1. E iloa pefea ne tatou me i te faiga o soko se galuega e faka‵sao ei a ola o tino?

A TE faiga o soko se galuega e faka‵sao ei a ola o tino! E iloa pefea ne tatou? A te fakatonuga a Iesu telā e tusi i te Mataio 28:19, 20, ne fai mai a ia: “Olo, . . . o fai a tino mo fai a soko . . . , kae papatiso atu latou.” Kaia e tāua ei a te papatisoga? A te papatisoga se mea telā e manakogina ke mafai o ‵sao tatou. E ‵tau o talitonu a te tino telā ka papatiso me mafai fua o maua ne ia a te fakaolataga e auala i te mate o Iesu telā ne ofo mai mō tatou, e pelā foki mo tena toetuga. Tenā te pogai ne fai atu ei a te apositolo ko Petelu ki taina Kelisiano: “A te papatisoga e faka‵sao foki ei koutou . . . e auala i te toetu o Iesu Keliso.” (1 Pe. 3:21) Tela la, kafai ko papatiso se soko fou, ko mafai o maua ne ia te fakamoemoega ke fakasao a ia.

2. E pelā me ne faiakoga, ne a mea e fakamalosi mai ne te 2 Timoteo 4:1, 2 ke fai ne tatou?

² E ‵tau mo tatou o “apo i te faiga o akoakoga” ke mafai o fai a soko. (Faitau te 2 Timoteo 4:1, 2.) Kaia? Me ne fakatonu mai a Iesu ki a tatou: “Olo, . . . o fai a soko . . . , akoako atu latou.” Ne fai mai te apositolo ko Paulo ke “tumau” i te galuega tenā, “me kafai e fai ne koe a mea konei ka fakasao ne koe a koe eiloa mo latou kolā e faka‵logo ki a koe.” Ona ko te mea tenā, ne fai mai a Paulo: “Saga faka‵lei faeloa . . . ki au akoakoga.” (1 Timo. 4:16) Ona ko te mea e isi se sokoga i te akoako atu mo te faiga o soko, e ma‵nako tatou ke fai ‵tou akoakoga e pelā me ko ‵toe akoakoga ‵lei.

3. Ne a mea ka sau‵tala tatou ki ei e uiga ki te faiga o akoga faka-te-Tusi Tapu i te mataupu tenei?

³ E akoako faeloa ne tatou a muna‵tonu i te Tusi Tapu ki te fia miliona o tino. Kae pelā mo te mataupu mai mua, e fia iloa ne tatou a te auala e mafai o fesoasoani atu ki tino e tokouke ke fai mo fai  ne soko papatiso o Iesu Keliso. I te mataupu tenei, ka onoono tatou ki nisi mea aka e lima kolā e ‵tau o fai ne faiakoga katoa ke fesoasoani atu ki se tino akoga ke papatiso.

4. Kaia e ‵tau ei o loto pulea se faiakoga i te taimi e fai ne ia se akoga faka-te-Tusi Tapu? (Onoono foki ki te fakamatalaga mai lalo.)

⁴ E fia‵fia malosi tatou ki mea e akoako atu ne tatou mai te Muna a te Atua. Kae mafai o fai ei ke fai‵pati tatou i se taimi leva ‵ki ki mea e fia‵fia malosi tatou ki ei. Tela la, kafai e fai ne koe te Sukesukega ki te Faleleoleo Maluga, te Akoga a te Fakapotopotoga ki te Tusi Tapu, e se ‵tau mo koe o fakaukeuke au pati. Ko te mea ke fakaaoga te Tusi Tapu ke akoako atu, e ‵tau mo te faiakoga o loto pulea, ke mo a ma fakamatala ne ia a mea katoa e iloa ne ia e uiga ki se fuaiupu i te Tusi Tapu io me se mataupu. * (Ioa. 16:12) Ke faka‵tusa ne koe te uke o au mea ne iloa i te Tusi Tapu i te taimi ne papatiso ei koe mo mea ko iloa ne koe i te taimi nei. Kāti i te taimi tenā, ne malamalama fua koe i akoakoga fakavae. (Epe. 6:1) A mea kolā ko iloa ne koe i te aso nei, ne tauloto ne koe i loto i se fia tausaga, tela la, ke mo a ma akoako ne koe a mea katoa loa konā i se taimi e tasi ki tau tino akoga fou.

