1-2. Kaia e mafai ei o mafau‵fau tatou me e se tali mai ne Ieova a ‵tou ‵talo?

 “‵SALA ke maua te fiafiaga sili i a Ieova, kae ka tuku atu ne ia a manakoga o tou loto.” (Sala. 37:4) Ko oko loa i te gali te tautoga tenā! Kae e mata, e ‵tau o fakamoe‵moe tatou ke tuku fakavave mai ne Ieova a mea katoa e fakamolemole atu tatou ki ei? Kaia e fesili atu ei tatou penā? Mafaufau ki tulaga konei. E ‵talo atu se tuagane taka ko te mea ke kau atu a ia ki te Akoga mō Tino Talai o te Malo. Kae ne ‵seke te fia o tausaga, kae seki ‵kami eiloa a ia. E fakamolemole atu se taina talavou ki a Ieova ke fakafeoloolo tena masaki ke mafai o uke ana mea e fai i te fakapotopotoga. Kae e tumau loa tena masaki. E ‵talo atu a mātua Kelisiano ke tumau te lā tamaliki i te munatonu. Kae fakaiku aka ne te lā tamaliki ke se tavini a ia ki a Ieova.

² Kāti ko oti foki ne fakamolemole koe ki a Ieova ki se mea, kae seki maua eiloa ne koe. Ona ko te mea tenā, ko fakaiku aka ne koe me i a Ieova e tali atu fua ki ‵talo a nisi tino kae e se ko au ‵talo. Io me ko mafaufau koe me kāti e isi sau mea ‵se ne fai. Konā foki a lagonaga o te tuagane ko Janice. b Ne ‵talo atu lāua mo tena avaga e uiga ki te lā manakoga ke tavini atu i te Peteli. Ana muna: “Ne talitonu au me ko pili fua o ‵kami māua ke ga‵lue i te Peteli.” Kae ne ‵seke te fia masina mo te fia tausaga, kae seki ‵kami eiloa te tauavaga konei ki te Peteli. Muna a Janice: “Ne fanoanoa au kae ‵numi foki. Ne mafaufau au me se a taku mea ‵se ne fai ke fakafanoanoa atu ki a Ieova. Ne ‵talo fakapitoa au ki a ia mō tena takitakiga. Kaia ne seki tali ei ne ia taku ‵talo?”

3. Ne a mea ka sau‵tala tatou ki ei i te mataupu tenei?

 ³ Nisi taimi ko mafau‵fau tatou me e mata, e lagona ne Ieova ‵tou ‵talo? Konā foki a mafaufauga ne oko ki nisi tagata fakamaoni i aso mua. (Iopu 30:20; Sala. 22:2; Sapa. 1:2) Ne a mea e mafai o fakatalitonu atu ki a koe me ka tali mai eiloa a Ieova ki au ‵talo? (Sala. 65:2) Ke tali aka te fesili tenā, e ‵tau o tali aka muamua ne tatou a fesili konei: (1) Ne a mea e fakamoe‵moe tatou ke fai ne Ieova? (2) Ne a mea e fakamoemoe a Ieova ke fai ne tatou? (3) Kaia e ‵tau ei o ‵fuli a nisi manakoga o tatou?

4. E ‵tusa mo te Ielemia 29:​12, se a te mea ne tauto mai a Ieova me ka fai ne ia?

⁴ Ne tauto mai a Ieova me ka fakalogologo a ia ki ‵tou ‵talo. (Faitau te Ielemia 29:12.) E alofa a te Atua ki ana tino tapuaki fakamaoni, tela la, e saga atu faeloa a ia ki olotou ‵talo. (Sala. 10:17; 37:28) Kae e se fakauiga i ei me ka talia ne ia a ‵tou fakatagi katoa. Kāti e ‵tau o faka‵tali tatou ki te lalolagi fou ke maua a nisi mea kolā ne fakamolemole tatou ki ei.

