Te Tusi Muamua ki te Kau Kolinito 8:1-13
8 E uiga ki meakai kolā e ofo atu ki tupua:+ E iloa ne tatou me e tofu a tino katoa mo te mea e iloa ne ia.+ A te iloa tenā e tupu mai ei te fakamatamata, kae ko te alofa e ati aka ei te tino.+
2 Kafai e mafaufau ifo se tino me e iloa ne ia se mea, a te ‵tonuga loa, e se iloa faka‵lei ne ia te mea tenā e ‵tusa mo te mea telā e ‵tau o iloa ne ia.
3 Kae kafai e alofa se tino ki te Atua, e iloa ne te Atua a te tino tenā.
4 E uiga ki te kai ki meakai kolā ne ofo atu ki tupua, e iloa ne tatou me e seai se aoga o te tupua+ i te lalolagi kae e seai se isi atua kae na ko te Atua tonu e tokotasi.+
5 E tiga eiloa e isi ne mea kolā e fakaigoa ki atua, i te lagi io me i te lalolagi,+ e pelā eiloa mo te uke o “atua” mo “aliki,”
6 kae e tokotasi fua te ‵tou Atua,+ ko te Tamana+ telā ne faite ne ia a mea katoa kae ko tatou e ola foki mō ia;+ kae e tokotasi fua te Aliki, ko Iesu Keliso, telā e auala mai i a ia a mea katoa+ kae ko tatou e auala i a ia.
7 E se ko tino katoa e maua ne latou te iloaga tenei.+ Kae ko nisi tino, ona ko te lotou fesokotakiga mua mo tupua, e ‵kai latou ki meakai e pelā me se mea ne ofo atu ki se tupua,+ kae ko fakamaseigina olotou loto lagona ona ko te vāi‵vai.+
8 Kae ka se fai ne meakai ke pili atu tatou ki te Atua;+ a tatou e se ma‵sei māfai e se ‵kai tatou ki ei, io me ‵lei atu māfai e ‵kai tatou ki ei.+
9 Kae ke fakaeteete ke mo a ma fai tou saolotoga ke fai au filifiliga e pelā me se fatu faka‵siga tino kolā e vāi‵vai.+
10 Me kafai e lavea ne se tino a koe telā ko isi sou iloa, e kai i se fale tapuaki o se tupua, e a, ka se fakamalosi aka i ei a te loto lagona o te tino telā e vāivāi ke kai ki meakai kolā ne ofo atu ki tupua?
11 Tela la, ona ko tou iloa ko fakamasei eiloa ne koe a te tagata telā ko vāivāi, ko tou taina telā ne mate a Keliso mō ia.+
12 Kafai ko agasala koutou ki otou taina i te auala tenei kae fakamasei i ei olotou loto lagona kolā ko vāi‵vai,+ ko agasala koutou ki a Keliso.
13 Tenā te pogai ka se toe kai eiloa au ki ‵kano o manu māfai ko meakai e fai ei ke agasala* toku taina, ko te mea ke se fakavāivāi ne au toku taina.+
Fakamatalaga mai lalo
^ Eleni, “siga.”
