1. Ne a nisi meaalofa ne tuku mai ne Iesu?

 E SEAI se tino e ‵pau mo Iesu i te kaimalie. I tena nofoga i te lalolagi, ne fakaaoga tena ‵mana fakaofoofogia ke fesoasoani atu ki nisi tino. (Luka 9:​12-17) Ne tuku mai ne ia te ‵toe meaalofa tafasili i te tāua, telā ko tena ola, mō tino katoa. (Ioa. 15:13) Ne tumau eiloa i te fakaasi mai ne Iesu a tena kaimalie, talu mai tena toetuga. E ‵tusa mo tena tautoga, ne fakamolemole a ia ki a Ieova ke ‵ligi mai tena agaga tapu ko te mea ke akoako kae fakamafanafana tatou. (Ioa. 14:​16, 17; 16:13) Kae auala i ‵tou fakatasiga, e tumau eiloa a Iesu i te fakatoka o tatou ke fai a soko i te lalolagi kātoa.—Mata. 28:​18-20.

2. Ko oi a “tāgata e pelā me ne meaalofa” telā ne fakasino ki ei i te Efeso 4:​7, 8?

² Mafaufau ki te suā meaalofa ne tuku mai ne Iesu. Ne tusi mai te apositolo ko Paulo, me mai tua o te fanakaga a Iesu ki te lagi, “ne tuku mai ne ia a tāgata e pelā me ne meaalofa.” (Faitau te Efeso 4:​7, 8.) Ne fai mai a Paulo me ne tuku mai ne Iesu a meaalofa konei ke fesoasoani atu ki te fakapotopotoga i nisi feitu. (Efe. 1:​22, 23; 4:​11-13) I aso nei, a tavini fesoasoani, toeaina mo ovasia o te seketi, a e aofia i “tāgata e pelā me ne meaalofa.” E tonu, a tāgata konei e se ‵lei katoatoa, tela la, e fai ne latou a mea ‵se. (Iako. 3:2) Kae e fakaaoga ne te ‵tou Aliki ko Iesu Keliso a latou ke fesoasoani mai; tenā a tena meaalofa ki a tatou.

3. Fakamatala mai te auala e mafai o ‵lago atu tatou ki galuega a “tāgata e pelā me ne meaalofa.”

 ³ Ne ‵tofi ne Iesu a “tāgata [konei] e pelā me ne meaalofa” ke fakamalosi aka te fakapotopotoga. (Efe. 4:12) Kae e mafai ne tatou katoa o fesoasoani atu ke fai te lotou tiute tāua tenei. Ke fai se fakatusaga: Nisi o tatou e aofia eiloa i te faitega o se Fale Tapuaki. Kae ko te ‵toega e ‵lago ki te galuega mai te fakatokaga o mea‵kai, mea fakatele‵tele, mo nisi galuega aka. I se auala tai ‵pau, e mafai ne tatou katoa o ‵lago atu ki tavini fesoasoani, toeaina mo ovasia o te seketi i ‵tou pati mo faiga. Ke onoono nei ki mea aoga e maua ne tatou mai taina ga‵lue malosi konei, mo te auala ke fakaasi atu ‵tou loto fakafetai ki a latou mo Iesu, telā ne tuku mai ne ia a “tāgata [konei] e pelā me ne meaalofa.”

E FAI NE TAVINI FESOASOANI A “GALUEGA FESOASOANI”

4. Ne a nisi “galuega fesoasoani” ne fai ne tavini fesoasoani i te senitenali muamua?

⁴ I te senitenali muamua, ne ‵tofi aka nisi taina e pelā me ne tavini fesoasoani. (1 Timo. 3:8) E foliga mai me ne fai ne latou a “galuega fesoasoani” kolā ne tusi mai a Paulo e uiga ki ei. (1 Koli. 12:28) E mautinoa eiloa me ne fai ne tavini fesoasoani a nisi galuega tāua, ko te mea ke ‵saga tonu atu a toeaina o akoako kae tausi a mamoe. E pelā mo te fesoasoani atu o latou ki te faiga o ‵kopi o te Tusi Tapu io me ‵togi a mea mo ‵lomi a ‵kopi konā.

