A TE tausaga ko te 1923. Ne ‵fonu eiloa te Drama and Music Conservatory telā ne fai ei te koniseti i São Paulo! E mata, e lagona ne koe a te leo o George Young? Ne ‵fuli a tena lāuga ki te ‵gana Potukale i fuaiupu takitasi. Ne fakalogo‵logo faka‵lei eiloa a te toko 585 kolā ne ‵kau ki ei! Ne pei faka‵lasi a tusi siki mai te Tusi Tapu i te ‵gana Potukale ki luga i se ‵pui. Kae i te fakaotiga, e nofo ki se selau ‵kopi o te tamā tusi ko te Millions Now Living Will Never Die! ne tufatufa atu, fakatasi mo nisi tusi i te ‵gana Palagi, Siamani, mo te ‵gana Italia. Ne iku manuia te lāuga! Ko salalau te Muna. I afiafi po e lua fakamuli ifo, ne ‵fonu te fale i tino e o‵mai o fakalogo‵logo i te suā lāuga. Kae se a te pogai ne ala ei o fai a faigāmea konei?

I te 1867, ne tiakina ne Sarah Bellona Ferguson mo tena kāiga a te Iunaite Sitete o olo ki Brazil. I te 1899, ne iloa ne Sarah me ne maua ne ia te munatonu i tena otiga ne faitau ki nisi tusi faka-te-Tusi Tapu kolā ne aumai ne tena tuagane foliki mai te Iunaite Sitete ki Brazil. Me i a ia se tino e fiafia o faitau, ne fai ei ne tou fafine se feagaiga ke maua a Faleleoleo Maluga i te ‵gana palagi. Ona ko te fiafia ki te fekau mai te Tusi Tapu, ne tusi ei tou fafine ki te Taina S. T. Lasalo, o fakamatala a tena tulaga e pelā me se “fakamaoniga ola me e seai se mea e faigata ke oko ki ei.”

Ne fai ne Sarah Ferguson a te ‵toe mea e mafai ne ia o fakaoko atu te munatonu mai te Tusi Tapu ki nisi tino, kae ne manatu aka tou fafine me ko oi ka fesoasoani ki a ia mo tena kāiga, e pelā foki mo tino ‵lei katoa i Brazil. I te 1912, ne fakailoa atu te Peteli i Brooklyn ki tou fafine me e isi se tino ka fanatu ki São Paulo mo tamā pepa e lau i afe telā e fakaulutala penei, Where Are the Dead? i te ‵gana Potukale. Ne fai mai tou fafine me ne ofo faeloa a ia i te tokouke o Tino A‵koga ki te Tusi Tapu ko pili o olo ki te lagi. Ne tusi atu tou fafine o fakaasi a tena kilokiloga: “Kae pefea a Brazil mo koga katoa i Amelika ki  Saute? . . . Kafai koe e mafaufau ki te lasi o Amelika ki Saute, e faigofie o lavea atu i ei me koi lasi eiloa te galuega ‵kati saito e ‵tau o fai.” Ao, koi lasi eiloa te galuega e ‵tau o fai!

Kāti ko te 1920, ne ‵kau atu se tokovalu tamataene kauvaka mai Brazil ki nisi fakatasiga o te fakapotopotoga i te fa‵kai o Niu Ioki i te taimi koi faite ei a mea ma‵sei o te lotou vakatau. I te lotou ‵fokiga ki Rio de Janeiro, ne sau‵tala fakatasi latou mo nisi tino ki te lotou fakamoemoega fou ne tauloto ne latou mai te Tusi Tapu. E seki leva, kae oko mai a George Young, te ovasia faimalaga, ki Rio de Janeiro i a Mati 1923, kae ne maua ne ia i ei a tino fia‵fia. Ne fakatoka ne ia ke ‵fuli a nāi tusi ki te ‵gana Potukale. E seki leva kae faimalaga atu a te Taina ko Young ki São Paulo, se fa‵kai lasi e nofo ki te 600,000 tino i ei. Ne fai ne tou tagata a te lāuga i konā kae tufatufa a te tamā tusi ko te Millions, telā ne taku atu i te kamataga o te mataupu tenei. “Ona ko te nofo tokotasi,” ne fai mai tou tagata, “Ne fakalagolago katoatoa au ki te fakatauga ki tua o nusipepa.” Konei eiloa a “lāuga muamua ne ‵lomi i loto i nusipepa ke fakasalalau mai lalo i te taliaga a te I.B.S.A. i Brazil,” ne toe fai mai tou tagata. *

I se lipoti e uiga ki Brazil, e fai mai te Watch Tower o Tesema 15, 1923: “Kafai e mafau‵fau tatou ki te kamataga o te galuega i konā i a Iuni 1 kae seai ne tusi kai toka i te taimi tenā, e fakaofoofogia te auala ne fakamanuia ei ne te Aliki a te galuega.” E toe fai mai te lipoti i lāuga e 2 mō tino katoa kolā ne fai ne te Taina ko Young i São Paulo, ne lāuga mai i lāuga e 21 kolā ne fai ne ia mai i a Iuni 1 ki a Setema 30, kae ‵tusa mo te 3,600 tino ne ‵kau ki ei. I Rio de Janeiro, ne salalau malielie eiloa te fekau o te Malo. Kae i nāi masina fua, e silia atu i te 7,000 o ‵tou tusi ne tufatufa atu i te ‵gana Potukale! E se gata i ei, a lōmiga o te Faleleoleo Maluga i te ‵gana Potukale ne kamata fua i lōmiga o Novema-Tesema 1923.

Ne telefoni a George Young ki a Sarah Ferguson, kae ne lipoti mai Watch Tower: “Ne vau te tuagane ki te koga e fetaui ei lāua kae seai eiloa sena pati ne fai. Ne puke atu tou fafine ki te lima o te Taina ko Young, kilo ‵tonu atu ki ona mata, kae fai atu: ‘A koe se Ovasia faimalaga tonu?’” Ne seki leva, kae papatiso tou fafine mo nisi tamaliki a ia. A te tonuga loa, e 25 tausaga ne faka‵tali ei tou fafine ke papatiso a ia! Ne taku mai i loto i te Watch Tower o Aokuso 1, 1924 me e toko 50 tino ne papatiso i Brazil, kae ko te tokoukega o latou ne papatiso i Rio de Janeiro.

Nei la, i se 90 tausaga fakamuli ifo, ko sē manakogina ke fesili tatou, penei: “Kae pefea a Brazil mo koga katoa i Amelika ki Saute?” E silia atu i te 760,000 Molimau a Ieova e talai te tala ‵lei i Brazil. Kae ko te fekau o te Malo ko lagona ne tino i kogā koga katoa i Amelika ki Saute i te ‵gana Potukale, Sepania, mo nisi ‵gana e uke. I te 1915, ne tonu eiloa a Sarah Ferguson, ‘Koi lasi eiloa te galuega koi ‵tau o fai.’—Mai ‵tou faletusi i Brazil.