5. Ne a mea e masaua ne Ieova māfai e fakalogologo mai ki ‵tou ‵talo? Fakamatala mai.

⁵ E masaua ne Ieova tena fuafuaga māfai e fakalogologo mai ki ‵tou ‵talo. (Isa. 55:​8, 9) A te vaega e tasi o te fuafuaga tenā ko te faka‵fonuga o te lalolagi ki tāgata mo fāfine kolā e fia‵fia o faka‵logo ki tena pulega. Kae e fai mai Satani me e sili atu i te ‵lei māfai e pule atu a tino ki a latou eiloa. (Kene. 3:​1-5) Ko te mea ke fakamaoni aka te ‵se o pati a te Tiapolo konā, ne talia ei ne Ieova ke pule atu a tino ki a latou eiloa. Kae lavea ne tatou me i fakalavelave e uke e fe‵paki mo tatou i aso nei e māfua mai fua i pulega a tino. (Fai. 8:9) E malama‵lama tatou me ka se faka‵lei aka ne Ieova a fakalavelave katoa konei i te taimi nei. Kafai e faka‵lei aka ne ia, ka mafau‵fau a nisi tino me e aoga eiloa a pulega a tāgata, me mafai ne latou o faka‵lei aka a fakalavelave o tino.

6. Kaia e ‵tau ei o tali‵tonu tatou me ka fai faeloa ne Ieova a mea i se auala alofa kae tonu?

⁶ E mafai o ‵kese a tali a Ieova ki ‵talo kolā e ‵tai ‵pau. I te taimi ne masaki malosi ei a te tupu ko Hesekia, ne fakamolemole atu a ia ki a Ieova ke faka‵lei aka tena masaki. Ne tali atu a Ieova mai te faka‵leiga o tena masaki. (2 Tupu 20:​1-6) I te suā feitu, i te taimi ne fakatagi atu te apositolo ko Paulo ki a Ieova ke tapale kea‵tea te “mea makaikai” i tena foitino, kāti se masaki, kae ne seki faka‵lei ne Ieova te masaki tenā. (2 Koli. 12:​7-9) Mafaufau foki ki te apositolo ko Iakopo mo Petelu. Ne tamate katoa lāua ne te tupu ko Helota. Ne ‵talo te fakapotopotoga mō Petelu kae kāti mō Iakopo foki. Kae ui ei, ne tamate eiloa a Iakopo, kae ne sao a Petelu i se auala fakavavega. (Galu. 12:​1-11) Kāti ka mafau‵fau tatou, ‘Kaia ne fakasao ei ne Ieova a Petelu kae e se ko Iakopo?’ E seai se fakamatalaga a te Tusi Tapu ki ei. c A te mea fua telā e mautinoa i a tatou me e fai ne Ieova a te “fakamasinoga tonu.” (Teu. 32:4) Kae iloa ne tatou me maua ne Petelu mo Iakopo te taliaga a Ieova. (Faka. 21:14) I nisi taimi, kāti a te tali e maua ne tatou ko te mea e seki fakamoe‵moe tatou ki ei. Kae ona ko te ‵tou tali‵tonu me fai faeloa ne Ieova a mea i se auala alofa kae tonu, tela la, e se fameo eiloa tatou ki te auala e tali mai ei a ia ki ‵tou ‵talo.—Iopu 33:13.

7. Se a te mea e taumafai tatou ke ‵kalo kea‵tea mai ei, kae kaia?

⁷ E taumafai tatou ke mo a ma fakatusatusa ‵tou tulaga ki tulaga o nisi tino. Kāti e mafai o fakamolemole tatou ke fesoasoani mai a Ieova i se auala fakapito, kae seai se tali ki te ‵tou fakatagi tenā. Fakamuli ifo, ko iloa ne tatou me  isi se tino e tai ‵pau te mea ne ‵talo a ia ki ei, kae foliga mai me ne tali ne Ieova tena ‵talo. Tenā te mea ne tupu ki te tuagane ko Anna. Ne ‵talo tou fafine ke faka‵lei te masaki o tena avaga ko Matthew telā e kenisa. Kae e tokolua foki a tuagane Kelisiano ma‵tua e kenisa foki i te taimi tenā. Ne ‵talo malosi a Anna mō Matthew kae penā foki mō tuagane konā. Ne ‵lei a masaki o tuagane konā, kae ko Matthew ne mate. Muamua la, ne mafaufau a Anna me ne fesoasoani atu a Ieova ki tuagane konā ke ‵lei lāua. Kafai e tonu, kaia ne seki tali ei ne ia ana ‵talo ke ‵lei tena avaga? E tonu, e se mafai o iloa ne tatou a pogai ne ‵lei ei a tuagane konā. Kae e iloa ne tatou me e isi se auala ke faka‵lei katoatoa ei ne Ieova a ‵tou logo‵maega katoa, kae manako a ia o faka‵tu aka ana taugasoa kolā ko oti ne ‵mate.—Iopu 14:15.