5. Ne a nisi galuega e fai ne tavini fesoasoani i aso nei?

⁵ Mafaufau ki nisi galuega fesoasoani a tavini fesoasoani i tau fakapotopotoga. (1 Pe. 4:10) Kāti ne ‵tofi latou ke tausi ki mea tau tupe a te fakapotopotoga io me ko koga talai, ke fai a ōta tusi a tino talai, ke fakagalue a mea faka‵lasi leo mo vitio, kae fesoasoani ki te faka‵leiga o te Fale Tapuaki mo nisi mea. A galuega katoa konei e aoga ki te fakateletelega faka‵lei o te fakapotopotoga. (1 Koli. 14:40) E se gata i ei, e fai ne nisi tavini fesoasoani a tōfiga i te fakatasiga ko te Olaga mo te Galuega Talai penā foki a lāuga mō tino katoa. Nisi o latou e ‵tofi ke fesoasoani ki se ovasia o te galuega talai, kae i nisi taimi, e olo tasi latou mo toeaina ki asiga pelā me ne tausi mamoe.

6. Ne a nisi pogai e loto fakafetai ei tatou ki ‵tou tavini fesoasoani ga‵lue malosi?

⁶ E aoga pefea a galuega a tavini fesoasoani ki te fakapotopotoga? Ne fai mai a Berbely, b se tuagane i Bolivia, penei, “Fakafetai ki ‵tou tavini fesoasoani, e fiafia katoatoa au ki fakatasiga. Ona ko olotou galuega, ko mafai ne au o usu, fai aku tali, fakalogologo ki lāuga, kae tauloto mai vitio mo ata. E leoleo ne latou a ‵tou mataloa kae fesoasoani ki a latou kolā e fakaaoga te itaneti ke ‵kau mai ki fakatasiga. Ka oti te fakatasiga, e ga‵sue latou o ‵teu, fesoasoani ki mea tau tupe, kae fakamautinoa aka me e maua ne tatou a tusi e manakogina. Ko oko eiloa i toku loto fakafetai ki a latou!” Ne fai mai a Leslie, telā e nofo i Colombia kae ko tena avaga se toeaina: “E fakalagolago eiloa a taku avaga ki tavini fesoasoani ke tausi atu ki nisi galuega. E aunoa mo latou, ka fakalavelave malosi atu a ia, tela la, e fakafetai au mo te lotou loto finafinau kae loto fia‵fia o fesoasoani.” E mautinoa eiloa me konā foki ou lagonaga.—1 Timo. 3:13.

7. E fakaasi atu pefea te ‵tou loto fakafetai ki tavini fesoasoani? (Onoono foki ki te ata.)

⁷ E tiga eiloa e mafai o fakaasi atu ‵tou lagonaga loto fakafetai ki tavini fesoasoani, kae fakamalosi mai te Tusi Tapu, penei: “Fakaasi atu  te otou loto fakafetai.” (Kolose 3:15) A Krzysztof, se toeaina i Finland, ne fakaasi atu tena loto fakafetai i te auala tenei, “Kafai e  lafo ne au se postcard io me se fekau ki se tavini fesoasoani, e siki ne au se tusi faitau kae fai atu se mea e tasi ne fakamalosi ei au ne ia io me ko te pogai e loto fakafetai ei au ki tena taviniga.” A Pascal mo Jael, kolā e ‵nofo i New Caledonia, e masani o ‵talo atu mō tavini fesoasoani. Ne fai mai a Pascal, “Fakamuli nei, ne aofia faeloa i mā fakatagi mo ‵talo fakamolemole a taina tōfia i te motou fakapotopotoga.” Ao, e lagona ne Ieova a vaegā ‵talo penā, kae e aoga eiloa ki te fakapotopotoga kātoa.—2 Koli. 1:11.

