Te Lua Nofoaiga Tupu 16:1-14
16 I te 36 tausaga o te pulega a Asa, ne vau a te tupu o Isalaelu ko Paasa+ o taua atu ki Iuta kae kamata o faite* ne ia a Lama+ ke taofi ei so se tino e fano ki tua io me vau ki loto* i te tupu o Iuta ko Asa.+
2 I konā ne aumai ei ne Asa a siliva mo aulo mai koloa i te fale o Ieova+ mo te fale* o te tupu kae avatu ki te tupu o Sulia ko Peniata,+ telā e nofo i Tamaseko, ana muna:
3 “E isi se feagaiga ne fai i te va o tāua, mo te va o toku tamana mo tou tamana. Ko avatu ne au a siliva mo aulo ki a koe. Vau o ofa tau feagaiga mo te tupu o Isalaelu ko Paasa, ko te mea ke fano kea‵tea a ia mai i a au.”
4 Ne fakalogo a Peniata ki te Tupu ko Asa kae uga atu ne ia a takitaki o ana kautau ke taua atu ki fakai o Isalaelu, kae ne fakatakavale ne latou a Itioni,+ Tanu,+ Apelu-maima mo koga ‵teu koloa katoa i fakai o Nafatali.+
5 I te logoga a Paasa i te mea tenei, ne fakagata fakavave ne ia te faitega* o Lama kae tiaki tena galuega.
6 Tenā ne puke ei ne Asa a Iuta kātoa, kae tali ne latou a fatu mo laupapa i Lama+ kolā ne fakaaoga ne Paasa i te faiga o te galuega,+ kae ne faite ne ia ki ei a Kepa+ mo Mesepa.+
7 I te taimi tenā, ne vau a Hanani+ te tagata e lavea ne ia a fakaasiga ki te tupu o Iuta ko Asa kae fai atu ki ei: “Ona ko koe ne fakalagolago* ki te tupu o Sulia kae seki fakalagolago* ki a Ieova tou Atua, ko ‵sao ei a te kautau a te tupu o Sulia mai i ou lima.+
8 E a, e se tokouke atu a te kautau a tino Aitiope mo tino Lipia kae uke olotou kaliota mo tāgata faka‵tele solofanua? Kae ona ko koe ne fakalagolago ki a Ieova, ne tuku atu ei ne ia latou ki ou lima.+
9 Me i mata o Ieova e kilokilo faeloa ki te lalolagi kātoa+ ke fakaasi atu tena malosi ona ko latou kolā e tuku katoatoa atu olotou loto ki a ia.+ Ko oti ne fai ne koe se mea valea; mai te taimi nei o fano ki mua ka isi faeloa ne taua ka fai atu ki a koe.”+
10 Kae ne kaitaua a Asa ki te tagata e lavea ne ia a fakaasiga kae ‵pei atu a ia ki te falepuipui me ne seki fiafia a ia ki tou tagata ona ko te mea tenei. Kae ne kamata o fai fakamasei ne Asa a nisi tino i te taimi eiloa tenā.
11 A te tala fakasolopito o Asa, mai te kamataga ki te fakaotiga, e tusi i te Tusi o Tupu o Iuta mo Isalaelu.+
12 I te 39 tausaga o te pulega a Asa ne masaki a ia ki ana vae ke oko ki te taimi ko masaki malosi ei a ia; kae i te taimi foki eiloa ne masaki ei a ia, ne seki ‵fuli atu a ia ki a Ieova, kae ne ‵fuli atu fua ki tino faka‵lei masaki.
13 Tenā ne takato ifo ei a Asa o malō‵lo fakatasi mo ana tupuga;+ ne mate a ia i te 41 tausaga o tena pulega.
14 Ne tanu ne latou a ia i te tanuga gali telā ne keli ne ia mō ia eiloa i te Fakai o Tavita,+ kae ne fakatakato ne latou a ia ki te tulaga e tuku ei te pusa o te tino mate telā e ‵fonu i sinu pasama mo mea valevale kolā ne palu fakatasi ke maua mai i ei se sinu fakapito.+ E se gata i ei, ne fai foki ne latou se fanoanoa lasi mō ia kae ‵sunu ne latou a mea ma‵nogi.*
Fakamatalaga mai lalo
^ Io me “fakamalosi; toe faite.”
^ Io me “tiaki io me ulu ki loto i te kogā fenua o.”
^ Io me “palesi.”
^ Io me “fakamalosi; toe faite.”
^ Epelu, “fakapale.”
^ Epelu, “fakapale.”
^ E manino ‵lei me e se ko te ‵sunuga o Asa, kae ko te ‵sunuga o mea ma‵nogi.