8. (a) E ‵tusa mo te Isaia 43:​2, e fesoasoani mai pefea a Ieova ki a tatou? (e) E fesoasoani mai pefea a ‵talo māfai ko fe‵paki tatou mo tulaga faiga‵ta? (Onoono ki te vitio E Fesoasoani Mai a ‵Talo ke Mafai o Fa‵ki Tatou.)

⁸ A Ieova ka fesoasoani mai faeloa ki a tatou. E se manako a Ieova te ‵tou Tamana alofa ke lavea ne ia tatou e logo‵mae. (Isa. 63:9) Kae e se taofi foki ne ia mai i a tatou a tofotofoga katoa, kolā e mafai o fakatusa ki vaitafe io me ki ulaga afi. (Faitau te Isaia 43:2.) Kae ne tauto mai me ka fesoasoani mai a ia ke mafai o “fanatu koe i loto” i tofotofoga konā. Ka se talia foki ne ia ke fakamasei katoatoa ne ‵tou tofotofoga a tatou. E tuku mai foki ne Ieova ki a tatou a tena agaga tapu ke fesoasoani mai ke mafai tatou o kufaki. (Luka 11:13; Fili. 4:13) Ona ko te mea tenā, e mafai o tali‵tonu tatou me ka maua faeloa ne tatou a mea e manakogina ne tatou ke kufaki kae ke tumau i te fakamaoni ki a ia. d

9. E ‵tusa mo te Iakopo 1:​6, 7, kaia e ‵tau ei o tali‵tonu tatou me ka fesoasoani mai a Ieova?

⁹ E fakamoemoe a Ieova ke tali‵tonu tatou ki a ia. (Epe. 11:6) Nisi taimi, e mafai o foliga faigata ‵ki a ‵tou tofotofoga. E mafai o kamata tatou o fakalotolotolua ki te fesoasoani o Ieova ki a tatou. Kae e fakamautinoa mai i te Tusi Tapu me e auala i te malosi o te Atua ka mafai ne tatou “o eva mai luga o se ‵pui.” (Sala. 18:29) Tela la, sa talia a manatu fakalotolotolua, kae ke ‵talo tatou mo te fakatuanaki mo te talitonu katoatoa me ka tali mai ne Ieova a ‵tou ‵talo.—Faitau te Iakopo 1:​6, 7.

10. Fakamatala mai te auala e mafai o gasue‵sue tatou e ‵tusa mo ‵tou ‵talo.

¹⁰ E fakamoemoe a Ieova ke gasue‵sue tatou e ‵tusa mo ‵tou ‵talo. Kāti e fakamolemole atu se taina ki a Ieova ke fesoasoani atu ke talia tena fanoiga ke malōlō mai tena galuega ‵togi ke kau atu ki se fono lasi. Ka tali mai pefea ne Ieova te ‵talo tenā? Ka mafai o tuku atu ne ia a te loto malosi ki te taina tenā ke mafai o fanatu ki tena pule. Kae koi ‵tau eiloa mo ia o fai tena fanoiga. Kāti ka manakogina ke fokifoki atu a ia o fai tena fanoiga. Kāti e ‵tau o loto fiafia a ia ke sui ana taimi ga‵lue mo se isi tino i te galuega. Kae kafai e ‵tau, kāti ka manakogina ke malōlō a ia kae seai sena peofuga.