TOEAINA I TE FAKAPOTOPOTOGA “E GA‵LUE MALOSI MŌ KOUTOU”

8. Kaia ne tusi mai ei a Paulo me i toeaina i te senitenali muamua ne “ga‵lue malosi”? (1 Tesalonia 5:​12, 13)

⁸ Ne ga‵lue malosi a toeaina i te senitenali muamua mō te fakapotopotoga. (Faitau te 1 Tesalonia 5:​12, 13; 1 Timo. 5:17) Ne “tausi” ne latou te fakapotopotoga—mai te faiga o fakatasiga mo fakaikuga e pelā me se potukau o toeaina. Ne “fakamalosi” ne latou a olotou taina mo tuagane—mai te tuku atu o pati fakatonutonu a‵lofa ke puipui ei a te fakapotopotoga. (1 Tesa. 2:​11, 12; 2 Timo. 4:2) E tonu, ne ga‵lue malosi foki a tāgata konei o tausi atu ki olotou kāiga kae fakama‵losi latou i te feitu faka-te-agaga.—1 Timo. 3:​2, 4; Tito 1:​6-9.

9. Ne a nisi tiute o toeaina i aso nei?

⁹ E fakalave‵lave malosi a toeaina i aso nei. A latou ne tino talai. (2 Timo. 4:5) E fai ne latou mo te loto finafinau te takitakiga i te galuega talai, fakatoka a koga talai a te fakapotopotoga, kae fakamasani tatou ke iloa o talai kae akoako i se auala magoi. E tavini foki latou e pelā me ne famasino loto fakamagalo kae sē fakailoga tino. Kafai e fai ne se Kelisiano se agasala matagā, e fesoasoani atu a toeaina o faka‵lei a tena va mo Ieova kae taumafai foki o fakatumau te ‵ma o te fakapotopotoga. (1 Koli. 5:​12, 13; Kala. 6:1) A te ‵tonuga loa, a toeaina ne tausi mamoe. (1 Pe. 5:​1-3) E fai ne latou a lāuga faka-te-Tusi Tapu kolā ne fakatoka faka‵lei, taumafai ke iloa ‵lei ne latou a tino katoa i te fakapotopotoga, kae fai a asiga a tausi mamoe. Nisi toeaina e fesoasoani ki te faitega mo te faka‵leiga o Fale Tapuaki, fakatokatokaga o fono ‵lasi, kae aofia i Komiti mō Fakaimasaki mo Potukau Asiasi Tino Ma‵saki, i tafa loa o nisi galuega. E ga‵lue malosi eiloa a toeaina mō tatou!

10. Ne a nisi pogai e loto fakafetai ei tatou ki ‵tou toeaina ga‵lue malosi?

¹⁰ Ne ‵valo mai a Ieova me ka tausi faka‵lei tatou ne tausi mamoe kae ka se ‘toe ma‵taku io me pole‵pole’ tatou. (Iele. 23:4) Ne fakatalitonu aka ne Johanna, se tuagane i Finland, a te ‵tonu o pati konā i te taimi ne masaki ‵ki ei a tena mātua. Ana muna: “Faitalia te faigata ke fakaasi atu oku lagonaga ki nisi tino, ne fakaasi mai ne se toeaina e se iloa ‵lei ne au a te kufaki, ‵talo fakatasi māua, kae fakamautinoa mai ne ia a te alofa o Ieova. Ko puli i a au ana pati ne fai mai, kae masaua fua ne au me ne seki toe manavase au i te taimi tenā. Au e talitonu me ne uga mai ne Ieova a tou tagata ke fesoasoani mai i te taimi tonu.” E fesoasoani atu pefea a toeaina i tau fakapotopotoga ki a koe?