5. (a) E ‵tusa mo te 1 Tesalonia 2:13, se a te mea e ma‵nako tatou ke iloa ne te tino akoga e uiga ki tena akoga? (e) E fakamalosi pefea ne tatou se tino akoga ke faipati atu ki nisi tino e uiga ki ana mea ne tauloto?

⁵ E ma‵nako tatou ke malamalama te tino akoga me i mea e tauloto ne ia e maua i te Muna a te Atua. (Faitau te 1 Tesalonia 2:13.) E fai pefea ne tatou te mea tenā? Fakamalosi ki te tino akoga ke faipati ki nisi tino e uiga ki mea e tauloto ne ia. I lō te fakamatala atu faeloa ne koe a fuaiupu i te Tusi Tapu ki te tino akoga, fai atu ki ei ke fakamatala mai ne ia a nisi tusi i te Tusi Tapu ki a koe. Fai ke lavea ne te tino akoga a te aoga o te Muna a te Atua ki a ia. Fai atu ne fesili kolā ka mafai o fai ei ke fakaasi mai ne ia a mea i tena loto—ko ana mafaufauga mo ana lagonaga e uiga ki tusi fai‵tau ne faitau a ia ki ei. (Luka 10:25-28) E pelā me se fakaakoakoga, fesili atu ki a ia: “Ne fesoasoani atu pefea te tusi faitau tenei ki a koe ke lavea ne koe se uiga o Ieova i ei?” “E aoga pefea ki a koe te munatonu tenei mai te Tusi Tapu?” “Ne a ou lagonaga ki mea ne fatoa tauloto ne koe?” (Faata. 20:5) A te mea telā e sili i te tāua, e se ko te uke o mea a te tino akoga e iloa, kae ko te lasi o tena fiafia ki ana mea ne tauloto kae fakagalue ne ia.

6. Kaia e ‵lei i ei ke ave ne tatou se faiakoga apo ma olo tatou o fai ‵tou akoga faka-te-Tusi Tapu?

⁶ Kafai e fai sau akoga faka-te-Tusi Tapu, e mata e ave ne koe a tino talai kolā ne faiakoga apo? Kafai e penā loa, fesili atu ki a latou me ne a olotou manatu e uiga ki te auala e fai ei ne koe te akoga, kae e mata e lasi te taimi e fakaaoga  i ei ne koe te Tusi Tapu ke akoako atu. Kafai e manako koe o fai pelā me se faiakoga apo, e ‵tau mo koe o loto maulalo. (Fakatusa ki te Galuega 18:24-26.) Kafai ko oti, fesili atu ki te tino talai apo, me mata e lavea ne ia me i te tino akoga e malamalama i ana mea ne tauloto. E mafai foki o fesili atu koe ki te tino talai tenā, ke fai ne ia te akoga tenā māfai e galo koe mō se taimi tai leva. Ka fai ei ke tumau eiloa te faiga o te akoga kae ke lavea foki ne te tino akoga a te tāua ke fai faeloa a tena akoga. Ke mo a eiloa e mafaufau me i te akoga tenei i a “koe” kae seai se suā tino e mafai o fai ne ia. E se gata i ei, e manako koe ke maua ne tau tino akoga a ‵toe mea ‵lei ko te mea ke gasolo faeloa a ia ki mua i tena taulotoga ki te munatonu.

7. Ne a mea ka fesoasoani atu ki te tino akoga ke fiafia malosi ki ana mea e tauloto?

⁷ E ‵tau o lavea ne te tino akoga a tou loto finafinau kae ke lagona foki ne ia me mautinoa i a koe a muna‵tonu kolā e maua i te Tusi Tapu. (1 Tesa. 1:5) Ka fai ei ke fiafia malosi a ia ki ana mea e tauloto. Kafai e ‵lei, fai atu ki a ia a te auala ne aoga ei ki a koe a te ola e ‵tusa mo fakatakitakiga a te Tusi Tapu. Tenā ko iloa i ei ne ia me maua i te Tusi Tapu a manatu aoga kolā e mafai foki o aoga ki a ia.