11. Kaia e ‵tau ei o ‵talo atu faeloa tatou e uiga ki mea e manavase ki ei?

¹¹ E fakamoemoe a Ieova ke ‵talo atu faeloa tatou e uiga ki mea e manavase ki ei. (1 Tesa. 5:17) E fakaasi mai i pati a Iesu me e isi ne fakatagi a tatou ka se tali mai i te taimi eiloa tenā. (Luka 11:9) Tela la, ke mo a ma ‵fiu vave! ‵Talo malosi kae ke ‵talo faeloa. (Luka 18:​1-7) Kafai e tumau tatou i te ‵talo faeloa e uiga ki se mea, ko fakaasi atu ne tatou ki a Ieova a te tāua o te fakatagi tenā. Ko fakaasi atu foki ne tatou a te  ‵tou fakatuanaki me mafai eiloa o fesoasoani mai a ia ki a tatou.

12. (a) Se a te fesili e tasi e ‵tau o fesili ifo ne tatou e uiga ki ‵tou fakatagi, kae kaia? (e) E fakamautinoa pefea ne tatou me e fakaasi atu ne tatou te āva ki a Ieova i ‵tou ‵talo? (Onoono ki te pokisi “ E Mata, e Lavea Atu Toku Āva ki a Ieova e Auala i Mea e Fakatagi Au ki ei?”)

¹² Kafai e seai se tali ki se mea ne fakatagi atu tatou ki ei i ‵tou ‵talo, e mafai o fesili ifo ne tatou a fesili e tolu konei. Tasi, ‘E mata, e ‵lei a te mea e ‵talo au ki ei?’ Se mea masani o mafau‵fau tatou me iloa ne tatou te ‵toe mea ‵lei mō tatou. Kae ko mea e fakatagi tatou ki ei e mafai o se aoga ki a tatou i se taimi leva. Kafai e ‵talo tatou e uiga ki se fakalavelave, kāti e isi se auala ‵lei atu ke faka‵lei ei te fakalavelave tenā i lō te mea ne ‵talo tatou ki ei. Kae ko nisi mea ne ‵talo tatou ki ei kāti e se fetaui mo te loto o Ieova. (1 Ioa. 5:14) E pelā mo te fakaakoakoga a mātua kolā ne ‵sae muamua mai, ne fakatagi atu lāua ki a Ieova ke puipui te lā tama ke tumau i loto i te munatonu. E foliga mai me e ‵lei ‵ki te fakamolemole tenā. Kae ko Ieova e se faimālō ne ia a tino ke tavini atu ki a ia. E manako a ia ke filifili ne tatou katoa, e aofia i ei a ‵tou tama‵liki, ke tapuaki atu ki a ia. (Teu. 10:​12, 13; 30:​19, 20) Tela la, e mafai ne mātua o fakamolemole ki a Ieova ke fesoasoani atu ke mafai o oko latou ki loto o olotou tama‵liki ke mafai o ga‵sue o fakaasi atu te alofa ki a Ieova kae ke fai mo fai Tena taugasoa.—Faata. 22:6; Efe. 6:4.

13. E ‵tusa mo te Epelu 4:​16, ko te taimi fea ka fesoasoani mai a Ieova ki a tatou? Fakamatala mai.

¹³ A te lua o fesili, ‘E mata, tenei te taimi tonu ke tali mai ne Ieova taku fakatagi?’ Kāti e ma‵nako fakavave tatou ki se tali ki ‵tou ‵talo. Kae e iloa ‵lei ne Ieova te taimi tonu ke fesoasoani  mai a ia. (Faitau te Epelu 4:16.) Kafai e se tali fakavave mai a Ieova ki ‵tou ‵talo, e mafai o mafau‵fau tatou me i tena tali ko te ‘Ikai.’ Kae kāti a tena tali ko te ‘Koi tuai.’ Mafaufau ki te taina talavou telā ne ‵talo ke faka‵lei tena masaki. Moi ne faka‵lei fakavavega ne Ieova a ia, penei ko kinau atu a Satani me e tavini atu faeloa te taina tenā ki a Ieova me ne faka‵lei ne ia tena masaki. (Iopu 1:​9-11; 2:4) Kae ko Ieova ko oti ne fakatoka ne ia te taimi ke faka‵lei i ei a ma‵saki katoa. (Isa. 33:24; Faka. 21:​3, 4) Ke oko atu ki te taimi tenā, e se fakamoe‵moe eiloa tatou ke faka‵lei fakavavega ne ia a ma‵saki. E mafai eiloa o fakamolemole atu te taina ki a Ieova ke tuku atu te malosi mo te filemu o te mafaufau ke kufaki a ia i tena masaki kae ke tumau i te tavini atu mo te fakamaoni ki te Atua.—Sala. 29:11.

