E seai se mea e fakaasi mai i te Tusi Tapu e ‵teke atu ei ki te ‵sunuga o se foitino o te tino mate.

Kae e isi ne tala i te Tusi Tapu kolā e fakaasi mai i ei i foitino io me ko ivi o tino ‵mate ne ‵sunu. (Iosu. 7:25; 2 Nofo. 34:4, 5) Kāti ne fakaasi mai i ei me i tino konā ne seki ‵tau o tanu faka‵lei. Kae e se tenā eiloa te pogai e ‵sunu faeloa i ei a foitino o tino ‵mate.

E mafai o lavea ne tatou a te mea tenei i te tala o te ‵matega o te tupu ko Saulo mo ana tamaliki ta‵gata e tokotolu. Ne ‵mate a te tokofa konā i te tauaga mo te kau Filisitia. A te tamaliki tagata e tokotasi mai i ei ko Ionatana, se taugasoa ‵lei kae se tino telā e alofa fakamaoni ki a Tavita. I te iloaga ne tino Isalaelu loto ‵toa kolā ne ‵nofo i Iapese I Kileata a te mea ne tupu, ne puke ne latou a foitino o te tokofa konei, ‵sunu, kae tanu ne latou a ivi. Ne tavae fakamuli latou ne Tavita mō te mea ne fai ne latou.—1 Samu. 31:2, 8-13; 2 Samu. 2:4-6.

A te fakamoemoega faka-te-Tusi Tapu mō tino ‵mate ko te toe‵tuga—ko te ‵toe fakafokimaiga ne te Atua a te tino ki te ola. Faitalia me ‵sunu a te tino mate io me ikai, e seai se tapulā ki te mafai ne Ieova o toe fakafoki mai a te tino ki te ola fakatasi mo se foitino fou. A te tokotolu Epelu fakamaoni kolā ne fakafesagai mo te mate i se ogaumu ‵vela mai i te fakatonuga a te tupu ko Nepukanesa, ne seki ‵tau o ma‵taku o mafaufau pelā me e sē mafai ne te Atua o toe faka‵tu mai latou māfai e ‵mate latou i te afi. (Tani. 3:16-18) E penā foki a tavini fakamaoni a Ieova kolā ne fakafesagai mo te mate kae ‵sunu fakamuli olotou foitino i falepuipui fakasauā a te kau Nazi. E tokouke foki a tavini fakamaoni o te Atua ne ‵mate i pōmu io me ko nisi auala aka kae sē maua olotou foitino. Kae mautinoa eiloa te lotou faka‵tuga.—Faka. 20:13.

E se toe fakapikipiki ne Ieova a te foitino mua o te tino ko te mea ke toe fakatu mai a ia. Ne fakaasi mai a te mea tenā i te ‵toe faka‵tuga o Kelisiano fakaekegina ki te ola i te lagi. E pelā mo Iesu telā “ne toe fakaola aka e pelā me se agaga,” ne toe faka‵tu aka a Kelisiano fakaekegina e pelā me ko te tino eiloa tenā, kae i se foitino faka-te-agaga. E seai ne vaega o olotou foitino faka-te-tagata e olo mo latou ki te lagi.—1 Pe. 3:18; 1 Koli. 15:42-53; 1 Ioa. 3:2.

E se fakalagolago a ‵tou fakamoemoega ki te toe‵tuga ki mea e ‵tau o fai ki te tino mate, kae fakalagolago ki te fakatuanaki ki te mafai mo te manakoga o te Atua ke fakataunu ana tautoga. (Galu. 24:15) E tonu, e se mafai o malamalama katoatoa tatou i te auala ne fai ei ne Ieova te vavega ki te toe‵tuga i taimi ko ‵teka io me ko te auala ka fai ei ne ia i te taimi mai mua. Kae e ‵tau eiloa o tali‵tonu fakamaoni tatou ki a Ieova. Ko oti ne “fakamautinoa” mai ne ia e auala i te toe fakatumaiga o Iesu.—Galu. 17:31; Luka 24:2, 3.

Se mea ‵lei ke mafau‵fau a Kelisiano ki tuu masani, lagonaga o tino i te fenua, mo manakoga o te tulafono e uiga ki te tulaga o foitino o tino ‵mate. (2 Koli. 6:3, 4) Tela la, a te ‵sunu mo te sē ‵sunu o te foitino o te tino mate se fakaikuga totino io me ko te kāiga.