8. Ne a mea e mafai o fai ne koe ke momea aka te ‵lei o te faiga o te akoga faka-te-Tusi Tapu kae kaia e fai ei ne koe penā?

⁸ I te taimi e fai ei te akoga faka-te-Tusi Tapu, fakamatala atu ki tau tino akoga a tala ‵tonu o tino kolā ne fe‵paki mo fakalavelave e tai ‵pau mo ia kae ne manumalo latou i ei. E mafai o olo mo koe ki te akoga se tino mai tau fakapotopotoga telā e mafai o aoga tena tala ki te tino akoga. Io me ‵sala ki ne tala fakamalosi loto i te jw.org i te fakasologa o mataupu ko te “E ‵Fuli ne te Tusi Tapu a Olaga o Tino.” * A mataupu mo vitio penā ka fesoasoani ki tau tino akoga ke lavea ne ia te aoga ke fakagalue ne ia a fakatakitakiga mai te Tusi Tapu i tena olaga.

9. E fakamalosi atu pefea a koe ki se tino akoga ke fakaasi atu ana mea ne tauloto ki ana kāiga mo ana taugasoa?

⁹ Kafai te tino akoga ko oti ne avaga, e mata, e kau mai foki tena avaga ki te akoga? Kafai e se kau mai, ‵kami mai a ia ke kau ki te akoga. Fakamalosi tau tino akoga ke fakaasi ana mea ne tauloto ki ana kāiga mo taugasoa. (Ioa. 1:40-45) E pefea la? E mafai o fesili atu koe: “Ka fakamatala atu pefea ne koe te munatonu tenei ki tou kāiga?” io me “Se a te tusi faitau ka fakaaoga ne koe ke fakamaoni atu a te manatu tenei ki tou taugasoa?” Mai te faiga penā, ko akoako ne koe te tino akoga ke fai pelā me se faiakoga.  Kae kafai ko toka a ia, ko mafai ei o kau a ia ki te galuega talai e pelā me se tino talai e seki papatiso. E mafai foki o fesili atu koe ki te tino akoga māfai e isi ne tino aka e iloa ne ia e fia sukesuke ki te Tusi Tapu. Kafai e isi, ke na fesokotaki atu ki te tino tenā kae fai atu me toka koe o fai sena akoga. Pei atu ki a ia te vitio Ne a Mea e Fai i se Akoga Faka-te-Tusi Tapu? *

10. E pelā mo te mea e fakamatala mai i te 1 Tesalonia 2:7, 8, e mafai pefea o fakaakoako atu se faiakoga ki a Paulo?

¹⁰ E ‵tau mo faiakoga o fakaasi atu te lotou fia‵fia tonu mo te lotou ‵saga tonu ki olotou tino a‵koga. ‵Kilo ki a latou e pelā me ko ou taina mo ou tuagane faka-te-agaga i aso fakamuli. (Faitau te 1 Tesalonia 2:7, 8.) E sē se mea faigofie ke tiaki ne latou olotou taugasoa i te lalolagi kae fai a ‵fuliga kolā e ‵tau o fai ke tavini atu ki a Ieova. E ‵tau o fesoasoani atu tatou ke maua olotou taugasoa ‵tonu i te fakapotopotoga. Ke fai koe mo fai se taugasoa o tau tino akoga mai te fakaaoga a taimi e uke fakatasi mo ia, e se i te taimi fua e fai ei tena akoga faka-te-Tusi Tapu kae penā foki i nisi taimi. A te telefoni atu, te lafo atu o se fekau, io me se asiga toetoe i vasī o taimi e fai ei aulua akoga, e fakaasi atu ei me alofa tonu koe ki a ia.

