1-2. Se a te ‵toe auala ‵lei ke faitau kae sukesuke ki te Tusi Tapu? Fakamatala mai.

 FAKAATAATA i tou mafaufau me ko fakaiku ne koe ke ‵togi se fale. Ne a mea e manako koe ke lavea ne koe a koi tuai o fai tau fakaikuga? E mata, ko te ata fua o te feitu ki mua o te fale? E mautinoa me ka manako koe ke kilo ou mata ki te fale, ke sasale i tena matafale, ke onoono ki potu katoa, kae ke lavea ne koe ana feitu katoa. Kati ka manako foki koe o iloilo te palani o te fale ke iloa ne koe te auala ne faite ei. E mautinoa, me ka manako eiloa koe ke kilo atu ki mea katoa e uiga ki tou fale.

² E mafai foki o fai ne tatou se mea tai ‵pau māfai e fai‵tau kae suke‵suke ki te Tusi Tapu. E tasi te tusi e faka‵pau ne ia te fekau i te Tusi Tapu ki “se fale lasi ‵ki kae maluga telā e malosi tena fakavae.” Tela la, e fakamasani pefea koe ki mea katoa i loto i te Tusi Tapu? Kafai e faitau fakavave koe ki ei, ka tauloto fua koe ki mea faigofie—ko “akoakoga fakavae o folafolaga tapu mai te Atua.” (Epe. 5: 12) I lō te fai penā, ke fano “ki loto” e pelā mo koe e ulu ki se fale, ke iloilo a fakamatalaga ‵loto i ei. A te ‵toe auala ‵lei ke sukesuke ki te Tusi Tapu ko te onoono aka me fetaui pefea a mea e fakaasi mai i se koga e tasi mo mea e fakaasi mai i te suā koga. Taumafai ke malamalama koe i mea o te munatonu kolā e talitonu koe ki ei kae kaia foki e talitonu ei koe ki ei.

3. Se a te mea ne fakamalosi atu te apositolo ko Paulo ke fai ne ana taina Kelisiano, kae kaia? (Efeso 3:​14-19)

³ Ke malamalama faka‵lei i feitu katoa o te Muna a te Atua, e ‵tau o tauloto tatou ki muna‵tonu ‵loto mai te Tusi Tapu. Ne  fakamalosi atu te apositolo ko Paulo ki ana taina mo tuagane Kelisiano ke sukesuke faka‵lei ki te Muna a te Atua ko te mea ke “malamalama katoatoa i te lauefa, te loa, te maluga, mo te ‵poko o te munatonu.” Tenā ko “‵mautakitaki eiloa [olotou] aka” i te fakatuanaki. (Faitau te Efeso 3:​14-19.) E ‵tau foki o fai tatou penā. Ke sau‵tala nei tatou ki te auala sukesuke faka‵lei ki te Muna a te Atua ko te mea ke katoatoa i a tatou a te ata kātoa mo uiga ‵loto i ei.

4. Ne a mea e mafai ne tatou o fai ke fakapili‵pili atu ei ki a Ieova? Taku mai ne fakaakoakoga.

⁴ E pelā me ne Kelisiano, e se ma‵nako tatou ke gata fua te ‵tou malamalama i akoakoga kamata i te Tusi Tapu. Mai te fesoasoani o te agaga tapu o te Atua, e fia tauloto foki tatou “ki mea ‵loto a te Atua.” (1 Koli. 2:​9, 10) Kaia e se kamata ei o fai ne au sukesukega totino ki se mataupu ko te mea ke fakapilipili atu ei koe ki a Ieova? E pelā mo te iloilo ne koe a auala ne fakaasi atu ne ia tena alofa ki ana tavini i aso mua mo te auala e fakamaoni atu ne te mea tenā me e alofa foki a ia ki a koe. E mafai o iloilo ne koe te fakatokaga a Ieova ki te tapuakiga i Isalaelu kae ‵pau pefea te mea tenā mo te fakatokaga faka-Kelisiano i aso nei. Io me mafai o sukesuke ‵loto koe ki valoaga kolā ne fakataunu e auala i a Iesu i te taimi ne ola ei i te lalolagi mo te faiga o tena galuega talai.