14. Ne a au mea ne tauloto mai te tala o Janice?

¹⁴ Masaua te tala o Janice, telā ne ‵talo ke tavini atu a ia i te Peteli. Ne ‵seke a tausaga e lima kae fatoa malamalama a ia i te auala ne tali ei ne Ieova tena ‵talo. Ana muna: “Ne fakaaoga ne Ieova te taimi tenā ke akoako kae fakatonutonu ne ia au. Ne manakogina ke momea aka te lasi o toku talitonu ki a ia. Ne manakogina ke momea aka te ‵lei o aku sukesukega totino. Kae ne manakogina ke maua ne au te loto fiafia tonu, telā e se fakalagolago ki oku fakanofonofoga.” Fakamuli ifo, ne ‵kami a Janice mo tena avaga ke tavini atu i te seketi. Kafai e toe mafaufau ki ei, ne fai mai a Janice: “Ne tali eiloa ne Ieova aku ‵talo, kae e se i te auala ne fakamoemoe au ki ei. Ne manakogina se taimi tai mata leva ke lavea ne au te gali o tena tali, kae ko oko loa toku fiafia ke lavea ne au tena alofa mo tena atafai.”

15. Kaia e ‵lei ei i nisi taimi ke se taku ‵tonu atu i ‵tou ‵talo a te manakoga tonu o tatou? (Onoono foki ki ata.)

¹⁵ Te tolu o fesili, ‘E mata, e ‵tau o ‵talo au  mō se isi mea aka?’ E tiga loa e ‵lei ke taku ‵tonu atu i au ‵talo a te mea e manako koe ki ei, kāti ka mafai o iloa ne tatou a te loto o Ieova māfai e se taku ‵tonu atu a te manakoga tonu o tatou. Mafaufau ki te tala o se tuagane talavou telā ne ‵talo faeloa ke mafai o kau a ia ki te Akoga mō Tino Talai o te Malo. Ne manako a ia ke kau ki te akoga ko te mea ke mafai o tavini atu i se koga telā e manakogina i ei a tino talai. Tela la, i te taimi e ‵talo a ia ke mafai o kau atu ki te akoga, ne ‵talo foki a ia ki a Ieova ke fesoasoani atu ke iloa ne ia auala e mafai o fakalauefa aka i ei tena taviniga. (Galu. 16:​9, 10) Tenā ko gasue ei a ia e ‵tusa mo tena ‵talo tenā mai te fesili atu ki te ovasia o te seketi e uiga ki fakapotopotoga ‵pili mai kolā e manakogina ne latou ne paenia. Io me tusi atu ki te ofisa lagolago ke iloa ne ia a koga kolā e manakogina a tino talai o te malo. e

16. Se a te mea e mafai o tali‵tonu tatou ki ei?

¹⁶ E pelā mo mea ne tauloto ne tatou, e tali‵tonu tatou me ka tali mai ne Ieova a ‵tou ‵talo i se auala alofa kae fai mea tonu. (Sala. 4:3; Isa. 30:18) Nisi taimi kāti ka se tali mai a ia i te auala e ma‵nako tatou ki ei. Kae ko Ieova e se manatu māmā ki ‵tou ‵talo. E alofa malosi a ia ki a tatou. Kae ka se tuku tiaki ne ia tatou. (Sala. 9:10) Tela la, ke tumau i te “talitonu ki a ia i taimi katoa,” mai te fakaasi atu ki a ia e auala i ‵talo a mea katoa i tou loto.—Sala. 62:8.