A koi tuai o fanatu o fai se mea, e masani o fia iloa ne koe a tali ki fesili konei, ‘Se a te aoga o te mea tenei ki a au?’ Kae e mata, e masei ke fai atu se fesili penei e uiga ki ‵talo? Ikai. E masani o fia iloa ne tatou me e isi se aoga ki a tatou io me ikai. Ke oko ki te tagata ‵lei ko Iopu ne fesili atu penei: “Kafai foki e kalaga atu au, e mata, ka tali mai a ia?”—Iopu 9:16, NW.

I mataupu muamua, ne mafau‵fau tatou ki fakamaoniga me e sili atu a te ‵talo i lō se faifaiga masani fakalotu io me se vaegā vailakau mō te mafaufau. E fakalogologo tonu mai eiloa a te Atua tonu ki ‵talo. Kafai e ‵talo atu tatou i te auala tonu mo mea ‵lei foki, ka saga mai eiloa a ia. A te ‵tonuga loa, e fakamalosi ne ia tatou ke fakapili‵pili atu ki a ia. (Iakopo 4:8) Tela la, se a te mea e mafai o fakamoe‵moe tatou ki ei māfai e fai ne tatou a ‵talo e pelā me se vaega o ‵tou olaga? Ke onoono tatou ki nisi mea aoga mai i ei.

Kafai e ‵sae aka a fakalavelave mo mea faiga‵ta i tou olaga, e mata, e manavase malosi koe e uiga ki ei? E fakamalosi mai te Tusi Tapu ke “‵talo faeloa” tatou i taimi penei kae ke “tuku atu a mea katoa kolā e ma‵nako koutou ki ei ki te Atua.” (1 Tesalonia 5:17; Filipi 4:6) E fakatalitonu mai te Tusi Tapu me kafai e ‵fuli atu tatou ki te Atua i ‵talo, a “te filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto mo otou mafaufau.” (Filipi 4:7) E mafai o maua ne tatou se lagonaga filemu māfai e tuku atu ne tatou ki te ‵tou Tamana faka-te-lagi a mea e manava‵se tatou ki ei. A te ‵tonuga loa, e fakamalosi mai a ia ke fai tatou penei: “Tuku atu ki te Aliki a mea e manavase koe ki ei, me ka fesoasoani a ia ki a koe,” ko muna i te Salamo 55:22.

Ko oti eiloa ne maua ne tino e tokouke i te lalolagi kātoa  a te filemu tenei. A Hee Ran, mai Kolea ki Saute, ne fai mai: “Faitalia te ma‵sei o oku fakalavelave, i te taimi eiloa e ‵talo atu au e uiga ki ei, e maua ne au se lagonaga tokagamalie mai te amoga tenā kae ne lagona ne au a te malosi ke kufaki.” A Cecilia, i Filipaina, ne fai mai: “E pelā me ko te mātua, e manavase au ki mea e uke e uiga ki aku tamaliki fā‵fine mo toku mātua, telā ko se iloa ne ia au. Kae ona ko ‵talo, ne mafai ei ne au o fai a mea masani o te olaga kae se uke a mea e manavase ki ei. E iloa ne au me ka fesoasoani mai a Ieova ki a au i te tausiga o latou.”

E mata, e fepaki koe mo se tulaga fakafanoanoa, kāti se mea telā e fakamataku ki te ola io me se tulaga faigata? A te ‵talo atu ki “te Atua o fakamafanafanaga katoa” e mafai o maua ei se fakatapūga sili. E fai mai te Tusi Tapu  me “e fakamafanafana mai a ia ki a tatou i ‵tou puapuaga katoa.” (2 Kolinito 1:3, 4) E pelā mo te taimi e tasi, ne mafatia ‵ki te loto o Iesu, “totuli ifo ei ki lalo kae kamata o ‵talo.” Se a te ikuga? “Ne fakasae atu ei ki a ia se agelu mai te lagi o fakamalosi atu a ia.” (Luka 22:41, 43) Ne logo‵mae foki a te suā tagata fakamaoni, ko Neemia, i fakamatakutakuga mai tino kolā ne taumafai o taofi a ia mai te faiga o te galuega a te Atua. Ne ‵talo atu a ia: “Te Atua, fakamalosi mai au!” E fakaasi mai i mea ne ‵tupu me ne fesoasoani atu eiloa a Ieova ki a ia ke manumalo i tena mataku kae ke iku manuia foki tena galuega. (Neemia 6:9-16) A Reginald, i Ghana, ne fakamatala mai ne ia tena tala e uiga ki ‵talo: “Kafai au e ‵talo, maise eiloa i tulaga faiga‵ta, e maua ne au te lagonaga me e fai atu ne au oku fakalavelave ki se tino telā e mafai ne ia o fesoasoani kae fakatalitonu mai me e seai se mea e ‵tau o manavase ki ei.” Ao, e mafai o fakamafanafana tatou ne te Atua māfai e ‵talo atu tatou ki a ia.

