“Mai tua malie eiloa o te taimi ne mate atu ei toku tamana, ne fai mai taku avaga me ko fiafai a ia ki se isi fafine,” ko te fakamatalaga a Janet. “E se leva, e aunoa mo se fakailoamaiga muamua io me ko te fakatofa, ne puke katoa ana gatu kae tiakina mai fua au mo ma tama‵liki e tokolua.” Ne maua ne Janet se galuega, kae e se lava tena ‵togi ke tausi atu ki te lotou kāiga. Kae e uke atu a fakalavelave ne fe‵paki mo tou fafine i lō mea tau tupe fua. “A te manavase malosi ki tiute ‵fou katoa kolā ko panaki tokotasi mo au ko oko eiloa i te faigata,” ne fai mai tou fafine. “Ne ma‵sei oku lagonaga me ne seki mafai ne au o fai a mea e uke ki aku tama‵liki e pelā mo nisi mātua. Kae ke oko mai foki eiloa ki aso nei, e manavase au e uiga ki te kilokiloga a nisi tino ki a au mo aku tama‵liki. E mata, e mafau‵fau latou me ne fai ne au a mea katoa e ‵tau o fai ke fakatumau ei taku avaga?”

Ne fesoasoani atu a te ‵talo ki a Janet ke pule faka‵lei atu ki ana lagonaga kae fakamalosi aka tena fesokotakiga mo te Atua. “A te po ko te ‵toe taimi faigata, me ko filemu a mea katoa telā ne seki mafai ne au o fakagata toku manavase. Ne fesoasoani mai a te ‵talo mo te faitau ki te Tusi Tapu ke moe ‵lei au. A te fuaiupu telā ne gali ‵ki ki a au ko te Filipi 4:6, 7: ‘Ke mo a ma manava‵se koutou ki so se mea, kae ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga; a ko te filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto mo otou mafaufau.’ Ne fakamāumāu ne au a po e uke i te faiga o ‵talo kae ne lagona eiloa ne au a te fakamafanafana mai ki a au a te filemu o Ieova.”

E aoga foki a pati fakamalosi a Iesu e uiga ki ‵talo i tena Lāuga i luga i te Mauga ki te manavase e uiga ki mea valevale: “E iloa ne te Atua a mea kolā e ma‵nako koutou ki ei a koi tuai o fakatagi atu koutou.” (Mataio 6:8) Kae e ‵tau o akai atu tatou ki a ia. A te ‵talo ko te auala tāua e mafai ei tatou o “fakapili‵pili atu ki te Atua.” Kae se a te mea e iku mai i ei? “Kae ka fakapilipili mai a ia ki a koutou.”—Iakopo 4:8.

Ao, e uke atu a mea e fai ne te ‵talo i lō te faiga fua ke ‵lei ‵tou lagonaga mō te fakaasi atu o mea e manava‵se tatou ki ei. A Ieova, ‘telā e tali mai ki ‵talo,’ e gasuesue foki o fesoasoani atu ki tino katoa kolā e ‵sala atu ki a ia i te fakatuanaki.  (Salamo 65:2) Tenā eiloa te pogai ne akoako atu a Iesu ki ana soko “ke ‵talo faeloa latou kae ke mo a ma ‵fiu.” (Luka 18:1) E ‵tau o akai atu faeloa tatou ki te Atua mō tena takitakiga mo te fesoasoani, mo te tali‵tonu me ka taui mai ne ia ‵tou fakatuanaki. E se ‵tau o fakalotolotolua tatou ki tena manakoga io me ko te mafai ne ia o gasuesue ke fesoasoani mai. Ke “‵talo faeloa” i te auala tenei e fakaasi atu ei me e maua ne tatou a te fakatuanaki tonu.—1 Tesalonia 5:17.

