1, 2. Se a te kilokiloga ko leva ne maua ne tino tapuaki o Ieova?

KO LEVA ne ‵nofo fakatali‵tali a tino tapuaki o Ieova ki te fakataunuga o valoaga fakaosofia. E pelā me se fakaakoakoga, ne ‵valo mai a Ielemia me ka fakamasei a Iuta ne te kau Papelonia, kae tenā eiloa te mea ne tupu i te 607 T.L.M. (Iele. 25:8-11) Ne fakaosofia a Isaia ke ‵valo mai ne ia me ka toe faka‵foki ne Ieova ana tino ki Iuta, i ana muna: “Ke fia‵fia a latou katoa kolā e tumau i te fakatali‵tali ki a ia.” (Isa. 30:18, NW) Ne fakaiku aka ne Mika, telā ne aofia ne ia a tino o te Atua i ana valoaga ke fai atu, penei: “Ka fakatalitali au mo te loto talitonu ki te Atua.” (Mika 7:7) I se fia selau tausaga, ne ‵nofo fakatali‵tali a tavini a te Atua ki te fakataunuga o valoaga e uiga ki te Mesia, io me ko te Keliso.—Luka 3:15; 1 Pe. 1:10-12. *

² E tumau eiloa a tavini a te Atua i aso nei i te ‵nofo fakatali‵tali ki valoaga e uiga ki te Mesia kolā koi ‵tau o fakataunu. E auala i te Malo faka-Mesia, ko pili o fakagata ne Ieova a logo‵maega o tino mai te fakaseaiga o tino ma‵sei kae faka‵sao ne ia ana tino mai te lalolagi telā e nofo mai lalo i te pulega a Satani. (1 Ioa. 5:19) Tela la, ke na tumau tatou i te matapula‵pula kae mataala faeloa me ko  pili ‵ki mai te gataga o te olaga masei tenei.

3. Se a te fesili e mafai o sae aka ona ko te leva o te taimi e fakatali‵tali ei tatou ki te gataga?

³ E pelā me ne tavini a Ieova, e olioli eiloa tatou ke ‵kilo atu ki te faiga o te loto o te Atua “i te lalolagi nei e pelā mo te faiga i te lagi.” (Mata. 6:10) Kae ona ko te leva o te taimi e fakatali‵tali ei tatou ke na oko mai te gataga, e mafai loa o mafau‵fau a nisi tino penei, ‘E mata, e isi ne pogai ‵lei ke tumau i te ‵nofo fakatalitali ki ei?’ Ke na onoono nei tatou ki ei.

4. Se a te pogai tāua e ‵tau ei mo tatou o tumau i te matapula‵pula?

⁴ E fakaasi mai eiloa i te Tusi Tapu a te kilokiloga telā e ‵tau o maua ne tatou e uiga ki te fakaseaiga o te olaga masei tenei telā ko pili mai. Ne fai atu a Iesu ki ana soko ke “tumau i te matapula‵pula” kae ke “matapula‵pula faeloa.” (Mata. 24:42; Luka 21:34-36) Tenā te pogai e ‵tau ei o tumau i te ‵nofo fakatali‵tali—me ne fai mai a Iesu ke fai tatou penā! I te feitu tenei, e tuku mai ne te fakapotopotoga a Ieova se fakaakoakoga ‵lei e uiga ki ei. A tusi kolā e ‵lomi ne te fakapotopotoga e tumau i te fakamalosi mai ke “fakatali‵tali kae olioli faeloa [tatou] ki te oko mai o te aso o Ieova” kae ke ‵mautakitaki ‵tou fakamoemoega ki te folafolaga a te Atua e uiga ki te lalolagi fou.—Faitau te 2 Petelu 3:11-13.

