1-2. (a) Se a te fakatonuga ne fai atu ki apositolo e tokotolu a Iesu, kae ne ‵saga atu pefea latou ki ei? (e) Ne a mea ka mafau‵fau tatou ki ei i te mataupu tenei?

I TE otiga o te Paseka i te 32 T.A., ne lavea ne apositolo ko Petelu, Iakopo, mo Ioane se fakaasiga fakaofoofogia. I luga i se mauga maluga, kāti i se vaega o te mauga ko Helemoni, ne ‵fuli i ei a foliga o Iesu i mua o latou. “Ne maina mai ana mata e pelā mo te la, kae ko ana gatu ne ‵kena pakipaki eiloa e pelā mo te mainaga.” (Mata. 17:1-4) I te taimi ko tai oti ei te fakaasiga, ne lagona ne apositolo a pati a te Atua, penei: “Tenei eiloa taku Tama, ko taku fagasele telā ko oti ne talia ne au. Faka‵logo ki a ia.” (Mata. 17:5) Ne fakamaoni mai ne apositolo e tokotolu e auala i olotou olaga me ne faka‵logo eiloa latou ki a Iesu. E fia fakaakoako tatou ki a latou.

² I te mataupu mai mua, ne tauloto tatou me i te fakalogo ki te leo o Iesu, e fakauiga i ei me e isi ne mea e se ‵tau o fai ne tatou. I te mataupu tenei, ka mafau‵fau tatou ki mea e lua ne fai mai ne Iesu me e ‵tau o fai ne tatou.

3. E ‵tusa mo te Mataio 7:13, 14, ne a mea e ‵tau o fai ne tatou?

³ Faitau te Mataio 7:13, 14. Onoono la me ne taku mai ne Iesu a mataloa kese‵kese e lua kolā e iku atu ki auala kese‵kese e lua, se auala “saosao” mo se auala “sai‵tia.” E seai se auala i te tolu. E ‵tau o filifili aka ne tatou a te auala ka olo tatou i ei. Tenei te ‵toe fakaikuga tāua—e fakalagolago ki ei te ‵tou ola ki te se-gata-mai.

4. E fakamatala mai pefea ne koe a te auala “saosao”?

⁴ E ‵tau o masaua ne tatou a mea e ‵kese ei a auala konei e  lua. A te auala “saosao” e tokouke a tino i ei me e faigofie te faimalaga atu i ei. Se mea fakafanoanoa me ne fakaiku aka ne tino e tokouke ke tumau i te auala tenā kae ke tau‵tali i te tokoukega o tino kolā e faima‵laga atu i ei. E se talia ne latou te manatu me i te tino e fakamalosi ne ia a tino i te auala tenā ko Satani te Tiapolo, kae ko te auala tenā e iku atu ki te mate.—1 Koli. 6:9, 10; 1 Ioa. 5:19.

5. Ne a taumafaiga ne fai ne nisi tino ke iloa ne latou te auala sai‵tia kae ke kamata o faima‵laga atu i ei?

⁵ E ‵kese mo te auala “saosao,” a te suā auala e “sai‵tia” kae ne fai mai a Iesu me ne nai tino fua e maua ne latou te auala tenā. Kaia? Se mea gali, me i te suā fuaiupu, ne fai atu a Iesu ke fakaeteete ana soko i pelofeta ‵loi. (Mata. 7:15) E fai mai a nisi tino me e lau i te fia afe o lotu kae ko te ukega o latou e fai mai me e akoako ne latou te munatonu. E lau i miliona a tino ne loto vāi‵vai io me ne faka‵kivi aka ne akoakoga ‵se a lotu telā ko se ‵sala ei latou ki te auala ki te ola. Kae e mafai eiloa o maua te auala tenā. Ne fai mai a Iesu: “Kafai e tumau koutou i aku muna, ko oku soko ‵tonu koutou, kae ka iloa ne koutou te munatonu, kae ko te munatonu ka fakasaoloto ne ia koutou.” (Ioa. 8:31, 32) E fakamālō atu me ne seki tautali koe i te tokoukega o tino kae ne ‵sala koe ki te munatonu. Ne kamata o sukesuke malosi koe ki te Muna a te Atua ke iloa atu a mea e manako a ia ke fai ne tatou, kae ne fakalogo koe ki akoakoga a Iesu. E aofia i nisi mea konā, ne tauloto koe me e manako a Ieova ke ‵teke ne tatou a akoakoga a lotu ‵se kae ke fakagata te fakamanatu o aso malō‵lo kolā e māfua mai i faifaiga fapaupau. Ne tauloto foki koe me e mafai o faigata ke fai a mea kolā e manako ki ei te Atua kae tumau i te sē aofia i faifaiga kolā e se talia ne ia. (Mata. 10:34-36) Kāti ne seki faigofie ki a koe ke fai a ‵fuliga konei. Kae ne tumau eiloa koe i ei ona ko tou alofa ki tou tamana faka-te-lagi kae e manako ke talia ne ia koe. Ko oko eiloa i tena fiafia ki a koe!—Faata. 27:11.