11. E mafai pefea o fakaasi atu ne tatou a te loto fakafetai ki toeaina? (Onoono foki ki te ata.)

¹¹ A Ieova e manako ke fakaasi atu ‵tou loto fakafetai ki toeaina “ona ko olotou galuega.” (1 Tesa. 5:​12, 13) Ne fai mai a Henrietta, telā e nofo foki i Finland: “E fesoasoani atu a toeaina ki tino mo te loto fia‵fia, kae e se fakauiga i ei me e avanoa faeloa latou kae ma‵losi io me e seai ne olotou fakalavelave i te olaga nei. Nisi taimi ko fai atu au penei, ‘E iloa ne koe me se a? A koe se toeaina ‵lei ‵ki loa. E manako au ke iloa ne koe te mea tenā.’” Ne fai mai se  tuagane i Türkiye c e igoa ki a Sera: “E manakogina ne toeaina a fakamalosiga ke tumau i te ga‵lue malosi. Tela la, e mafai o tusi atu ki a latou se tamā tusi i se card, ‵kami latou ke ‵kai fakatasi tatou, io me ga‵lue tasi mo latou i te galuega talai.” E mata, e isi se toeaina e loto fakafetai malosi koe ki ei ona ko ana galuega? ‵Sala ki auala ke fakaasi atu te loto fakafetai tenā.—1 Koli. 16:18.

A OVASIA O TE SEKETI E FAKAMALOSI MAI KI A TATOU

12. Se a te fakatokaga telā ne fakamalosi aka ei a fakapotopotoga i te senitenali muamua? (1 Tesalonia 2:​7, 8)

¹² Ne tuku atu ne Keliso Iesu ki te fakapotopotoga “a tāgata e pelā me ne meaalofa” ke tavini atu i se isi auala. Ne fakaaoga ne ia a toeaina i Ielusalema ke uga atu a Paulo, Panapa, mo nisi taina e pelā me ne ovasia faima‵laga. (Galu. 11:22) Kaia? Mō te pogai eiloa e tasi ne ‵tofi aka i ei a tavini fesoasoani mo toeaina: ke fakama‵losi aka a fakapotopotoga. (Galu. 15:​40, 41) Ne tiakina ne tāgata konei a olotou olaga masani kae ne ‵tu foki olotou ola i se tulaga fakamataku, ko te mea ke akoako kae fakamalosi a nisi tino.—Faitau te 1 Tesalonia 2:​7, 8.

13. Ne a nisi tiute a ovasia o te seketi?

¹³ A ovasia o te seketi e faima‵laga i taimi e uke. Nisi o latou e olo atu i se fia selau kilomita ki fakapotopotoga kese‵kese. I vaiaso takitasi, e fai ne se ovasia o te seketi a lāuga, asiga pelā me se tausi mamoe, fono mō paenia, toeaina, penā foki mo fakatasiga mō te galuega talai. E fakatoka ana lāuga ki fono fo‵liki mo fono ‵lasi. E akoako atu i akoga mō paenia, fakatoka se fono fakapito mō paenia i te seketi, kae fai fakavave a nisi galuega tāua—kolā ne tuku atu ne te ofisa lagolago.

14. Ne a nisi pogai e loto fakafetai ei tatou ki ovasia o te seketi kolā e ga‵lue malosi?

 ¹⁴ E aoga pefea ki fakapotopotoga a galuega tāua a ovasia o te seketi? Ne fai mai se taina i Türkiye e uiga ki asiga a ovasia faima‵laga konei: “E fakamalosi mai faeloa so se asiga a latou ke fakamāumāu oku taimi e uke ke fesoasoani atu ki oku taina mo tuagane. Ne fetaui au mo ovasia o te seketi e tokouke; kae ne seki faigata ki a au ke fanatu ki a latou io me fakaasi mai i a ia ko tō fakalavelave.” A Johanna, telā ne taku mai muamua, ne ga‵lue mo se ovasia o te seketi i te galuega talai, kae ne seki ai ne lā tino ne maua i fale takitasi konā. Ne fai mai a ia, “E ui i ei, ka masaua faeloa ne au a te aso tenā. E tokolua oku taina ne fatoa olo atu ki se fenua, kae ne misi ne au lāua. Ne fakamalosi kae fesoasoani mai te ovasia o te seketi ke lavea ne au me kāti i te taimi nei, e ‵nofo ‵mao tatou mai ‵tou kāiga mo taugasoa, kae i te lalolagi fou, ka ‵kau fakatasi faeloa tatou.” E tokouke a ovasia o seketi ko masani ‵lei mo tino kolā e tavini latou ki ei.—Galu. 20:37–21:1.

