I te fale telā e fakatau a‵lofa kae āva ei a mātua, se koga tafasili i te ‵lei ke tupu aka ei se tamaliki. (Kolose 3:14, 19) E a‵lofa a mātua ‵lei ki olotou tama‵liki kae fakamālō atu ki a latou, e pelā mo Ieova te Atua ne fakamālō atu ki tena Tama.—Faitau te Mataio 3:17.

E fakalogologo te ‵tou Tamana faka-te-lagi ki ana tavini, kae saga tonu atu ki olotou lagonaga. Se mea ‵lei mō mātua ke fakaakoako ki a ia kae faka‵logo ki pati e fai atu ne olotou tama‵liki. (Iakopo 1:19) E ‵tau o mafau‵fau faka‵lei latou ki lagonaga o olotou tama‵liki, e aofia i ei a vaegā tugapati sē ‵lei mai i a latou.—Faitau te Numela 11:11, 15.

E pelā me se mātua, e maua ne koe te pulega ke fai a tulafono. (Efeso 6:1) Ke fakaakoako ki te Atua. Ne fakaasi atu ne ia tena alofa ki ana tama‵liki mai te fakamatala manino atu o tulafono mo ikuga o te sē fakalogo ki ei. (Kenese 3:3) Kae i lō te faimālō atu ki tino ke faka‵logo, e akoako ne ia a te auala ke maua ne latou a mea aoga mai te faiga o te mea tonu.—Faitau te Isaia 48:18, 19.

Ke na taumafai eiloa koe o fesoasoani atu ki au tama‵liki ke a‵lofa ki te Atua. Kae ka mafai ei o gasue‵sue latou mo te poto ke oko foki eiloa ki taimi e se ‵nofo atu ei latou i ou tafa. E pelā eiloa mo te akoako atu o te Atua e auala i ana faifaiga, akoako atu au tama‵liki ke a‵lofa ki te Atua e auala i au faifaiga.—Faitau te Teutelonome 6:5-7; Efeso 4:32; 5:1.