5. Ne a nisi pogai e ‵tau ei mo tatou o matapula‵pula i te taimi nei?

⁵ E tiga eiloa ne tāua ki Kelisiano kolā ne ola i se fia selau tausaga ko ‵teka ke tumau i te ‵nofo fakatali‵tali, ko sili atu nei i te tāua o te mea tenā ki a tatou i aso nei. Kaia? Me ko ‵nofo nei tatou i te vaitaimi o te fakatasi mai o Keliso. Ko oti ne lavea atu a te fakailoga o tena fakatasi mai talu mai te 1914. Kae ko vaega kese‵kese o te fakailoga, telā e aofia ei a te tulaga masei ‵ki o te lalolagi mo te faiga o te galuega talai o te Malo i te lalolagi kātoa, e fakamaoni mai ei me ko ‵nofo nei tatou i te “taimi o te gataga o te olaga tenei.” (Mata. 24:3, 7-14) E tiga eiloa e seki fai mai ne Iesu te leva o te vaitaimi tenā a koi tuai o oko mai te gataga, e tāua ‵ki ke toka kae matapula‵pula tatou.

6. E iloa pefea ne tatou me ka gasolo aka loa o na ma‵sei atu a tulaga o te lalolagi i te taimi ko pili mai ei te gataga?

⁶ E mafai o ‵sili atu tatou, penei: E mata, a te “gataga o te olaga tenei” e fakasino atu ki se taimi mai mua telā ka gasolo o masei atu i ei a te tulaga o te lalolagi? E fakaasi mai i te Tusi Tapu me i amioga ma‵sei ka gasolo aka eiloa o na ma‵sei atu “i aso fakaoti.” (2 Timo. 3:1, 13; Mata.24:21; Faka. 12:12) Tela la, e mafai o fakamoe‵moe tatou me i te tulaga o te lalolagi i aso nei, ka gasolo aka mai te masei o na ma‵sei atu eiloa.

7. Se a te mea e fakaasi mai i te Mataio 24:37-39 e uiga ki tulaga o te lalolagi i aso fakaoti?

⁷ Kae ka pefea te masei o tulaga o te lalolagi kolā e fakamoe‵moe tatou ke ‵tupu a koi tuai o oko mai te “fakalavelave lasi”? (Faka. 7:14) E pelā me se fakaakoakoga, e mata, e fakamoemoe koe me ka fai a taua i fenua katoa, ka seai ne mea‵kai, kae ka maua ne tino katoa a masaki? Io me kafai ko oko ki tulaga penā, ka faimālōgina a tino kolā e se fia‵fia ki te Tusi Tapu ke lavea ne latou te fakataunuga o valoaga konei. E ui i ei, ne fai mai a Iesu me i te tokoukega o tino ka sē “fia ‵saga” atu ki tena fakatasi mai, kae e fai eiloa a mea kolā e fia‵fia latou ki ei ke oko loa ki te taimi ko talimuli i ei. (Faitau te Mataio 24:37-39.) Tela la, e fakaasi mai i te Tusi Tapu me i tulaga o te lalolagi i aso fakaoti ka se oko ki te tulaga masei ‵ki, telā ka faimālōgina ei a tino ke tali‵tonu me ko pili mai te gataga.—Luka 17:20; 2 Pe. 3:3, 4. 

8. Se a te mea ka lavea faka‵lei ne tino kolā e faka‵logo ki te fakatonuga a Iesu ke “tumau i te matapula‵pula”?

⁸ I te suā feitu, e uiga ki te fakailoga, ka  mafai o lavea faka‵lei atu te fakataunuga tenā ne tino kolā e ‵saga tonu atu o faka‵logo ki te fakatakitakiga a Iesu ke “tumau i te matapula‵pula.” (Mata. 24:27, 42) Kae tenā eiloa te mea ne tupu talu mai te 1914. Mai te taimi tenā, ko oti ne lavea atu te fakataunuga o nisi vaega o te fakailoga. E manino ‵lei, me ko ola nei tatou i te “gataga o te olaga” tenei—se vaitaimi toetoe telā ka aofia ei te fakaseaiga o te olaga masei tenei.

