“Faitalia me se a te mea e manako koe ki ei, taku mai fua kae ka fai eiloa ne au.” Kāti e tai fakatalave loa a te fai atu ne koe a vaegā pati penā ki se tino fou io me se tino fatoa masani mo koe. Kae kāti e seai eiloa se fakalavelave ke fai atu ne koe a vaegā pati penā ki sou taugasoa pili.

E fai mai te Tusi Tapu me i a Ieova e fai faeloa ne ia a mea kolā e iloa ne ia me ka fakafiafia atu ki ana tino tapuaki. E pelā mo te tupu ko Tavita telā ne maua ne ia se fesokotakiga pili mo te Atua, ne fai mai: “Ko oti ne fai ne koe mea e uke mō matou; . . . . E se mafai ne au o fakalaulau atu katoa me ko to uke!” (Salamo 40:5) E sili atu i ei, e fai foki eiloa ne Ieova a mea kolā e fakafiafia atu ki tino kolā e seki iloa ne latou a Ia, mai te ‘fakama‵liega o latou ki mea‵kai kae faka‵fonu olotou loto ki te fiafia.’—Galuega 14:17.

Ona ko te mea e fiafia a Ieova o fai a mea kolā e fakafiafia atu ki nisi tino, se mea ‵lei foki ke fakamoe‵moe me i tino kolā e fia fai mo fai ne taugasoa o te Atua, ka fai foki ne latou a mea kolā e fai ei tena loto ke “fiafia malosi.” (Faataoto 27:11) Kae ne a mea e ‵tau o fai ne koe ke fakafiafia atu ki te Atua? E tali mai te Tusi Tapu: “Sa puli o fai a mea ‵lei kae tuku a mea kolā ko maua ne koutou ki nisi tino, me e fiafia malosi eiloa a te Atua ki vaegā taulaga penā.” (Epelu 13:16) E mata, e manakogina fua a te faiga o mea ‵lei mo te tuku atu o mea ki nisi tino ke fakafiafia atu ei ki a Ieova?

E fai mai te Tusi Tapu: “E aunoa mo te fakatuanaki e se mafai o fakafiafia faka‵lei atu se tino ki te Atua.” (Epelu 11:6) Se mea tāua ke iloa atu me mai te taimi “ne fakatuanaki a Apelaamo ki a Ieova,” kae ne fatoa “fakaigoa foki [ei a ia] ko te taugasoa o Ieova.” (Iakopo 2:23) Ne faka‵mafa mai foki ne Iesu a te manatu me e ‵tau o “fakatuanaki ki te Atua” māfai e ma‵nako tatou ki te fakamanuiaga a te Atua. (Ioane 14:1) Tela la, e mafai pefea o maua ne koe a te fakatuanaki telā e manako te Atua ke lavea atu ne ia i tino kolā e fakapili‵pili atu ne Ia ki a Ia? E mafai o kamata koe mai te faiga faeloa o se sukesukega ki te Muna a te Atua, ko te Tusi Tapu. I te faiga tenā, ka “iloa tonu” ne koe “tena loto i poto katoa,” kae e penā foki te auala ke “fakafiafia katoatoa” atu ki a Ia. Tela la, kafai e momea aka te iloa tonu ne koe o Ieova kae fakagalue foki ne koe ana manakoga amio‵tonu, ka gasolo aka ei o lasi tou fakatuanaki kae ka fakapilipili malosi atu foki koe ki a Ia.—Kolose 1:9, 10.