6. E ‵tusa mo te Salamo 119:9, 10, 45, 133, se a te mea e mafai o fesoasoani mai ke tumau tatou i te auala sai‵tia?

⁶ Kafai ko kamata o faima‵laga atu tatou i te auala sai‵tia, ne a mea ka fesoasoani mai ke tumau tatou i ei? Mafaufau ki te tala fakatusa tenei. A te ‵pui i te feitu o se auala lauliki i luga i te mauga e fai pelā me se puipuiga ki te tino fakatele mo tena motoka. Ne fai a te ‵pui ke puipui ei a tino faka‵tele—ke fesoasoani atu ke mo a ma to fakapili‵pili ki te feitu auala io me ‵to ifo ki lalo. E sē se tino fakateletele e mafai o fameo mai ki te ‵pui tenā! A tulaga o Ieova e maua i te Tusi Tapu e fai pelā mo te ‵pui tenā. E fakatumau tatou ne ana tulaga konā i te auala sai‵tia.—Faitau te Salamo 119:9, 10, 45, 133.

7. E ‵tau o pefea te kilokiloga a talavou ki te auala sai‵tia?

⁷ Talavou, e mata, e mafaufau koe i nisi taimi me ko tō faiga‵ta a tulaga o Ieova? Tenā loa te mea e manako a Satani ke mafaufau koe ki ei. E manako a ia ke saga atu koe ki mea e fai ne tino kolā e faima‵laga atu i te auala saosao, ki te lotou olaga telā e foliga gali mai. Kāti e mafai o fakaaoga ne ia a mea e fai ne ou taugasoa i te akoga io me ko mea e lavea ne koe i te itaneti ke mafaufau koe me se gali tou olaga pelā mo latou. E manako Satani ke mafaufau koe me e se mafai o fiafia koe i tou olaga ona ko tulaga o Ieova. * Kae ke masaua te mea tenei: E se manako a Satani ke iloa ne tino kolā e faima‵laga atu i tena auala a te  lotou ikuga. Kae i te suā feitu, ko oti ne fakaasi faka‵lei atu ne Ieova ki a koe a mea ‵gali ka maua ne tino kolā e tumau i te auala ki te ola.—Sala. 37:29; Isa. 35:5, 6; 65:21-23.

8. Ne a mea e mafai o tauloto ne talavou mai te tala o Olaf?

⁸ Ke mafaufau ki mea e mafai o tauloto ne koe mai i te tala o te taina talavou ko Olaf. * Ne fakamalosi a ia ne tamaliki i te akoga ke aofia i amioga fakatauavaga sē ‵tau. I te taimi ne fakamatala atu ne ia me i Molimau a Ieova e ola e ‵tusa mo tulaga ma‵luga i mea tau amioga i te Tusi Tapu, ne taumafai a nisi tama‵liki fafine i tena vasega o fakakolekole a ia ke ‵moe fakatauavaga mo latou. Kae ne ‵mautakitaki eiloa a Olaf i te faiga o te mea tonu. Kae e se tenei fua te fakalavelave ne fepaki mo ia. Ne fai mai a Olaf: “Ne taumafai oku faiakoga o fakamalosi mai ke kausaki atu au ki akoakoga ma‵luga me e fai ei ke āva mai a tino ki a au. Ne fai mai latou me e aunoa mo te mea tenā ka se manuia eiloa toku olaga.”  Se a te mea ne fesoasoani atu ki a Olaf ke ‵teke atu ki fakamalosiga penā? Ne fai mai a ia: “Ne ati aka ne au se va fakataugasoa ‵pili mo tino i taku fakapotopotoga. Ne fai latou pelā me se kāiga ki a au. Ne kamata foki o sukesuke malosi au ki te Tusi Tapu. Ko toku sukesuke ‵loto, ko te lasi foki o toku loto talitonu me tenei te munatonu. Ona ko te mea tenā, ne fakaiku aka ei ne au ke tavini ki a Ieova.”

9. Ne a mea e ‵tau o fai ne tino kolā e ma‵nako ke tumau i te auala sai‵tia?

⁹ E manako a Satani ke tiaki ne koe te auala telā e iku atu ki te ola. E manako a ia ke ‵kau fakatasi koe mo te tokoukega o tino i te “auala saosao telā e tau atu ki te fakaseaiga.” (Mata. 7:13) Kae ka tumau tatou i te auala sai‵tia māfai e tumau i te faka‵logo ki a Iesu kae ‵kilo atu ki te auala tenā e pelā me se puipuiga. Ke mafau‵fau nei tatou ki te suā mea ne fai mai a Iesu me e ‵tau o fai ne tatou.