5. E mata, e isi se mataupu e manako koe o sukesuke ‵loto ki ei?

⁵ Ne fesili atu ki nisi tino fia‵fia o fai sukesukega ki te Tusi Tapu me ne a akoakoga ‵loto mai te Muna a te Atua e ma‵nako tonu latou o sukesuke ki ei. E mafai o maua a nisi tali mai i a latou i te pokisi “ Mataupu mō Sukesukega Totino.” Ka fiafia malosi eiloa koe ma sukesuke ki mataupu penā fakatasi mo te fesoasoani o te Watch Tower Publications Index io me ko te Research Guide for Jehovah’s Witnesses. A te faiga o sukesukega ‵loto ki te Tusi Tapu e mafai o fakamalosi i ei tou fakatuanaki kae fesoasoani atu ke “maua ne koe te iloaga o te Atua.” (Faata. 2:​4, 5) Ke sau‵tala nei tatou ki nai muna‵tonu ‵loto mai te Tusi Tapu kolā e mafai o iloilo ne tatou.

6. (a) Se a te ‵kese o te palani mo te fuafuaga? (e) Kaia e mafai ei o fai atu me i te fuafuaga a Ieova mō tino mo te lalolagi e tumau ki te “se-gata-mai”? (Efeso 3:11)

⁶ Ke mafaufau ki pati i te Tusi Tapu e uiga ki te fuafuaga a te Atua. E isi se ‵kesega i te pati palani mo te fuafuaga. A te palani e pelā me se auala mautinoa telā e takitaki atu ei koe ki te koga e manako koe o fano ki ei. Kae e mafai o se taunu se palani māfai ko ‵pono mai se mea i te auala. A te fuafuaga e fakasino ki te koga e ma‵nako tatou ke olo ki ei. E iloa ‵lei ne tatou te koga e fia olo tatou ki ei, kae e seki fakatoka te auala ke olo i ei. E mafai o fai ne fakama‵fuliga ki ei māfai e manakogina. E fakafetai tatou me ne fakaasi malielie mai ne Ieova tena “fuafuaga se-gata-mai” e auala i te Tusi Tapu. (Onoono ki te fakamatalaga mō sukesukega i te Efeso 3:11.) Faitalia me se a te auala e fakataunu i ei, e manuia faeloa a ia me “ne fai ne Ieova ke ga‵lue a mea katoa mō tena fuafuaga.” (Faata. 16:4) Kae ka tumau ki te se-gata-mai a ikuga o mea e fai ne Ieova. Se a te fuafuaga a Ieova, kae ne a fakama‵fuliga ne fai ne ia ke fakataunu ei tena fuafuaga?

7. Mai tua o te ‵tekeatuga a tino muamua, ne fakamafuli pefea ne Ieova te auala ke fakataunu ei tena fuafuaga? (Mataio 25:34)

⁷ Ne fai atu ne te Atua ki tino muamua eiloa a tena fuafuaga mō lāua. Ne ‵tau mo lāua o “fanafanau kae ke fakatokouke, faka‵fonu te lalolagi kae pule atu . . . ki ika o te tai mo manu eva o te lagi mo mea ola katoa” i te lalolagi. (Kene. 1:28) I te taimi ne ‵teke atu a Atamu mo Eva, kae fai ei ke agasala a tino katoa, ne seki mafuli eiloa te fuafuaga a Ieova. Ne fakamafuli fua ne ia te auala ka fakataunu i ei. I konā loa, fakaiku aka ei ne ia ke fakatu se Malo i te lagi telā ka fakataunu i ei tena fuafuaga muamua eiloa mō tino mo te lalolagi. (Faitau te Mataio 25:34.) I te taimi tonu o ia, ne uga mai ne Ieova mo te alofa a tena Tama toekimua ki te lalolagi ke akoako a tino e uiga ki te Malo kae ke tuku atu tena ola ke faka‵sao ei tatou mai te agasala mo te mate. Mai tua ifo, fakatu aka ei a Iesu mai te mate kae toe foki atu ki te lagi ke pule mai pelā me se Tupu i te Malo o te Atua. Kae koi uke eiloa a mea e ‵tau o mafaufau ‵loto ki ei e uiga ki te fuafuaga a Ieova.

