Esekielu 15:1-8
-
Ielusalema, se vine sē aoga (1-8)
15 Ne toe oko mai te fekau a Ieova ki a au, ana muna:
2 “Te tama a te tagata, i te auala fea e ‵kese ei te lakau ko te vine mo so se lakau io me ko kaula mai lakau o te vao?
3 E mata, e mafai o fakaaoga se pou mai i ei ke fai ki ei se galuega? Io me e a, e faite ne tino se pine mai i ei ke fakatau‵tau ki ei ne mea?
4 Kiloke! E ‵pei atu ki loto i te afi e pelā me se fafie, e ‵ka ana feitu e lua i te afi kae ‵paku foki te kogaloto. E mata, koi aoga eiloa ke fai ki ei se galuega?
5 I te taimi foki telā koi katoatoa ei, e se mafai eiloa o fakaaoga ki se mea. Kae sili atu la tena sē aoga i te taimi ne ‵ka ei i te afi kae ‵paku foki!”
6 “Tela la, konei a pati a te Aliki Sili ko Ieova ne fai mai: ‘E pelā eiloa mo te lakau mai i te vine telā ne ‵tu fakatasi mo nisi lakau o te vao, kae ne fai ne au pelā me se fafie mo tafu te afi, ka penā foki a te mea ka fai ne au ki tino e ‵nofo i Ielusalema.+
7 Ko oti ne saga atu oku mata o taua atu ki a latou. Ne ‵sao latou mai i te afi, kae ka ‵ka latou i te afi. Kae ka iloa ei ne koutou i a au ko Ieova māfai ko saga atu oku mata o taua ki a latou.’”+
8 “‘Kae ka fai ne au te fenua ke masei valevale+ me ne fai ne latou a faifaiga sē fakamaoni,’+ ko te folafolaga a te Aliki Sili ko Ieova.”