10. E ‵tusa mo te Mataio 5:23, 24, ne a pati a Iesu ki mea e ‵tau o fai ne tatou?

¹⁰ Faitau te Mataio 5:23, 24. Ne fakamatala atu ne Iesu se mea telā ne tāua ‵ki ki tino tapuaki Iutaia kolā ne fakalogo‵logo atu ki a ia. Mafaufau me ko toka se tino i te faletapu o tuku atu se manu mo fai se taulaga ki te faitaulaga. Kafai e masaua ne ia i te taimi tenā me e isi se mea e se fiafia tena taina ki a ia, e ‵tau o tiaki ne ia tena taulaga “kae fano.” Kaia? Se a te mea e sili atu i te tāua i tafa o te ofoatuga o se taulaga ki a Ieova? Ne fai faka‵lei mai a Iesu: “Fai muamua ke ‵lei koulua mo tou taina.”

11. Fakamatala mai a mea ne fai ne Iakopo ke maua se va filemu mo Esau.

¹¹ E uke a akoakoga tāua e mafai o tauloto ne tatou e uiga ki te mauaga o se va filemu māfai e iloilo ne tatou se mea ne tupu i te olaga o Iakopo. Mai tua o se 20 tausaga ne nofo ei a Iakopo i se isi fenua, ne fakatonu atu a te Atua e auala i se agelu, ke toe foki ki te fenua ne fanau ei a ia. (Kene. 31:11, 13, 38) Kae ne isi se fakalavelave. A tena taina matua ko Esau ne manako ke tamate a ia. (Kene. 27:41) A Iakopo ne “mataku malosi kae manavase” i te mea māfai koi kaitaua eiloa tena taina ki a ia. (Kene. 32:7) Se a te mea ne fai ne Iakopo ke maua se va filemu mo tena taina? Muamua la, ne ‵talo malosi a ia ki a Ieova e uiga mō te mea tenā. Oti aka, avatu ei ne ia se meaalofa ki a Esau. (Kene. 32:9-15) Fakamuli loa, i te taimi ne fetaui ei a te tautaina konei, ne mua a Iakopo o fakaasi atu te āva ki a Esau! Ne seki ifo fakatasi fua io me fakalua taimi a ia ki a Esau—kae fakafitu taimi. Ne maua ne Iakopo se va filemu mo tena taina ona ko ana faifaiga loto maulalo kae āva.—Kene. 33:3, 4.

12. Ne a mea ne tauloto ne tatou mai te tala o Iakopo?

¹² Ne tauloto ne tatou se akoakoga tāua mai i te auala ne fakatoka ei a Iakopo ke fetaui mo tena taina mo te auala ne faipati ei a ia ki a Esau. Ne fakamolemole atu a Iakopo mo te loto maulalo ki a Ieova mō se fesoasoani. Kae ne gasuesue a ia e ‵tusa mo tena ‵talo mai te taumafai ke maua se va filemu mo tena taina. I te taimi ne fetaui lāua, ne seki kinau atu a Iakopo ki a Esau me ko oi te tino e sao io me ‵se i a lāua. Ne fakamoemoe a Iakopo ke maua se va filemu mo  tena taina. E mafai pefea o fakaakoako tatou ki a Iakopo?

13-14. Kafai ne fai ne tatou ke kaitaua se taina talitonu, ne a ‵tou mea e ‵tau o fai?

¹³ A tatou kolā e faima‵laga atu i te auala ki te ola e ma‵nako ke fakatumau a va filemu mo ‵tou taina. (Loma 12:18) Ne a mea e ‵tau o fai ne tatou māfai ko iloa aka me e se fiafia mai se taina talitonu ki a tatou? E pelā mo Iakopo, e ‵tau mo tatou o ‵talo malosi atu ki a Ieova. E mafai o fakamolemole atu ki a ia ke fakamanuia mai ‵tou taumafaiga ke maua se va filemu mo ‵tou taina.

¹⁴ E ‵tau foki o fakaaoga a taimi ke iloilo aka ne tatou a tatou eiloa. E mafai o fesili ifo tatou penei: ‘E mata, e loto fiafia au ke fai atu i a au e ‵se, ke fakatoese atu mo te loto maulalo, kae ke maua se va filemu? Ka pefea a lagonaga o Ieova mo Iesu māfai e gasue muamua au ke maua se va filemu mo toku taina io me mo toku tuagane?’ A tali a tatou ka fakamalosi aka ei ke faka‵logo tatou ki a Iesu kae ke loto maulalo o fai a mea ke maua se va filemu mo ‵tou taina tali‵tonu. E mafai o fakaakoako tatou ki a Iakopo i te feitu tenei.