8. (a) Se a te matua o te Tusi Tapu? (e) E ‵tusa mo te Efeso 1:​8-11, se a te fuafuaga tāua a Ieova? (Onoono ki te ata i te ‵kava.)

⁸ A te matua o te Tusi Tapu ko te fakamalugāga o te igoa o Ieova i te taimi e fakataunu ei tena fuafuaga mō te lalolagi e auala i te Malo telā e pule ne Keliso. E se mafai o mafuli te fuafuaga a Ieova. Ko oti ne fakamautinoa mai ne ia me ka fakataunu eiloa tena fuafuaga mo te manuia. (Isa. 46:​10, 11, fml.; Epe. 6:​17, 18) Fakamuli loa, ka ‵fuli te lalolagi ki se palataiso, telā e ‵nofo i ei a tino ‵lei katoatoa kae amio‵tonu kolā ne ‵tupu mai i a Atamu mo Eva, kae fia‵fia ki te “olaga ki te se-gata-mai.” (Sala. 22:26) Kae e se tenā fua te mea ka fakataunu ne Ieova. A tena fuafuaga tāua ko te faiga ke ‵kau fakatasi ana mea ola katoa i te lagi mo te lalolagi. Tenā ko faka‵logo ei mo te fakamaoni a tino ola katoa ki a ia e pelā me ko te lotou Pule Tafasili i te Maluga. (Faitau te Efeso 1:​8-11.) E a, e fakaofoofogia ki a koe a te auala gali e fakataunu ei ne Ieova tena fuafuaga?

9. Mai te fai‵tau ki te Tusi Tapu, e pefea te ‵mao o mea e lavea ne tatou i aso mai mua?

⁹ Mafaufau ki te valoaga ne fai ne Ieova i te fatoaga o Etena, telā ne tusi i te Kenese 3:15. b Ne fakasino atu ki mea kolā ka fakataunu i ei  tena fuafuaga kae ka ‵tupu i se fia afe tausaga fakamuli ifo. E aofia i mea konei ko te tama telā ka vau i a Apelaamo, ko te gafa telā e tau atu ki te fanaumaiga o te Keliso. (Kene. 22:​15-18) Kae i te 33 T.A., ne pakia te mulivae o Iesu, e ‵tusa mo te mea ne ‵valo mai. (Galu. 3:​13-15) A te vaega fakaoti o te valoaga tenā, telā ko te taimi ka tuki pala ei te ulu o Satani, ka fakataunu i se 1,000 tupu tausaga fakamuli loa. (Faka. 20:​7-10) Kae koi uke a mea e fakaasi mai i te Tusi Tapu ki te ikuga i te va o te fakanofonofoga a Satani mo te fakapotopotoga a Ieova.

10. (a) Ne a mea ko pili o ‵tupu i aso mai mua? (e) E fakatoka pefea ne tatou a ‵tou mafaufau mo loto? (Onoono ki te fakamatalaga mai lalo.)

