I nisi taimi, e mafai o fakasino atu a te pati tenā ki se tagata telā ne ‵pena. I aso o te Tusi Tapu, ne ‵pena sāle a nisi tāgata ke fakasala ei latou io me ko taimi kolā ne puke fakapagota ei latou. Ne ‵pena sāle a tāgata kolā ne fakatalitonugina ke tausi ki koga e ‵nofo ei a fāfine i fale o kāiga o tupu. E pelā mo eunuka ko Hegai mo Sasakasa kolā ne tavini atu e pelā me ne fatamā o avaga mo avaga fakasalasala a te Tupu o Pelesia ko Asuelu, telā ne fai mo fai te Aletaseta I.—Eseta 2:3, 14.

Kae ne seki ‵pena a tino katoa kolā e taku ne te Tusi Tapu ki eunuka. E fai mai a nisi tino ‵poto me ne fakaaoga a te tugapati i se fakauigaga tai lasi ke fakasino atu ki se ofisa telā ne tuku atu ki ei a tiute i te fakaosoga o te fale o te tupu. E foliga mai me tenei te uiga telā ne fakaaoga ki a Epetimeleka, te taugasoa o Ielemia, mo te Aitiope telā ne seki taku mai tena igoa kae ne talai atu ki ei a Filipo. E mautinoa eiloa me ne fai a Epetimeleka mo fai se ofisa maluga, me ne mafai o fanatu ‵tonu ki te Tupu ko Setekaia. (Ielemia 38:7, 8) Kae ne fai mai me i te Aitiope se tino maluga foki i te fale o te tupu fafine telā ne “fano ki te tapuakiga ne fai i Ielusalema.”—Galuega 8:27.

I te fakamatalamaiga ne ia o te fakamasinoga mō aso mai mua nei, ne fai mai a Iesu: “Kafai e oko mai te Tama a te tagata i tena ‵mana, . . . Ka vaevae ne ia a tino, e pelā eiloa mo te tausi mamoe e ‵vae ne ia a mamoe keatea mai kouti.” (Mataio 25:31, 32) Kaia e ‵vae ei ne tausi mamoe a manu konei?

E masani sāle o avatu fakatasi a mamoe mo kouti kae talia foki ke kai‵kai fakatasi i te ao. I te po, ko fakamaopoopo atu ei latou ki se koga telā e puipui faka‵lei ei latou mai manu fe‵kai, tino kai‵soa, mo te ‵moko. (Kenese 30:32, 33; 31:38-40) Ko tuku atu ei a vaegā manu konei e lua ki koga kese‵kese, ko te mea ke puipui ei a mamoe mai mea fakama‵taku kolā e mafai o fai ne kouti i te taimi e “fatoa fa‵nau mai ei, e faka‵sali ifo a susu, mo te taimi e ‵vele ei,” ko muna i te tusi ko te All Things in the Bible. Ne fakaaoga eiloa i te tala fakatusa a Iesu a faifaiga mo mea kolā ne masani ki ei a tino fakalogo‵logo i se kogā koga moukua e pelā mo Isalaelu mua.