Kae se a tonu eiloa a te fakatuanaki? E aofia i te fakatuanaki a te “iloa tonu” ne tatou o te Atua e pelā me se tino. (Ioane 17:3) E fai muamua tatou penā mai te taliaga o mafaufauga o te Atua e auala i te Tusi Tapu. E ‵tau o iloa ne tatou me e lavea ne ia tatou taki tokotasi kae e fia fesoasoani mai foki. Kae e uke atu a mea e aofia i te fakatuanaki tonu i lō te iloa fua ne tatou se mea e uiga ki te Atua. E fakauiga foki i ei ki te mauaga ne tatou mo ia se va fakataugasoa mo te āva. E pelā eiloa mo se taugasoa faka-te-foitino, e se mafai ne tatou o ati aka se va pili i se aso fua e tasi. E “gasolo faeloa ki mua” ‵tou fakatuanaki i se vaitaimi tai leva e tauloto ei tatou ki mea e uke atu e uiga ki a ia, i te taimi e fai ei ne tatou a “mea kolā e fiafia a ia ki ei,” mo te taimi e maua ei ne tatou tena fesoasoani lasi. (2 Kolinito 10:15; Ioane 8:29) Tenā eiloa te vaegā fakatuanaki ne fesoasoani atu ki a Janet ke fakafesagai faka‵lei atu ki te manavase.

“Ne fesoasoani mai a mea ne ‵tupu ke ati aka toku fakatuanaki ki te fesoasoani o Ieova i mea katoa,” ko muna a Janet. “E fe‵paki matou i taimi e uke mo faifaiga sē fakamaoni kolā e foliga mai me ko se mafai eiloa o fa‵ki i ei. Mai te faiga o ‵talo e uke, ne tuku mai faeloa ne Ieova se auala ke ‵sao matou, telā ne seki mafai ei o iloa ne au. Kafai ko fakafetai atu au ki a ia, e fakamasaua mai i ei a mea e uke ko oti ne fai ne ia mō au. Ne fesoasoani mai faeloa a ia i te taimi tonu, ko te taimi ‵lei eiloa. Kae ne tuku mai foki ne ia a taugasoa ‵tonu kolā ne fai mo fai ne tāgata mo fāfine Kelisiano fakamaoni. Ne toka faeloa latou o fesoasoani mai ki a au kae ne fai foki latou mo fakaakoakoga ‵lei ki aku tama‵liki.” *

“Ko iloa ei ne au a te pogai ne fai mai a Ieova i te Malaki 2:16: ‘Au e se fiafia ki te avaga mavae.’ E fai eiloa mo fai te ‵toe amioga faitogafiti masei ki te tino ‵lei. Ne ‵teka atu a te fia o tausaga talu mai te taimi ne fano keatea ei taku avaga, kae koi se sologa eiloa au i te nofo tokotasi mo te lagonaga me e seai soku aoga. Kafai e oko mai ki a au a lagonaga konā, e taumafai au o fai se mea ke fesoasoani atu ki se isi tino, kae ne fesoasoani mai faeloa a te mea tenā ki a au.” Mai te fakagaluegaga o te akoakoga fakavae i te Tusi Tapu ke ‵kalo keatea mai te nofo tokotasi, ne fakafeoloolo aka ei ne Janet tena manavase. *—Faataoto 18:1.

“A te ‵toe fakamafanafanaga sili ne maua ne au,” e fai mai a Janet, “ko te iloaga me i te Atua ‘e tausi ne ia tamaliki ko seai ne mātua, e puipui ne ia fāfine ko ‵mate olotou avaga.’ Ka se mafai eiloa o tiakina ne ia au e pelā mo taku avaga.” (Salamo 68:5) Ne iloa ne Janet me e se tofotofo ne te Atua a tatou “ki mea ma‵sei.” E ‵kese mai i ei, e tuku mai ne ia te poto “ki tino katoa i te agaga alofa mo te kaimalie” mo te “malosi telā e sili atu i te malosi masani” ke fesoasoani mai ki a tatou i te fakafesagai atu ki mea e manava‵se tatou ki ei.—Iakopo 1:5, 13; 2 Kolinito 4:7.

Kae e a māfai ko manava‵se tatou ona ko te mea ko ‵tu atu ‵tou ola i tulaga fakama‵taku?