Te Lua Samuelu 1:1-27
1 Mai tua o te mate o Saulo, kae ko Tavita ko oti ne foki mai i te fakatakavalega o tino Amaleka, ne nofo a Tavita i Sikilaka+ i aso e lua.
2 I te tolu o aso, ne vau se tagata mai te koga ne nofo ei a Saulo mo ana gatu e masae‵sae mo ‵pefu i tena ulu. I tena fanatuga ki a Tavita, ne totuli a ia ki te laukele kae ifo ki lalo.
3 Ne fesili atu a Tavita ki ei: “A koe ne vau mai fea?” Ne tali mai a ia: “Au ne tele mai i te koga e ‵nofo ei a te kau Isalaelu.”
4 Ne fesili atu a Tavita ki ei: “Ne a mea ne ‵tupu i konā? Fakamolemole, fakailoa mai aka ki a au.” Tenā ne fai atu ei a ia: “A te kautau a Isalaelu ko ‵tele kea‵tea mai te taua kae tokouke a tino ko oti ne ‵mate. Ke oko foki eiloa ki a Saulo mo tena tama ko Ionatana ko oti ne ‵mate.”+
5 Tenā ne fesili atu ei a Tavita ki te tamataene telā ne vau mo te tala ki a ia: “E iloa pefea ne koe i a Saulo mo tena tama ko Ionatana ko ‵mate?”
6 Ne tali atu te tamataene tenā: “Au ne fanaka fua ki luga i te Mauga o Kilipoa+ kae ko Saulo e tu i ei e fakapale ki tena tao, kae ko kaliota mo tāgata faka‵tele solofanua ko pili atu eiloa ki a ia.+
7 I te taimi ne mafuli aka ei a ia kae lavea ne ia au, kalaga mai ei a ia ki a au, kae ne tali atu au, ‘Tenei au!’
8 Ne fesili mai a ia ki a au, ‘Ko oi koe?’ Ne tali atu au, ‘Au se tino Amaleka.’+
9 Tenā ne fai mai ei a ia, ‘Fakamolemole vau o tamate au, me i a au ko tigaina valevale, kae ko au koi ola eiloa.’
10 Tenā ne fanatu ei au kae tamate+ ne au a ia, me iloa ne au me ka se sao a ia me ko pakia masei. Ne puke ne au te kalauna i tena ulu mo te taulima i tena lima, kae ko aumai ne au ki konei ki toku aliki.”
11 I konā ne saesae ne Tavita ana gatu, kae penā foki a tāgata katoa kolā ne ‵nofo mo ia.
12 Kae ne ‵tagi fanoanoa kae ‵tagi mautuutu kae fakaliki‵liki+ latou ke oko eiloa ki te afiafi ona ko Saulo, mo tena tama ko Ionatana, mo tino o Ieova mo tino Isalaelu,+ me ne ‵mate latou i te pelu.
13 Ne fesili atu a Tavita ki te tamataene telā ne vau mo te tala: “A koe se tino mai fea?” Ne fai atu a ia: “Au ko te tama tagata a se tino fakaa‵tea, se tino Amaleka.”
14 Tenā ne fai atu ei a Tavita: “Kaia ne seki mataku ei koe o tamate a te tino ne tofi ne Ieova?”+
15 Ne kalaga atu a Tavita ki se tamataene e tokotasi kae fai atu: “Vau ki mua o tamate a ia.” Tenā ne tamate ei ne ia a te tagata tenā, mate atu ei.+
16 Ne fai atu a Tavita ki ei: “Ko i luga eiloa i tou ulu ou toto, me ne fakamaoni mai eiloa ne koe i au pati, ‘Ko au ne tamate+ ne au te tino ne ‵tofi ne Ieova.’”
17 Tenā ne fakalagi ei ne Tavita te pese fakaalofalofa* tenei mō Saulo mo tena tama ko Ionatana+
18 kae fai atu me i tino Iuta e ‵tau o fakaakoako ke iloa ne latou te pese fakaalofalofa e taku ko “Te Kausana,” telā e tusi i te tusi a Iasela:+
19 “Isalaelu, ou tino ‵malu ko oti ne tamate i koga ma‵luga.+
Ko ‵mate a toa ‵mafi!
20 Sa fakailoa atu te mea tenā i Kata;+Sa fakasalalau atu i auala o Asekelona,I tama fāfine a tino Filisitia ma fia‵fia,I tama fāfine a tāgata e seki pilitome ma kata‵kata.
21 Koutou e mauga o Kilipoa,+Ke seai se ‵sau io me ne vaiua i luga i a koutou,Io me ne fatoaga e maua mai ei a meaalofa tapu,+Me tenā te koga ne fakamasei i ei a talita a toa ‵mafi,A te talita a Saulo ko se toe fakaeke ki te sinu.
22 Mai toto o tino ne tamate, mai i gako o toa ‵mafi,Ne seki toe foki mai ei te kausana a Ionatana,+Kae ko te pelu a Saulo ne seki toe foki mai mo te manuia.+
23 A Saulo mo Ionatana,+ ne tino e alofagina kae fagasele i lā olaga,Ne ‵mate fakatasi lāua.+
Ne ma‵kini atu lāua i aeto,+Kae ma‵losi atu i leona.+
24 Tama fāfine o Isalaelu, ‵tagi mautuutu ona ko Saulo,Telā ne fakapei ne ia koutou ki gatu kula mo mea fakagali‵gali,Telā ne fakagaligali ne ia otou gatu ki aulo.
25 Ko ‵mate a toa ‵mafi i te taua!
Ko mate a Ionatana i luga i ou koga ma‵luga!+
26 Ko oko eiloa i toku mafatia ona ko koe, e toku taina ko Ionatana;A koe e fagasele i a au.+
E sili atu te gali o tou alofa ki a au i lō te alofa o fāfine.+
27 Ko ‵mate a toa ‵mafiKae ko meatau o te taua ko se aoga!”
Fakamatalaga mai lalo
^ Io me “se pese fanoanoa.”
