Te Tusi Muamua ki te Kau i Tesalonia 2:1-20
2 E iloa ‵lei ne koutou, e oku taina, me ne seki iku vale te motou asiga ki a koutou.+
2 E tiga eiloa ne logo‵mae muamua matou kae ‵ta fakamasei i Filipi,+ e pelā mo te mea e iloa ne koutou, ne ati aka ne matou te loto toa e auala i te ‵tou Atua ke fai atu ki a koutou a te tala ‵lei a te Atua+ mai lalo i ‵tekemaiga e uke.
3 Me ne seki fakavae a fakamalosiga kolā ne tuku atu ne matou ki manatu ‵se io me ki mea lai‵lai io me ki mea fakaloi‵loi,
4 kae e pelā eiloa mo te taliaga ne te Atua ke tuku mai ki a matou a te tala ‵lei, tela la, e fai‵pati atu matou ke fakafiafia atu ki te Atua, telā e iloilo ne ia omotou loto,+ kae e se ki tino.
5 A te ‵tonuga loa, e iloa ne koutou me ne seki fakaaoga eiloa ne matou a pati tavae fakaloiloi io me ne fakaloiloi ne matou a tino ona ko te kaimanako;+ e molimau te Atua ki te mea tenā!
6 Io me ne ‵sala atu matou ki ne tavaega mai tino, mai i a koutou io me ko nisi tino aka, e tiga eiloa ne ‵tau o ‵mafa te otou amoga ona ko matou ko apositolo a Keliso.+
7 E ‵kese mai i ei, e fai matou mo fai ne tino uiga atafai māfai e ‵nofo tatou, e pelā eiloa mo te atafai* o se mātua ki ana pepe.
8 Ona ko te motou a‵lofa atafai ki a koutou, ne fia‵fia malosi matou o tuku atu ki a koutou, e se gata fua i te tala ‵lei a te Atua, kae e pelā foki mo omotou ola,+ me e fakapelepele ne matou a koutou.+
9 E ‵tau o masaua ne koutou, e oku taina, a te motou galue ‵mafa mo te fi‵ta. Ne ga‵lue matou i po mo ao, ko te mea ke mo a ma fakafi‵ta ne matou se tino i a koutou,+ i te taimi e talai atu ei ne matou te tala ‵lei a te Atua ki a koutou.
10 A koutou ko molimau e pelā foki mo te Atua, ki te motou fakamaoni mo te amiotonu e aunoa mo se mea ‵se ki a koutou, e tino tali‵tonu.
11 E iloa ‵lei ne koutou me ne tumau matou i te fakamalosi kae fakamafanafana atu ki a koutou kae molimau atu ki tino taki tokotasi i a koutou,+ e pelā eiloa mo faiga a se tamana+ ki ana tama‵liki,
12 ko te mea ke mafai o tumau koutou i te sa‵sale e ‵tusa mo te otou kalagaga ne te Atua+ ke ‵kau atu koutou ki tena Malo+ mo tena tulaga ‵malu.+
13 E tonu, tenā foki te pogai e fakafetai atu faeloa matou ki te Atua,+ me i te mauaga ne koutou a te muna a te Atua telā ne lagona ne koutou mai i a matou, ne talia ne koutou, e se ona ko te mea se muna mai i tāgata, kae ko te muna eiloa a te Atua, tenā foki e galue i loto i a koutou, e tino tali‵tonu.
14 Me ne fakaakoako eiloa koutou, e oku taina, ki fakapotopotoga a te Atua kolā e ‵kau fakatasi mo Keliso Iesu i Iuta, me ne logo‵mae koutou i lima o tino o te otou fenua+ i mea foki kolā e logo‵mae ei latou i lima o tino Iutaia,
15 kolā ne tamate ne latou te Aliki ko Iesu+ mo te kau pelofeta kae fakasaua mai ki a tatou.+ E se gata i ei, e se fakafiafia atu latou ki te Atua, kae e ‵teke atu latou ki mea kolā e fia‵fia ki ei a tino katoa,
16 i te lotou taumafai o taofi matou mai te fai‵pati atu ki tino o fenua fakaa‵tea ko te mea ke mafai o ‵sao latou.+ I te auala tenei e fakauke faeloa ne latou olotou agasala. Kae ko oko atu eiloa ki a latou te kaitaua o te Atua.+
17 Kae i te taimi ne māvae ei tatou, e oku taina, mō se taimi toetoe fua (i te feitu faka-te-foitino kae e se ko omotou loto), ona ko te ma‵losi o omotou manakoga, ne taumafai malosi eiloa matou ke toe fetaui tatou.
18 Ko te pogai eiloa tenei ne ma‵nako ei matou o olo atu ki a koutou, ao, ko au ko Paulo, ne taumafai fakalua taimi kae e se fakatasi fua; kae ne ‵pono te motou auala ne Satani.
19 Se a te fakavae o te motou fakamoemoega io me ko te motou fiafia io me ko te motou foualiki i mua o te ‵tou Aliki ko Iesu i tena fakatasi mai? E a, e se ko koutou?+
20 Ko koutou eiloa te motou ‵malu mo te motou fia‵fia.
Fakamatalaga mai lalo
^ Io me “fakapelepele.”
