ko Ieova ne fai mai: “E pelā eiloa mo au e ola, ka aumai ne au ki luga i tena ulu a ikuga o tena takalialia ki taku tautoga+ kae ofa ne ia taku feagaiga.
20 Ka ‵pei atu ne au taku tili ki luga i a ia, kae ‵poa aka a ia i taku tili.+ Ka aumai ne au a ia ki Papelonia kae ka fakamasino ne au a ia i konā ona ko faifaiga sē fakamaoni ne fai ne ia o ‵teke mai ki a au.+
21 Ana kau katoa kolā ne tele kea‵tea ka ‵mate i te pelu, kae ko latou kolā ne ‵toe mai ka fakasalalau atu ki koga katoa.+ Tenā ka iloa ei ne koutou me i a au, ko Ieova, ko oti ne faipati atu.”’+
22 “‘Konei a pati a te Aliki Sili ko Ieova ne fai mai: “Ka puke ne au se somo mai te taulu o te lakau ko te alasi maluga+ kae ‵toki, ka ‵paki ne au se somo foliki mai te taulu o tena kaula,+ kae ka ‵toki ne au a te mea tenā i luga i se mauga maluga.+
23 I luga i se mauga maluga o Isalaelu ka ‵toki ne au i ei; kae ka ola aka ana kaula, kae ka fua mai i ei a fuagalakau kae fai pelā me se lakau alasi gali. Kae ko manu eva valevale ka ‵nofo mai i lalo i ei kae ‵nofo i malūga o ana lau.
24 Kae ko lakau katoa o te vao ka iloa ne latou me i a au, ko Ieova, ne fakamalalo ne au te lakau maluga kae fakamaluga aka te lakau malalo;+ ko oti ne fai ne au ke pakupaku te lakau lanu launiu kae fai te lakau pakupaku ke ‵pula mai.+ Ko au, Ieova, ne faipati atu kae fai ne au te mea tenei.”’”