15. E fesoasoani mai pefea te akoakoga fakavae i te Efeso 4:2, 3 ke mafai o maua se va filemu mo ‵tou taina?

¹⁵ Fakaataata i tou mafaufau a mea ne mafai o ‵tupu moi fai ne fakaasi atu ne Iakopo te uiga fakamatamata i te fetauiga mo tena taina! Kāti ka ‵kese ‵ki te mea ka iku mai i ei. Kafai e olo atu tatou o faka‵lei ‵tou va mo ‵tou taina, e ‵tau o fai penā mo te loto maulalo. (Faitau te Efeso 4:2, 3.) E fai mai te Faataoto 18:19: “A te taina telā e kaitaua e sili atu tena faigata i lō se fakai malosi, kae e isi ne kinauga kolā e fai pelā mo lakau faka‵lava o se taoa maluga.” A te fakatoese atu mo te loto maulalo e mafai o fai ei ke ulu atu koe ki loto i te “taoa maluga” tenā.

16. Se a te mea e ‵tau o mafau‵fau faka‵lei ki ei, kae kaia?

¹⁶ E ‵tau foki o mafaufau faka‵lei tatou ki ‵tou pati mo te auala ka fai atu ei ki ‵tou taina. Kafai ko toka tatou, e ‵tau o fai‵pati atu tatou ki te tino telā ne kaitaua mo te fakamoemoega ke fakaseai so se logo‵maega i tena loto. Kāti ka fai mai muamua ne ia a pati kolā e se ‵lei ki a koe. E faigofie fua ke kaitaua koe io me taumafai o fai au fakamasakoga, kae e mata, a te faiga tenā ka maua mai i ei se va filemu? Ikai. Masaua me e sili atu i te tāua ke maua se va filemu mo tou taina i lō te taumafai ke iloa aka a te tino tonu mo te tino ‵se.—1 Koli. 6:7.

17. Ne a au mea e mafai o tauloto mai te tala o Gilbert?

¹⁷ Ne taumafai malosi a te taina ko Gilbert ke fai mo fai se tino tausi te filemu. Ne fai mai a ia: “Ne maua ne au se va sē ‵lei ‵ki mo soku kāiga pili. Ne taumafai au i loto i se lua tausaga tupu ke faipati ‵tonu i se auala filemu ko te mea ke maua se va ‵lei o māua.” Ne a foki a nisi mea ne fai ne Gilbert? “A koi tuai o fai‵pati māua, ne ‵talo au kae fakatoka toku mafaufau  ke talia so se pati sē ‵lei e mafai o fai mai ne ia. E ‵tau mo au o toka ke fakamagalo atu. Ne tauloto au ke mo a ma kinau atu mō toku ‵lei, kae ne malamalama au i toku tiute ko te taumafai ke maua se va filemu.” Ne a mea ne iku mai i ei? Ne fai mai a Gilbert: “Nei la, ko filemu toku mafaufau me ko maua ne au se va ‵lei mo tino katoa i toku kāiga.”

18-19. Kafai ne fai ne tatou ke kaitaua se tino, ne a mea e ‵tau o fai ne tatou, kae kaia?

¹⁸ Se a la te mea e ‵tau o fakaiku aka ne koe ke fai māfai e isi se taina Kelisiano e se fiafia ki a koe? Fakalogo ki te fakatonuga a Iesu ke maua se va filemu. Faipati atu ki a Ieova e uiga ki te mea tenā kae fakalagolago ki tena agaga tapu ke fesoasoani atu ke fai koe mo fai se tino tausi te filemu. Kafai e fai koe penā, ka fiafia koe kae ka fakaasi atu ne koe a nisi fakamaoniga me e fakalogo koe ki a Iesu.—Mata. 5:9.

¹⁹ E loto fia‵fia eiloa tatou me ne tuku mai ne Ieova a fakatakitakiga a‵lofa e auala i te “ulu o te fakapotopotoga,” ko Iesu Keliso. (Efe. 5:23) Ke na fakaiku aka ne tatou ke “faka‵logo ki a ia,” e pelā mo apositolo ko Petelu, Iakopo mo Ioane. (Mata. 17:5) Ko oti ne onoono tatou ki te auala ke fai penā, mai te faiga ke maua se va filemu mo se taina Kelisiano telā ne kaitaua mai ki a tatou. Mai te fai penā mo te tumau i te auala sai‵tia telā e iku atu ki te ola, ka maua eiloa ne tatou a fakamanuiaga e uke i te taimi nei mo te fiafia tumau i aso mai mua.