9. Ne a pogai e ‵tau ei mo tatou o tumau i te ‵nofo fakatalitali ki te gataga o te olaga masei tenei?

⁹ Kaia e ‵tau ei mo Kelisiano i aso nei o tumau i te ‵nofo fakatali‵tali? Ona ko te ‵tou faka‵logo ki a Iesu Keliso, e tumau eiloa tatou i te ‵nofo fakatalitali. E iloa foki ne tatou a te fakailoga o tena fakatasi mai. A te ‵nofo fakatalitali o tatou e se fakavae loa ki se mea telā e tali‵tonu tatou ki ei, kae ki fakamaoniga mautinoa mai te Tusi Tapu kolā e fakatalitonu mai ke tumau tatou i te mataala, matapula‵pula, kae ke ‵nofo fakatalitali foki ki te gataga o te olaga masei tenei.

10, 11. (a) Se a te mea ne fakatokatoka ne Iesu ana soko ki ei? (e) Se a te mea ne fai atu ne Iesu ki ana soko ke fai māfai e fui oko vave mai te gataga e pelā mo te mea ne mafau‵fau latou ki ei? (Ke onoono ki te ata i te kamataga.)

¹⁰ A te tokoukega o tatou ko leva ne tumau i te mataala i te feitu faka-te-agaga mō se fia tausaga. Kae e ui i ei, ke mo a e talia ne tatou te leva o te vaitaimi tenā mo mea e fakavāivāi ei a ‵tou fakaikuga ke tumau i te ‵nofo fakatalitali. E ‵tau o toka tatou mō te oko mai o Iesu e pelā me se Tino fakaoko sala ki te olaga tenei. Masaua me ne fakamalosi atu a Iesu ki ana soko, penei: “Ke matapula‵pula kae mataala, me e se iloa ne koutou te taimi telā ko oti ne fuafuagina. E pelā eiloa me se tagata ne faimalaga ki se isi fenua kae tiakina tena fale kae tuku atu te pule ki ana pologa, ke tofu latou taki tokotasi mo olotou galuega, kae fakatonu atu ki te tino tausi mataloa ke tumau i te matapulapula. Tela la, ke tumau i te matapula‵pula, me e se iloa ne koutou te aso e vau ei te Matai o te fale, me ko te fakaafiafi, io me ko te valuapo io me ko te vaveao io me ko te taeao ‵malu; me kafai e oko fakapoi mai a ia, ke se maua atu ne ia a koutou e ‵moe. Ko aku pati e fai atu ki a koutou e fai atu foki ne au ki tino katoa, Ke tumau i te matapula‵pula.”—Male. 13:33-37.

¹¹ Ona ko te iloa atu me ne kamata o fakatasi mai a Keliso i te 1914, ne fakatoka eiloa a soko o Iesu mō te oko vave mai o te gataga. Ne fai eiloa latou penā mai te fakamalosi aka te gasolo ki mua o te galuega talai o te Malo. Ne fakaasi atu ne Iesu me e mafai o vau a ia —“i te vaveao io me ko te tafataeao ‵malu.” Kafai ne tupu te mea tenā, ka ‵saga atu pefea ana soko ki ei? Ne fai mai a ia: “Ke Tumau i te matapula‵pula.” Tela la, e se ‵tau o mafau‵fau tatou me faitalia te leva e faka‵tali ei tatou, e se fakauiga i ei me ka fakatalave io me ka se oko mai eiloa te aso telā e fakatali‵tali tatou ki ei.