¹⁰ Mafaufau ki mea fakaofoofogia konei ne ‵valo mai i te Tusi Tapu. Muamua la, ka folafola atu ne atufenua me “ko filemu kae tokagamalie a mea katoa!” (1 Tesa. 5:​2, 3) I konā loa, ko te mea loa ko kamata “fakapoi” a te fakalavelave lasi māfai ko taua atu a atufenua ki lotu ‵se katoa. (Faka. 17:16) Mai tua i ei, ka mafai o lavea atu i se auala fakaofoofogia a “te Tama a te tagata e vau i kaumana o te lagi mo tena ‵malu sili.” (Mata. 24:30) Ka fakaoko atu ne Iesu te fakamasinoga ki tino, kae vaevae aka ei a mamoe mai kouti. (Mata. 25:​31-33, 46) Kae ko Satani ka se nofo malie. Ona ko tena kaitaua, ka fakaoso ne ia a atufenua ‵kau fakatasi telā e taku i te Tusi Tapu me ko Koka mai te fenua o Makoka, ke taua atu ki tino tapuaki ‵ma o Ieova. (Eseki. 38:​2, 10, 11) E isi se taimi, ka fakamaopoopo ei te ‵toega o te kau fakaekegina ki te lagi ke ‵kau fakatasi mo Keliso mo tena kautau faka-te-lagi ke taua i te taua o Amaketo, ko te taua fakaoti eiloa o te fakalavelave lasi. c (Mata. 24:31; Faka. 16:​14, 16) Tenā ko kamata ei te Pulega a Keliso i te Afe Tausaga i te lalolagi nei.—Faka. 20:6.

11. Se a te uiga o te fakamoemoega ke ola ki te se-gata-mai ki a koe? (Onoono foki ki te ata.)

¹¹ Nei la, ke kilo ‵mao koe ki aso mai mua, māfai ko palele atu te 1,000 tausaga. E fai mai te Tusi Tapu me i te ‵tou Mafuaga “ko oti foki ne tuku atu ne ia a te se-gata-mai ki [otou]  loto.” (Fai. 3:11) Mafaufau ki te uiga o te mea tenā ki a koe mo tou fesokotakiga mo Ieova. E fakaasi mai i te tusi Draw Close to Jehovah, itulau 319, a te manatu gali tenei: “Mai tua o se fia selau, afe, miliona, ke oko ki se piliona tausaga ne ola i ei tatou ka uke atu ‵tou mea e iloa e uiga ki a Ieova te Atua i lō mea e iloa nei ne tatou. Kae koi uke eiloa a mea fakaofoofogia kae ‵gali e mafai o tauloto ne tatou e uiga ki a ia. . . . E faigata ke fakaataata ne tatou a te gali o te ola ki te se-gata-mai—kae ko te ‵toe mea tafasili i te gali me ko mafai o fakapili‵pili malosi atu tatou ki a Ieova.” I te taimi tenei e fai ei ‵tou sukesukega ki te Muna a te Atua, ne a nisi mea ka mafai o iloilo ne tatou?

12. E mafai pefea o ‵kilo ‵loto tatou ki luga i te lagi? Taku mai se fakaakoakoga.

¹² E fakaasi malie mai i te Muna a te Atua se ata foliki o te koga nofo o Ieova “i te koga maluga i luga.” (Isa. 33:5) E fakaasi mai i te Tusi Tapu a mea fakaofoofogia e uiga ki a Ieova mo te vaega faka-te-lagi o tena fakapotopotoga. (Isa. 6:​1-4; Tani. 7:​9, 10; Faka. 4:​1-6) E pelā mo mea e mafai o fai‵tau tatou ki ei e uiga ki mea fakaofoofogia ne lavea ne Esekielu i te taimi “ne matala te lagi kae ne kamata o lavea ne [ia] a fakaasiga mai i te Atua.”—Eseki. 1:1.

