I te taimi ne logo ei te fakapotopotoga i a Paulo ka fanatu, ne faima‵laga atu eiloa se potukau o taina i se 40 maila (64 km) te ‵mao ko te mea ke fakafetaui atu ki a ia. Ne pokotia pefea a Paulo ona ko te olotou alofa kaimalie? “I te laveaga ne Paulo a latou, ne siki tena fakafetai ki te Atua, malosi ei tena loto.” (Gal 28:15) Faitalia me ne lauiloa a Paulo i ana fakamalosiga ne tuku atu ki fakapotopotoga konei ne asi mua a ia ki ei, kae ko te taimi tenei ko fai a ia e pelā me se pagota, ko maua eiloa ne ia a fakamalosiga mai i a latou.—2Ko 13:10.

I aso nei, e faima‵laga atu eiloa a ovasia o fenua ki fakapotopotoga ke fakama‵losi atu a taina mo tuagane i ei. E pelā me ne tino o te Atua, i nisi taimi e oko mai te fīta, manavase, mo te loto vāivāi. I te suā taimi e asi atu te ovasia o te fenua mo tena avaga i tou fakapotopotoga, ne a mea e mafai o fai ne koe ke fesoasoani atu ki a lāua ke loto ma‵losi, ko te mea ke “fakatau fakama‵losi” aka?—Lom 1:11, 12.

• Ke ‵lago ki te fakatasiga mō te galuega talai. E fakamalosigina eiloa ki te ovasia o te fenua i te lavea atu a taumafaiga e fai ne tino talai ke maua ne latou a mea aoga i te vaiaso o te galuega talai fakapito tena. (1Te 1:2, 3; 2:20) Ke paenia lagolago atu koe i te masina o tena asiga. E mafai o fakaavanoa koe ke galue mo ia io me ko tena avaga i te galuega talai io me olo koe mo se tino tokotasi mai i a lāua ke kau ki tau akoga faka-te-Tusi Tapu? E fia‵fia eiloa lāua ke ga‵lue mo tino talai kese‵kese, e aofia ei tino fou io me ko latou kolā e se atamai malosi i te talai atu.

• Ke Uiga Talimalo. E mata, e mafai o ofo atu ne koe se koga mo nofo i ei lāua io me ‵kai mo lāua? E lavea atu i ei ne te ovasia o te fenua mo tena avaga me e alofa koe ki a lāua. E se fakamoemoe lāua ki ne fakatokaga e uke.—Luk 10:38-42.

• Ke faka‵logo kae fakagalue ana fakatonutonuga mo ana fakatakitakiga. E fesoasoani mai eiloa a te ovasia o te fenua ke lavea ne tatou a koga kolā e manakogina ke galue tatou ki ei ke gasolo ki mua i te ‵tou tapuakiga ki a Ieova. I nisi taimi, e tuku mai eiloa ne ia ne polopolokiga. (1Ko 5:1-5) Ka fiafia eiloa a ia mafai e faka‵logo tatou kae ‵lago atu ki ei.—Epe 13:17.

• Ke fakaasi atu te loto fakafetai. Ke fakaasi atu ki te ovasia o te fenua mo tena avaga a auala ne aoga ei ki a koe a lā galuega ne fai. E mafai o faipati ‵tonu ki a lāua io me tusi atu i se tamā pepa io me se tamā tusi.—Ko 3:15.