E mafai eiloa o pokotia tatou mo ‵tou tino pele i ‵tou nisi fakaikuga. E mafai pefea o fai ne tatou a filifiliga ‵lei? E fai mai te Tusi Tapu: “Kafai se tino i a koutou e se maua ne ia te poto [maise i te fakafesagai atu ki tofotofoga], ke na fakamolemole atu faeloa a ia ki te Atua, me e tuku atu eiloa ne ia te mea tenā mo te kaimalie ki tino katoa e aunoa mo te mafaufau ki olotou mea ‵se ne fai.” (Iakopo 1:5) Kafai e ‵talo atu tatou mō te poto, e mafai o fakaaoga ne te Atua tena agaga tapu ke takitaki ei tatou i te faiga o fakaikuga ‵lei. A te ‵tonuga loa, e mafai eiloa o akai atu tatou mō te agaga tapu ona ko pati a Iesu me i te ‘Tamana i te lagi ka tuku atu ne ia te agaga tapu ki a latou kolā e fakamolemole atu e uiga ki ei!’—Luka 11:13.

Ne maua foki ne Iesu te lagonaga ke akai atu ki tena Tamana mō te fesoasoani i te taimi ne fai ei a fakaikuga tāua. E fai mai te Tusi Tapu me i te taimi ne manako ei a ia ke filifili aka a tāgata e toko 12 ke fai pelā me ne apositolo, “ne ‵talo atu a ia ki te Atua i te po kātoa tenā.”—Luka 6:12.

E pelā mo Iesu, ko oti eiloa ne fakatalitonu aka ne tino e tokouke i aso nei i te taimi ne lavea ei ne latou a te auala ne tali mai te Atua ki olotou akai mō se fesoasoani i te faiga o fakaikuga ‵lei. A Regina, i Filipaina, ne fai mai ne ia a fakalavelave kese‵kese ne fe‵paki mo ia, e pelā mo te tausi atu ki a ia mo tena kāiga mai tua o te matega o tena avaga, ko seai sena galuega, mo te faigata o te putiakaga o tama‵liki. Se a te mea ne fesoasoani atu ki a ia i te faiga o fakaikuga ‵lei? Ne fai mai tou fafine, “Ne fakalagolago malosi au ki te fesoasoani o Ieova e auala i ‵talo.” A Kwabena, i Ghana, ne fai mai ne ia te pogai ne akai atu ei a ia ki te fesoasoani o te Atua, “Ne galo atu taku galuega ‵togi ‵lei i te fakatūtū fale.” I te mafaufau ki galuega kese‵kese, ne fai mai a ia, “Ne ‵talo atu faeloa au ki a Ieova mō te takitakiga i te faiga o te filifiliga tonu.” Ne toe fai mai a ia: “Ne talitonu katoatoa eiloa au me ne fesoasoani mai a Ieova ke filifili aka se galuega telā ne mafai o tausi atu ki toku kāiga i te feitu faka-te-agaga mo te feitu faka-te-foitino.” E mafai foki o maua ne koe te takitakiga a te Atua mai te ‵talo atu e uiga ki mea kolā e mafai o pokotia i ei tou fesokotakiga mo ia.

Ne fatoa taku atu ne matou a nai mea kolā e mafai ei o aoga a te ‵talo ki a koe. (Mō nisi fakaakoakoga, ke onoono ki te pokisi “ Mea Aoga Mai i ‵Talo.”) Kae ke maua ne koe a mea aoga konei, e ‵tau o iloa muamua ne koe a te Atua mo tena loto. Kafai tenā eiloa te mea e manako koe ki ei, e fakamalosi atu matou ke fakamolemole atu koe ki se Molimau a Ieova ke fesoasoani ki a koe i te faiga o tau sukesukega ki te Tusi Tapu. * Tenei eiloa te faiga muamua ke fakapilipili atu ei koe ki te Tino telā e ‘tali mai ne ia a talosaga.’—Salamo 65:2.