I te mataupu mai mua, ne sau‵tala tatou ki te fakailoga telā ne tuku mai ne Iesu. A te fakailoga tenā se fakamaoniga lavea ki mata me ko oti eiloa ne fakatu te Malo o te Atua i te lagi kae ko Iesu Keliso te Tupu i ei.

E fai mai te Tusi Tapu me i te taimi eiloa ne pule mai a Iesu i te Malo, ne ‵tuli kea‵tea ne ia a Satani mo ana temoni mai te lagi. Olotou mea e fai ko gata fua i te lalolagi, kae tenā se pogai e tasi ko uke ei a mea ma‵sei ne ‵tupu talu mai te 1914.—Fakaasiga 12:7, 9.

Faitalia te gasolo aka o ma‵sei a tulaga o te lalolagi, kae e uke a mea ko oti ne fai ne Iesu, e pelā me ko te Tupu o te Malo o te Atua, ke fesoasoani atu ki tino i te lalolagi. Ona ko te galuega ki te akoakoga o tino ki te Tusi Tapu, telā ne ‵valo mai ne Iesu, ko tauloto kae fakagalue ne tino e tokouke a fakatakitakiga mai te Tusi Tapu i olotou olaga i aso takitasi. (Isaia 2:2-4) Ko oti ne tauloto te fia miliona o tino ki te mauaga o se kilokiloga paleni ki galuega, te auala ke maua se olaga fiafia i te kāiga, ke maua a kope faka-te-foitino kae ke mo a ma fai pelā me ko te ‵toe mea tāua i olotou olaga. Ko tauloto ne tino konei a mea kolā ka aoga ki a latou i te taimi nei kae ko fai foki latou mo vaegā tino kolā e manako te Atua ke ola mai lalo i tena Malo.

Koi pule eiloa a malo o tāgata ki te lalolagi nei faitalia me ko oti ne fai a Iesu mo pule i te lagi. Kae ko oti ne fakatonu atu a te Atua ki a Iesu: “Fano o manumalo i va o ou fili.” (Salamo 110:2) Ko pili fua o fakaseai ne Iesu a tino ‵teke katoa kae ko tino kolā e ma‵nako o faka‵logo ki te Atua ka se toe fe‵paki mo fakalavelave.

Tenā te taimi ka gasue ei te Malo o te Atua o

• Fakaseai a lotu ‵se. A lotu kolā ne akoako ne latou a mea sē ‵tonu e uiga ki te Atua kae fai ne latou a olaga o tino ke faiga‵ta, ka ‵galo atu. E fakaata mai i te Tusi Tapu a lotu ‵se e pelā me se fafine talitāgata. Ka ‵poi a tino e tokouke i te taimi ka fakaseai ei a lotu.—Fakaasiga 17:15, 16.

• Fakagata a pulega a tāgata. Ka gasue a te Malo o te Atua o fakaseai a pulega katoa a tāgata.—Fakaasiga 19:15, 17, 18.

• Fakaseai a tino amio ma‵sei. Kae pefea la a tino kolā ko ‵saga fua o fai a mea ma‵sei kae ita ma faka‵logo ki te Atua? “E pelā mo tino amio ma‵sei, ka unu kea‵tea latou mai te lalolagi.”—Faataoto 2:22.

• Fakaseai a Satani mo ana temoni. A Satani mo ana temoni ka se mafai o “toe takitaki ‵se ne ia a atufenua.”—Fakaasiga 20:3, 10.

Se a te uiga o mea katoa konei ki a latou kolā ko talia ne latou te Malo o te Atua?

Ka uke atu a mea ka fai ne Iesu māfai ko pule mai pelā me se Tupu i te lagi, i lō pulega a tāgata. Ka fesoasoani atu ki a ia a pule lagolago e toko 144,000 kolā ne filifili mai i tino. (Fakaasiga 5:9, 10; 14:1, 3) Ka fai eiloa ne ia ke fakataunu te loto o te Atua i te lalolagi nei. Ne a mea ka fai ne te Malo o te Atua mō tino e ola i te lalolagi?

• Fakaseai a masaki mo te mate. “Ka seai se tino e fai aka: ‘Au ko masaki,’” kae “ka se toe ai se mate.”—Isaia 33:24; Fakaasiga 21:4.

• Fai ke maua te filemu mo te tokagamalie tonu. “Ka lasi ‵ki te filemu o au tama,” kae “ka saga‵saga a latou taki tokotasi mai lalo i olotou vine mo olotou mati, kae ka seai se tino e ma‵taku latou ki ei.”—Isaia 54:13; Mika 4:4.

• Tuku atu a galuega aoga ke fai ne tino. “Ko galuega e fai ne olotou lima ka fia‵fia ki ei oku tino filifilia. Ka se sona galue ‵mafa latou kae seai se mea e maua mai i ei.”—Isaia 65:22, 23.

• Faka‵lei a fakalavelave i te enivalomene. “A te koga lavaki mo te koga e se uke a vai i ei ka fia‵fia, kae ko te toafa laugatasi ka ‵lifu kae ‵pula aka e pelā mo te lakau ko te safaloni.”—Isaia 35:1.

• Akoako a tino ki mea e ‵tau o fai ne latou ke mafai latou o ola ki te se-gata-mai. “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi, e penā foki loa mo te tino telā ne uga mai ne koe, ko Iesu Keliso.”—Ioane 17:3.

E manako te Atua ke maua ne koe a fakamanuiaga konā. (Isaia 48:18) Ka fakamatala mai i te suā mataupu a mea e mafai o fai nei ne koe ke maua se olaga gali i aso mai mua.