11. Se a te mea e ma‵nako tatou ke maua ne ‵tou tino a‵koga i te fakapotopotoga kae kaia?

¹¹ E isi se tugapati: “E manakogina te fesoasoani o tino katoa i se fakai ke puti aka se tamaliki.” E mafai foki o fai atu tatou: “E manakogina te fesoasoani o te fakapotopotoga ke mafai o fai se soko.” Tenā te pogai e fakamasani ei ne faiakoga apo o te Tusi Tapu olotou tino a‵koga ki nisi tino i te fakapotopotoga kolā e mafai o fakamalosi atu ki a latou. Ko mafai ei ne tino akoga o ‵kau fakatasi mo tino o te Atua kolā e mafai o fesoasoani atu ki a latou i te feitu faka-te-agaga mo te feitu tau lagonaga. E ma‵nako tatou ke iloa ne tino a‵koga taki tokotasi me ia latou ne vaega o te fakapotopotoga kae aofia foki i te ‵tou kāiga faka-te-agaga. E ma‵nako tatou ke fakapilipili mai a ia ki te ‵tou kautaina faka-Kelisiano a‵lofa. Tenā ko faigofie ei ki a ia ke ‵kati tena fai taugasoa mo tino kolā e se fesoasoani atu ki a ia ke alofa ki a Ieova. (Faata. 13:20) Kafai ko ita ana taugasoa mua ki a ia, e iloa ‵lei ne ia me mafai o maua ne ia a taugasoa ‵tonu i te fakapotopotoga a Ieova.—Male. 10:29, 30; 1 Pe. 4:4.

12. Kaia e ‵tau ei o sau‵tala faeloa tatou ki ‵tou tino a‵koga e uiga ki te tāua o te tukuatuga faka-Kelisiano mo te papatisoga?

¹² Ke sau‵tala faeloa mo ia e uiga ki te tāua ke fai tena tukuatuga faka-Kelisiano kae papatiso. A te pogai e fai ei ne tatou a akoga faka-te-Tusi Tapu ko te fesoasoani atu ki tino ke fai mo fai ne  soko papatiso. I loto i se fia masina telā ne fai faeloa i ei se akoga faka-te Tusi Tapu kae maise mai ei māfai ko oti ne kamata o kau atu ki fakatasiga, e ‵tau o malamalama te tino akoga me i te pogai e fai ei te akoga faka-te-Tusi Tapu ko te fesoasoani atu ki a ia ke kamata o tavini ki a Ieova e pelā me se tokotasi o Ana Molimau.

13. Ne a mea e ‵tau o fai ne se tino akoga ke gasolo ki mua i te papatisoga?

¹³ E isi ne mea e ‵tau o fai ne se tino akoga ki te Tusi Tapu telā e manako ke papatiso a ia! Muamua la, ka iloa ne te tino akoga a Ieova kae alofa ki a ia kae fakatuanaki foki ki a Ia. (Ioa. 3:16; 17:3) Tenā ko kamata i ei o ati aka ne te tino akoga se va fakataugasoa mo Ieova kae penā foki loa mo taina mo tuagane i te fakapotopotoga. (Epe. 10:24, 25; Iako. 4:8) Fakamuli loa, ka ‵teke ne te tino akoga a amioga ma‵sei kae salamo ki ana agasala. (Galu. 3:19) I te taimi tenā e fakamalosi aka a ia ne tena fakatuanaki ke folafola atu te munatonu ki nisi tino. (2 Koli. 4:13) Ko fai ei tena tukuatuga ki a Ieova kae fakaasi atu tena tukuatuga e auala i te papatisoga. (1 Pe. 3:21; 4:2) Se aso fakafiafia eiloa tenā ki tino katoa! I te taimi e gasue malielie ei te tino akoga ki tena fakamoemoega, ke tuku atu a pati fakamālō aoga kae fakamalosi atu ki a ia ke tumau i te gasolo ki mua i te auala tonu.