13. Ne a mea e ‵gali ki a koe e uiga ki te tulaga o Iesu i te lagi, e ‵tusa mo te Epelu 4:​14-16?

¹³ Mafaufau foki ki te tulaga o Iesu i te lagi e pelā me ko te ‵tou Tupu telā ko pule mai nei mo te ‵tou Faitaulaga Sili alofa atafai. E auala i a ia e mafai o olo atu tatou ki te “nofogaaliki o te alofa tauanoa” o te Atua e auala i ‵talo kae fakamolemole atu mō tena alofa fakamagalo mo tena fesoasoani “i te taimi tonu.” (Faitau te Epelu 4:​14-16.) Ke mo a loa e fakaseke se aso e aunoa mo te mafaufau ‵loto ki mea ne fai ne Ieova mo Iesu mo mea e fai nei ne lāua mō tatou i te lagi. A te lā a‵lofa mō tatou e ‵tau o  fai ei ke otia malosi ‵tou loto kae fakamalosi mai ke loto finafinau tatou i ‵tou taviniga mo ‵tou tapuakiga ki a ia.—2 Koli. 5:​14, 15.

14. Se a te ‵toe mea ‵lei e tasi e mafai o fai ne tatou ke fakaasi atu te lasi o te loto fakafetai ki a Ieova mo Iesu? (Onoono foki ki ata.)

¹⁴ E tasi o toe auala ‵lei ke fakaasi atu te ‵tou loto fakafetai ki te ‵tou Atua mo tena Tama ko te taumafai ke fesoasoani atu ki nisi tino ke fai pelā me ne Molimau a Ieova mo soko o Iesu. (Mata. 28:​19, 20) Tenei te mea ne fai ne te apositolo ko Paulo ona ko te loto fakafetai ki te Atua mo Keliso. Ne iloa ne ia me ko te loto eiloa o Ieova “ke faka‵sao a vaegā tino katoa kae ke iloa tonu ne latou a te munatonu.” (1 Timo. 2:​3, 4) Ne galue malosi a ia i te galuega talai ke fesoasoani ki tino e tokouke ko te mea “ke mafai o faka‵sao ne [ia] a nisi o latou i so se auala.”—1 Koli. 9:​22, 23.

15. E ‵tusa mo te Salamo 1:​2, ne a mea ka fai ei tatou ke fia‵fia?

¹⁵ Ne fakamatala mai ne te faisalamo me i te tino fiafia kae manuia ko te tino telā “e fiafia . . . ki te tulafono a Ieova” kae “mafaufau ‵loto a ia ki Tena tulafono i te ao mo te po.” (Sala. 1:​1-3; fml.) I ana pati i tena tusi ko te Studies in the Psalms e uiga ki te fuaiupu tenei, ne fai mai a Joseph Rotherham me e ‵tau mo te tino o “manako malosi ki te takitakiga a te Atua ko fai ei ke ‵sala a ia ki ei, sukesuke ki ei, kae fakaaoga a taimi e uke o mafaufau ‵loto ki ei.” Ne toe fai mai a ia me e mafai ne se tino faitau ki te Tusi Tapu o “fakamānumanu ma seke se aso kae seki faitau a ia ki te poto telā e maua i ei.” E mafai o fiafia koe māfai e sukesuke ki te Tusi Tapu kae fakatāua a fakamatalaga ‵loto mai i ei kae kilo atu ki te auala e soko ei a mea katoa konā. Se mea fakafiafia eiloa māfai e iloilo ne koe a feitu katoa o te Muna a te Atua!

16. Ne a mea ka sau‵tala tatou ki ei i te suā mataupu?

¹⁶ A muna‵tonu ‵gali kolā e akoako mai ne Ieova ki a tatou e auala i tena Muna e se tō faiga‵ta ke malamalama tatou i ei. I te suā mataupu, ka mafau‵fau tatou ki se munatonu ‵loto e tasi—ko te faletapu faka-te-agaga sili o Ieova, telā ne fakamatala ne Paulo i tena tusi ki Kelisiano Epelu. Ke na maua eiloa ne koe te fiafia sili mai te iloilo aka te mataupu tenā.