Fakafi‵ta? Io me fakamalosi loto? Ne a mea ka maua ne koe mai te faitau ki te Tusi Tapu? E uke eiloa a mea e faka‵na ki te auala e fai ei tau faitauga? Ke onoono tatou ki mea e mafai o fai ne koe ke momea aka tou fiafia mo te gali.

Fakaaoga se ‵fuliga fou kae faigofie. Kafai e faitau koe ki mataupu kolā e fakaaoga i ei a pati ‵mafa io me ko pati mua kolā e se iloa ne koe, e mafai eiloa o se gali tau faitauga. Tela la, onoono ki se Tusi Tapu telā e fakaaoga i ei se ‵gana faigofie ke malamalama kae otia tonu foki i ei tou loto. Kae e ‵tau foki o fai mo fai se Tusi Tapu telā ne ‵fuli faka‵lei kae tonu. *

Fakaaoga a poto ‵fou. I aso nei, e se maua fua te Tusi Tapu i ‵kopi ne ‵lomi kae penā foki i te itaneti. E mafai o faitau ki nisi Tusi Tapu i te itaneti io me fai sau ‵kopi totino i tau komupiuta, tivaisi, io me ko selefoni. E aofia i nisi lōmiga a mea faigaluega fakaopoopo kolā e mafai o onoono fakavave koe ki nisi fuaiupu i te Tusi Tapu kolā e faipati ki te mataupu e tasi, io me ke fakatusatusa ne koe a ‵fuliga kese‵kese. Kafai e ‵lei atu ke fakalogologo koe ki ei i lō te faitau, e mafai foki o fakalogologo koe ki ei. E ‵lei atu ki tino e tokouke ke fakalogo‵logo ki ei i taimi e faima‵laga atu ei, taimi ‵ta gatu, io me e aofia latou i nisi mea, kae koi mafai o fakalogologo ki ei. Kaia e se tofotofo aka ki se auala telā e ‵lei ki a koe?

Fakaaoga mea faigaluega mō sukesukega ki te Tusi Tapu. A mea faigaluega mō sukesukega ki te Tusi Tapu e mafai o fesoasoani atu ke maua ne koe a mea aoga e uke atu mai tau faitauga. E isi ne mape o fenua  i te Tusi Tapu kolā e mafai o fesoasoani atu ke iloa ne koe a koga i taimi e faitau koe ki ei mo mea ne ‵tupu i ei. A mataupu pelā mo mataupu i te mekesini tenei io me ko te vaega i te fakatuatusi i te jw.org ko te “Akoakoga i te Tusi Tapu,” e mafai o fesoasoani atu ke maua ne koe a nisi fakamatalaga ki te uiga o mea e uke i loto i te Tusi Tapu.

Tofotofo ki auala kese‵kese ke faitau ki ei. Kafai e foliga sē gali atu a te faitau ki te Tusi Tapu mai te kamataga ki te fakaotiga, kaia e se fakamalosi aka tou fiafia mai te faitau ki vaega o te Tusi Tapu kolā e ‵gali ki a koe? Kafai e fia iloa ne koe a tino lauiloa i te Tusi Tapu, e mafai o faitau koe ki tala e uiga ki a latou. E mafai o maua se fakaakoakoga ki te auala tenā i te pokisi “ Keli Malosi Ifo ki te Tusi Tapu ke Iloa ne Koe a Tino i ei.” Io me kāti e fia faitau koe ki te Tusi Tapu e uiga ki mataupu kese‵kese io me ko te fakasologa o mea ne ‵tupu i ei. Kaia e se tofotofo aka ei ne koe se auala e tasi mai auala konei?