E ‵tusa mo pati i te Iosua 6:10-15, 20, ne māti fakatamilo ne te kau Isalaelu a te fa‵kai o Ieliko fakatasi i aso takitasi mō aso e ono. I te fitu o aso, ne fakatamilo ne latou a te fa‵kai fakafitu taimi, kae ne fai ei ne te Atua ke māofa ki lalo a ‵pui ma‵losi o Ieliko. I konā, ne mafai ei ne te kau Isalaelu o ulu atu ki loto i Ieliko kae fakatakavale ne latou. E mata, e ‵lago atu se sukesukega o mea i aso taumua ki fakamatalaga a te Tusi Tapu e uiga ki te fakatakavalega o Ieliko i se taimi toetoe fua?

I aso taumua, se mea masani mō se kautau ke nikoi muamua ne latou se fa‵kai malosi. Faitalia te leva o te taimi e nikoi ei se fa‵kai, ka puke eiloa ne tino kolā e manumalo a koloa o te fa‵kai, e aofia foki i ei a mea‵kai. Kae i te taimi ne fakaseai ei te fa‵kai o Ieliko, ne fakaasi mai i te sukesukega tenei me ne isi eiloa ne mea‵kai ne maua atu i ei. E uiga ki te mea tenei, e fai mai te Biblical Archaeology Review, penei: “A toe mea e uke ne ‵toe mai i te fakamaseiga o te fa‵kai, i tafa o mea kolā ne faite ki kele, ko saito. . . . E tu ‵kese eiloa a te tala tenei mai tala fakasolopito katoa o Palesitina. Kāti e isi ne tiā ne maua atu, kae e fakaofoofogia eiloa ke maua atu se aofaki uke o saito i ei.”

E ‵tusa mo te tala faka-te-Tusi Tapu tenei, e isi eiloa se pogai ‵lei ne seki puke katoa i ei ne te kau Isalaelu a saito io me ko mea‵kai mai i Ieliko. Ne fakatonu atu eiloa a Ieova ke sē puke ne latou se mea mai i ei. (Iosu. 6:17, 18) Ne taua atu te kau Isalaelu i te fa‵kai tenei i te taimi o te tau mafanafana, kāti mai tua malie loa o te taimi ne ‵kati kae fakaputu i ei a saito. (Iosu. 3:15-17; 5:10) A te fakamatalaga tonu e uiga ki saito e uke kolā ne ‵toe i Ieliko, se fakaasiga me ne toetoe fua te taimi ne fakatakavale ei ne te kau Isalaelu a te fa‵kai, e pelā eiloa mo te fakamatalaga i te Tusi Tapu.