MAI te fakapatele atu ki tena tuauma, ne kamata ne Kingsley tena faitauga ki te Tusi Tapu—tena tofiga muamua i te Akoga mō Tino Talai i te fakapotopotoga. Ne taku faka‵lei atu eiloa ne ia a pati takitasi, kae e seai loa se mea e galo i ei. Kae faka‵tali aka! Kaia e se onoono atu ei a ia ki tena Tusi Tapu?

A Kingsley, telā ne nofo atu i Sri Lanka, e ‵kivi. E se logo ‵lei foki a ia kae e manakogina se nofoga fakatekateka mo ana fanofano. Ne iloa pefea ne te tagata tenei a mea e uiga ki a Ieova kae fetaui ‵lei ke kau atu ki te Akoga mō Tino Talai? Ke fakamatala atu ne au.

I te taimi muamua ne fetaui ei māua mo Kingsley, ne ofo malosi au i te lasi o tena fiainu ki te munatonu i te Tusi Tapu. Ko oti ne sukesuke a ia muamua ki te Tusi Tapu mo nai Molimau, kae ko ‵kopi o tena tusi ko Te Iloaga Telā e Takitaki Atu ei ki te Ola Se-Gata-Mai i te ‵gana mō tino ‵kivi ko ‵to valevale. * Ne talia ne ia taku ‵kamiga ke toe faka‵soko tena akoga, kae e lua a tulaga faiga‵ta ne fe‵paki mo māua.

Muamua la, ne ‵nofo fakatasi a Kingsley mo nisi tino i se fale mō tino ma‵tua mo tino sē katoatoa foitino. Ona ko te logoa mo te sē logo ‵lei o Kingsley, ne ‵tau o momea aka toku leo kae faipati malosi atu ki luga. A te ‵tonuga loa, ne mafai o lagona ne tino katoa i te fale a te ma akoga i vaiaso katoa!

 A te lua, ne mafai ne Kingsley o faitau kae ne nai fakamatalaga fua e mafai o masaua ne ia i taimi takitasi e fai ei a te sukesukega. Ko te mea ke momea aka te aoga o ma sukesukega, ne fakatoka eiloa mo te loto finafinau a Kingsley ki ei. Mai mua o te taimi e fai ei te akoga, ne faitau kae toe faitau a ia ki te mataupu ka suke‵suke ki ei, onoono ki tusi siki i tena Tusi Tapu mō tino ‵kivi, mafaufau ki ana tali kae fai mai ne ia i ana pati eiloa. Ne magoi ‵ki eiloa a te auala tenei. I te taimi o te ma sukesukega, e fatai ana vae kae pāpā faeloa ki te fola ona ko te fiafia i te taimi e fakamatala mai ei ne ia i se leo maluga a mea ne tauloto ne ia. E seki leva, kae ne suke‵suke fakalua māua i te vaiaso, a ko akoga takitasi e nofo ki se lua itula te leva!

Ne fiafia malosi a Kingsley ke kau atu ki fakatasiga i te Fale Tapuaki, kae ne seki faigofie a te mea tenei. Ne manakogina ne ia te fesoasoani ke fakanofo kae toe fakatu mai i tena nofoga fakatekateka, te motoka, mo te Fale Tapuaki. Kae ne fakasolosolo a tino e tokouke i te fakapotopotoga ke fesoasoani atu ki a ia, telā ne fai pelā me se tauliaga ki a latou. I taimi o fakatasiga, ne fakatu ne Kingsley se mea fakalasi leo i tafa o tena taliga, ne fakalogologo faka‵lei, kae fai foki ana tali!

Mai tua o tena sukesukega mō se taimi tai leva, ne fakaiku aka ne Kingsley ke kau atu a ia ki te Akoga mō Tino Talai. I te lua vaiaso mai mua o tena faitauga muamua ki te Tusi Tapu, ne fesili atu au ki tou tagata me ko oti ne fakaakoako tena faitauga. Ne fai atu a ia mo te loto talitonu, “Ao e taina, ko oti ne fakaakoako faka-30 taimi au ki ei.” Ne fakamālō atu au ki ana taumafaiga kae fakamolemole atu me e mafai o fakalogologo au ki te faitauga. Ne ‵tala tena Tusi Tapu, tuku atu ana matikao lima ki luga i ei, kae kamata o faitau. Kae ne lavea ne au me e se gasue‵sue ana matikao lima e pelā mo te masani. Me ko oti ne tauloto ne ia te faitauga kātoa ki te Tusi Tapu!

Ne kilo atu eiloa au mo te sē talitonu kae ‵sofi ifo oku loimata. Ne fesili atu au ki a Kingsley me ne mafai pefea o masaua faka‵lei ne ia māfai ne fakaakoako faka-30 taimi fua a ia ki ei. Ne tali mai tou tagata: “Ikai, ne fakaakoako faka-30 taimi au ki ei i aso takitasi.” Mō se masina tupu, ne sagasaga sāle a Kingsley i luga i te fola, kae faitau fakafia atu ke oko eiloa ki te taimi ko fai ei e pelā me se mea tauloto.

Ne oko atu ki te aso e fai ei tena tofiga i te Fale Tapuaki. I te taimi ne oti atu ei tena tōfiga, ne patipati malosi a lima o te fakapotopotoga mo te loto fia‵fia, kae ne ‵tagi a tino e tokouke i te loto finafinau o te tino akoga fou tenei. Ne fakamolemole mai se tino talai e tokotasi, telā ko oti ne taofi aka ne ia te faiga o lāuga i te akoga ona ko te polepole, ke toe kau mai a ia ki te akoga. Kaia? Ne fai mai tou fafine, “Kafai e mafai o fai ne Kingsley, e mafai foki ne au!”

I te po 6 o Setema i te 2008, mai tua o tena sukesukega ki te Tusi Tapu mō tausaga e tolu, ne fakamailoga ei ne Kingsley tena tukuatuga ki a Ieova e auala i te papatisoga ki te vai. Ne fai eiloa mo fai se Molimau alofa tumau ke oko ki tena mate i te po 13 o Me, i te 2014, ne talitonu eiloa a Kingsley me i te lalolagi Palataiso, ka toe faka‵soko atu tena taviniga mo te fakamaoni fakatasi mo te malosi katoatoa mo te foitino ‵lei katoatoa. (Isa. 35:5, 6)—Ne fakamatala mai ne Paul McManus.