12. Se a te mea ne fakamolemole atu a Sapakuka ki a Ieova, ka ne saga atu pefea a te Atua ki ei?

¹² Mafaufau la ki te pelofeta ko Sapakuka, telā ne fakatonu ke ‵valo atu ne ia te fakaseaiga o Ielusalema. I te taimi ne oko atu a ia ki te koga tenā, kae ko leva loa ne faka‵pula atu a te fakamaseiga o te fa‵kai. Ne oko atu ki se tulaga telā a ‘tino amio‵tonu ko fakaloiloigina fua ne tino amio ma‵sei.’ Tela la, ne seki fakatalave eiloa Sapakuka o fesili atu, penei: “Te Aliki [Ieova], afea e fakalogo mai ei koe ki aku talosaga mō se fesoasoani?” I lō te tali tonu atu ki te fesili tenā, ne fakatalitonu atu ne Ieova ki tena pelofeta fakamaoni me i te valoaga e uiga ki te fakamaseiga o te fa‵kai “ka se tuai” eiloa. Ne fai atu te Atua ki a Sapakuka ke “faka‵tali eiloa ki ei.”—Faitau te Sapakuka 1:1-4; 2:3.

13. Se a te kilokiloga ne mafai o maua ne Sapakuka, kae kaia e fai ei pelā me se mea valea a te mea tenā?

¹³ Mafaufau la moi ne loto vāivāi a Sapakuka kae mafaufau penei: ‘Ko leva eiloa ne  lagona ne au te fakaseaiga o Ielusalema i se fia tausaga. Kae e a la māfai koi tuai loa o oko mai? E se foliga tonu mai a te ‵valo atu faeloa me ko pili o fakaseai fakavave atu a te fa‵kai. Ka tuku atu loa ne au te mea tenā ki nisi tino.’ Moi ne talia ne Sapakuka a vaegā manatu konā, penei ko leva loa ne galo atu i a ia te taliaga a Ieova—kae mautinoa eiloa me ka galo atu foki tena ola i te taimi ne fakaseai ei ne tino Papelonia a te fa‵kai o Ielusalema!

14. E mautinoa pefea i a tatou me mai te tumau i te ‵nofo fakatalitali, ka se fanoa‵noa eiloa tatou?

¹⁴ I te lalolagi fou, ka isi eiloa se pogai ke fakaataata ne tatou a te ‵tonu o mea kolā ne ‵valo mai pelā foki mo te fakaseaiga o te olaga tenei. A te mafaufau ‵loto ki mea ‵tonu kolā ne ‵tupu ka fakamalosi aka eiloa i ei ‵tou loto tali‵tonu ki a Ieova me ne fakataunu eiloa ana folafolaga. (Faitau te Iosua 23:14.) Ka loto fakafetai eiloa tatou me i te Atua telā ‘ko oti ne fakatoka ne ia a mea i tena pule eiloa,’ ne fakamalosi mai ki a tatou ke ‵nofo fakatali‵tali me “ko pili mai te gataga o mea katoa.”—Galu. 1:7; 1 Pe. 4:7.

15, 16. Kaia e ‵tau ei o fakaoti ‵tou malosi o fai te galuega talai i te taimi tenei o te gataga?

¹⁵ E fakamoe‵moe eiloa tatou me ka tumau eiloa te fakapotopotoga a Ieova i te fakamasaua mai me e ‵tau o tavini atu tatou ki te Atua ona ko te iloa me ko pili ‵ki mai te gataga. A vaegā fakamasauaga penā e fesoasoani mai ke se tumau fua tatou i te fakalave‵lave i te galuega a te Atua, kae fesoasoani mai foki ke tumau tatou i te mataala ki te fakataunuga o te fakailoga o te fakatasi mai o Keliso. E ‵saga faka‵lei atu pefea tatou ki te vaitaimi tenei ko ola i ei tatou? Mai te fakamuamua faeloa ne tatou te Malo mo te amiotonu o te Atua mai te ‵kau atu mo te loto finafinau ki te talaiatuga o te tala ‵lei!—Mata. 6:33; Male. 13:10.