14. E iloilo aka pefea ne se faiakoga a te gasolo ki mua o te tino akoga?

¹⁴ E ‵tau mo tatou o kufaki i te taimi e fesoasoani ei tatou ki se tino akoga ke gasolo ki mua ki tena tukuatuga mo tena papatisoga. Kae i nisi taimi e ‵tau foki o iloa ne tatou me mata e manako tonu eiloa a ia o tavini ki a Ieova te Atua. E mata, e isi me mea e lavea ne koe e fakamaoni mai ei i te tino akoga e taumafai o fakalogo ki fakatonuga a Iesu? Io me manako fua a ia o tauloto ki mea ‵gali mai te Tusi Tapu?

15. Ne a fakailoga e mafai ei o lavea ne te faiakoga a te gasolo ki mua o te tino akoga?

¹⁵ Ke iloilo faeloa a te gasolo ki mua o te tino akoga. E pelā me se fakaakoakoga e mata e fakaasi mai ne ia ana lagonaga e uiga ki a Ieova? E mata, e ‵talo a ia ki a Ieova? (Sala. 116:1, 2) E mata, e fiafia a ia ki te faitauga ki te Tusi Tapu? (Sala. 119:97) E mata, e kau faeloa a ia ki fakatasiga? (Sala. 22:22) E mata, e isi ne ‵fuliga ko oti ne fai ne ia ki tena olaga? (Sala. 119:112) E mata, ko oti ne kamata o faipati atu a ia ki ana kāiga mo taugasoa e uiga ki ana mea ne tauloto? (Sala. 9:1) Kae sili atu i ei, e mata e manako a ia ke fai pelā me se tokotasi o Molimau a Ieova? (Sala. 40:8) Kafai e se gasolo ki mua a te tino akoga i feitu konei, fai ke iloa ne koe te pogai  ke sau‵tala mo ia e uiga ki te mea tenā kae faipati atu faka‵lei ki ei. *

16. Ne a fakailoga e iloa atu ei me ko ‵tau o taofi aka se akoga faka-te-Tusi Tapu?

¹⁶ Ke iloilo faeloa ne koe me e mata koi ‵tau o tumau te faiga o te akoga mo se tino. Fesili ifo ki a koe: ‘E mata, e se ti fakatoka sāle a te tino akoga ki tena akoga? E mata, e se fiafia a ia o kau ki fakatasiga? E mata, koi fai faeloa ne ia amioga sē ‵lei? E mata, koi kau atu a ia ki se lotu ‵se?’ Kafai a te tali ko te ao, a te tumau i te faiga o tena akoga e ‵pau eiloa mo te akoako ne koe se tino telā e se manako o ‵siu ke iloa ne ia o ‵kau! Kafai e se fiafia tonu a te tino akoga ki ana mea ne tauloto kae e se manako foki o fai a ‵fuliga, e mata, koi ‵tau o fakatumau te faiga o tena akoga?

17. E ‵tusa mo te 1 Timoteo 4:16, ne a mea e ‵tau o fai ne faiakoga o te Tusi Tapu katoa?

¹⁷ A te tiute o tatou o fai a soko se mea tāua ‵ki, kae ma‵nako tatou o fesoasoani ki ‵tou tino a‵koga ke ga‵solo ki mua kae papatiso. Tenā te pogai e fakaaoga faeloa ne tatou te Tusi Tapu ke akoako atu, kae ka akoako atu tatou mo te loto finafinau mo te mautinoa. Ka fakamalosi tatou ki te tino akoga ke fai taugasoa mo tino i te fakapotopotoga. Kae ka sau‵tala faeloa tatou ki te faiga o te tukuatuga mo te papatisoga, mai te iloilo faeloa ne tatou te gasolo ki mua o te tino akoga. (Onoono ki te pokisi “ Mea e ‵Tau o Fai ne Faiakoga ke Takitaki a Tino A‵koga ki te Papatisoga.”) E fia‵fia tatou me mafai o ‵kau tatou ki te galuega telā e faka‵sao i ei a ola o tino! Ke na fakaiku aka ne tatou ke fai te ‵toe mea e mafai o fai ke fai a akoga faka-te-Tusi Tapu kolā ka iku atu ki te papatisoga.