15. (a) E ‵tusa mo te 3 Ioane 5-8, e fakaasi atu pefea ‵tou loto fakafetai ki ovasia o te seketi? (Onoono foki ki te ata.) (e) Kaia e ‵tau o fakaasi atu te loto fakafetai ki avaga a taina tofia, kae e fai pefea ne tatou te mea tenā? (Onoono ki te pokisi “ Masaua Olotou Avaga.”)

¹⁵ Ne fakamalosi ne te apositolo ko Ioane a Kaio ke fakaasi atu te uiga talimalo ki taina kolā ne asi atu kae ke “uga atu a latou ke ola i se auala telā e fiafia ki ei te Atua.” (Faitau te 3 Ioane 5-8.) Tasi o auala ke fai tatou penā, ko te ‵kami mai o te ovasia o te seketi ke ‵kai tasi tatou. E se gata i ei, ke ‵lago atu ki fakatokaga mō te galuega talai i te taimi o te asiga. Ne fakaasi atu ne Leslie, telā ne taku mai muamua, te loto fakafetai i nisi auala. Ana muna: “E ‵talo au ki a Ieova ke tausi atu ki olotou manakoga ko ana pati. Ne tusi atu foki ne  māua mo taku avaga a tusi alofa ki a latou, kae fai atu a te lasi o te fesoasoani o olotou asiga ki a māua.” Ke masaua, e seai ne malosi fakapito o ovasia o te seketi. I nisi taimi, e logo‵mae latou i masaki, te manavase, penā foki te loto vāivāi. Kāti ka fai eiloa au pati atafai io me se tamā meaalofa e pelā me se tali ki te ‵talo a te ovasia o te seketi mō se fesoasoani!—Faata. 12:25.

E MANAKOGINA NE TATOU A “TĀGATA E PELĀ ME NE MEAALOFA”

16. E ‵tusa mo te Faataoto 3:​27, ne a fesili e mafai o ‵sili ifo ne taina ki a latou eiloa?

¹⁶ I te lalolagi kātoa, e manakogina malosi ne tatou a “tāgata e pelā me ne meaalofa.” Kafai koe se taina papatiso, e mata, “e lava tou malosi o fesoasoani”? (Faitau te Faataoto 3:27.) E mata, ko toka koe ke fai pelā me se tavini fesoasoani? E mata, e mafai o tausi atu koe ki manakoga o ou taina e pelā me se toeaina? d E mata, e mafai o fakama‵fuli ou fakanofonofoga ke mafai o kau atu ki te Akoga mō Tino Talai o te Malo? Ka fesoasoani atu a te akoga tenā ke toka ‵lei koe ke fakaaoga katoatoa ne Iesu. Kafai e se fetaui ‵lei koe ki ei, ‵talo ki a Ieova. Fakamolemole atu mō tena agaga tapu ke fesoasoani ke mafai ne koe o fai so se tofiga e tuku atu ki a koe.—Luka 11:13; Galu. 20:28.

17. Se a te mea e fakatalitonu mai ne “tāgata e pelā me ne meaalofa” e uiga ki te ‵tou Tupu, ko Keliso Iesu?

¹⁷ A “tagata e pelā me ne meaalofa” kolā ne ‵tofi aka ne Iesu, se fakamaoniga eiloa me e takitaki ne ia tatou i aso fakaoti konei. (Mata. 28:20) E a e se loto fakafetai koe ki te ‵tou Tupu alofa, kaimalie, kae saga tonu o tuku mai a taina kolā e fetaui ‵lei ke tausi mai ki ‵tou manakoga? Tela la, na ‵sala atu ki avanoaga ke fakaasi atu ‵tou loto fakafetai ki tāgata ga‵lue malosi konei. Kae sa puli o fakafetai atu ki a Ieova, telā ko te Pogai sili o “meaalofa ‵lei katoa mo mea ‵lei katoatoa.”—Iako. 1:17.