¹⁶ Ne fai mai se tuagane e tokotasi, penei: “Mai te talai atu o te tala ‵lei o te Malo o te Atua, ko . . . mafai ne tatou o fesoasoani atu o faka‵sao a tino mai te mate i te matugā fakalavelave lasi tela ko pili o oko mai.” E iloa ne tou fafine se mea e uiga ki te faka‵saoga, me i a ia mo tena avaga ne ‵sao mai se fakalavelave lasi i te taimi ne pulu ei te vaka tali pasese lasi tenei ko te Wilhelm Gustlof i te 1945. E tiga eiloa te fakamataku o te tulaga tenā, e mafai eiloa o fakatamala se tino me se a te ‵toe mea tāua ‵ki ki a ia i te taimi tenā. Ne masaua ne te tuagane tenei se fafine telā ne tagi pakalaga, penei: “Oi, taku pausi! Oku kope! Oku kope katoa kolā i lalo i te potu. Tapa, ko ‵galo katoa oku kope!” E ‵kese mai i ei, ne ‵tu atu a ola o nisi pasese ki se tulaga fakamataku mai te fesoasoani atu o faka‵sao a tino kolā ne ‵to ki lalo i te tai telā e poloka ‵ki. E pelā mo pasese konei, e taumafai malosi tatou o fesoasoani atu ki tino.  E gasue‵sue fakavave eiloa tatou o fai te galuega talai kae fesoasoani atu ki nisi tino ke ‵sao atu i te matugā fakalavelave lasi telā ko pili mai a koi tuai o talimuli.

17. Ne a pogai e tali‵tonu ei tatou me ka oko mai te gataga i so se taimi?

¹⁷ E fakaasi faka‵lei mai i mea ‵tupu i te lalolagi nei me ko fakataunu nei a valoaga i te Tusi Tapu kae ko pili ‵ki mai te gataga o te olaga masei tenei. Tela la, e se ‵tau o fakamoe‵moe tatou me koi ‵mao ‵ki te taimi ke ‵saga atu ei a “suki e sefulu” mo te “manu fekai” telā e fakaasi mai i te Fakaasiga 17:16, ki Papelonia te Sili, te emupaea o lotu ‵se i te lalolagi kātoa. Ke masaua ne tatou me ka “faulu ne te Atua ki olotou loto” a tena manakoga tenā, kae ka mafai eiloa o tupu fakavave i so se taimi! (Faka. 17:17) Ko se ‵mao nei te gataga o te olaga masei tenei. Se mea tāua ke faka‵logo tatou ki te faka‵pulaga a Iesu: “‵Saga tonu ki a koutou eiloa ke mo a e faka‵mafa otou loto ki te ‵kai malosi, te inu malosi ki te kava, mo te manavase ki te olaga nei, i te mea mana oko fakapoi atu te aso tenā ki a koutou e pelā me se malei.” (Luka 21:34, 35; Faka. 16:15) Ke na fakaiku aka ne tatou ke tavini atu ki a Ieova ona ko te iloa me ko pili ‵ki mai te gataga, kae ke loto tali‵tonu tatou me “ka gasuesue a ia mō latou kolā e ‵nofo fakatali‵tali atu ki a ia.”—Isa. 64:4.

18. Se a te fesili ka sau‵tala tatou ki ei i te suā mataupu?

¹⁸ A koi fakatali‵tali tatou ki te gataga o te olaga masei tenei, ke na ‵saga atu nei tatou ki pati fakaosofia a te soko ko Iuta: “Aku fagasele, ke ati aka koutou i luga i te otou fakatuanaki e sili i te tapu, kae ‵talo fakatasi mo te agaga tapu, ko te mea ke tumau koutou i loto i te alofa o te Atua, a koi fakatali‵tali koutou ki te alofa fakamagalo o te ‵tou Aliki ko Iesu Keliso, telā e iku atu ki te ola se-gata-mai.” (Iuta 20, 21) Kae e mafai pefea o fakaasi atu ne tatou me e ‵nofo fakatali‵tali tatou ki te folafolaga a te Atua e uiga ki te lalolagi fou kae olioli eiloa tatou ki ei? Ka sau‵tala eiloa tatou ki te mea tenā i te suā mataupu.