1-2. Ne a mea ka fai ei ke talia ne te Atua te ‵tou tapuakiga?

 SE A te mea e mafaufau koe ki ei māfai ko lagona ne koe te pati “tapuaki”? Kāti e mafaufau koe ki se taina loto maulalo e totuli i tafa o tena moega kae fakaasi atu ne ia a mea katoa i tena loto e auala i se ‵talo. Io me kāti ko mafaufau koe ki se kāiga fia‵fia kolā e ‵saga malosi ki te lotou sukesukega ki te Tusi Tapu.

² I tulaga e lua konei, e aofia a tino katoa konā i se vaegā tapuakiga. E mata, ka talia ne Ieova te lotou tapuakiga? Ao, māfai e fetaui mo tena fuafuaga kae fai atu foki ne latou i se auala alofa kae āva. E a‵lofa malosi tatou ki a Ieova. E iloa ne tatou me e ‵tau o tapuaki atu tatou ki a ia, kae ma‵nako foki ke tuku atu te ‵toe tapuakiga ‵lei ki a ia.

3. Ne a mea ka mafau‵fau tatou ki ei i te mataupu tenei?

³ I te mataupu tenei, ka onoono tatou ki te vaegā tapuakiga telā ne talia ne Ieova i aso mua, kae ka onoono foki tatou ki vaega e valu o te tapuakiga telā e talia ne ia i aso nei. I te taimi e fai ei tatou penā, e mafai o mafau‵fau tatou ki te auala ke momea aka te ‵lei o te ‵tou tapuakiga. Ka onoono foki tatou ki pogai e fia‵fia ei tatou ona ko te tapuakiga tonu.

4. Ne fakaasi atu pefea ne tino tapuaki ki a Ieova i aso mai mua o te kau Kelisiano a te lotou āva mo te a‵lofa ki a Ieova?

⁴ I aso mai mua o te kau Kelisiano, ne fakaasi atu ne tāgata fakamaoni e pelā mo Apelu, Noa, Apelaamo, mo Iopu a te  lotou a‵lofa mo te āva ki a Ieova. E pefea la? E auala i te lotou faka‵logo, fakatuanaki mo olotou taulaga. E se fakamatala mai i te Tusi Tapu a mea likiliki ki te faiga o te lotou tapuakiga. Ne manino ‵lei me ne fai ne latou te ‵toe mea e mafai ke fakaaloalo atu ki a Ieova, kae ne talia ne ia te lotou tapuakiga. Oti aka, tuku atu ei ne Ieova a te Tulafono faka-Mose ki tino ne ‵tupu mai i a Apelaamo. Ne aofia i te fakasologa o tulafono konei a fakatonuga e uiga ki te tapuaki atu ki a Ieova i te auala telā e talia ne ia.

5. Se a te fakamafuliga ne fai ki te tapuakiga tonu mai tua o te mate mo te toetuga o Iesu?

⁵ Mai tua o te mate mo te toe‵tuga o Iesu, ne seki toe manako a Ieova ke faka‵logo a tino ki te Tulafono faka-Mose. (Loma 10:4) Ne ‵tau mo Kelisiano o faka‵logo ki se tulafono fou, ko “te tulafono a Keliso.” (Kala. 6:2) E mafai o faka‵logo latou ki te “tulafono” tenei, e se mai te tauloto mo te tau‵tali ki se fakasologa loa o mea e ‵tau mo mea e se ‵tau o fai, kae mai te tau‵tali atu ki te fakaakoakoga a Iesu mo ana akoakoga. I aso nei, e fai foki ne Kelisiano a te ‵toe mea e mafai ke faka‵logo ki te Keliso ko te mea ke fakafiafia atu ki a Ieova kae maua ne latou i ei “se malosi fou.”—Mata. 11:29.

6. Ka aoga pefea ki a tatou a te mataupu tenei?

⁶ I te taimi e mafau‵fau ei tatou ki vaega o te ‵tou tapuakiga, ke fesili ifo penei, ‘E mata, ne gasolo atu au ki mua i te feitu tenei?’ E mafai foki o fesili ifo koe penei, ‘E mata, e mafai o momea aka te ‵lei o taku tapuakiga?’ E mafai o fiafia koe ki au taumafaiga ko oti ne fai, kae ka fia ‵talo atu foki koe ki a Ieova e uiga ki so se feitu telā e ‵tau o momea aka tou ‵lei i ei.

7. Se a te kilokiloga a Ieova ki ‵tou ‵talo e fai mo te loto kātoa?

⁷ E tapuaki tatou ki a Ieova māfai e ‵talo atu tatou ki a ia. E fakatusa ne te Tusi Tapu a ‵tou ‵talo ki taulaga manogi ‵gali kolā ne fakatoka faka‵lei i te faleie tapu kae fakamuli ifo i te faletapu. (Sala. 141:2) A te taulaga manogi gali tenā e fakafiafia atu ki te Atua. I se auala tai ‵pau, a ‵tou ‵talo kolā e fai mo te loto kātoa se “mea fakafiafia” ki a ia, faitalia me e fakaaoga ne tatou a toe pati faigofie. (Faata. 15:8; Teu. 33:10) E maua ne tatou a pogai ‵tau ke tali‵tonu me e fakafiafia ki te loto o Ieova ke fakalogologo mai i te taimi e fakaasi atu ei te ‵tou a‵lofa mo te loto fia‵fia ki a ia. E manako a ia ke fakaasi atu ne tatou a ‵tou manavasega, ‵tou fakamoemoega, mo ‵tou manakoga. A koi tuai o ‵talo atu koe ki a Ieova, kaia e se mafaufau faka‵lei muamua ei koe ki au pati ka fai atu? Mai te fai penā, ko ofo atu ne koe te ‵toe “mea manogi gali” ki tou Tamana faka-te-lagi.

8. Se a te avanoaga ‵lei e maua ne tatou ke ‵viki atu ki te Atua?

⁸ E tapuaki tatou ki a Ieova māfai e ‵viki atu tatou a ia. (Sala. 34:1) E ‵viki tatou ki a Ieova māfai e fai‵pati atu tatou mo te loto fakafetai e uiga ki ana uiga mo ana galuega fakaofoofogia. A vikiga e māfua mai i se loto fiafia. A te fakamāumāu o taimi ke mafaufau ‵loto ki te aga‵lei o Ieova—mea katoa ne fai ne ia mō tatou—ka maua eiloa ne tatou a pogai e uke ke ‵viki atu ki a ia. A te galuega talai se avanoaga gali eiloa “ke ofo atu faeloa ne tatou se taulaga o vikiga ki te Atua, telā ko fuataga o ‵tou laugutu.” (Epe. 13:15) E pelā eiloa mo te tāua ke mafaufau faka‵lei ki ‵tou pati ka fai atu mai mua o ‵talo ki a Ieova, se mea ‵lei ke mafaufau faka‵lei ki pati kolā ka fai atu ne tatou ki tino e fetaui mo tatou i te ‵tou galuega talai. E ma‵nako tatou ke tuku atu te ‵toe “taulaga [‵lei] o vikiga.” E fai‵pati atu tatou mai ‵tou loto māfai ko fakaasi atu ne tatou te munatonu ki nisi tino.

9. E pelā mo tino Isalaelu i aso mua, e aoga pefea ki a tatou a te maopoopo fakatasi? Taku mai se fakaakoakoga totino.

 ⁹ E tapuaki tatou ki a Ieova māfai e ‵kau atu ki fakatasiga. Ne fakatonu atu ki tino Isalaelu i aso mua, penei: “E tolu taimi i te tausaga e ‵tau ei o ‵tu otou tāgata katoa i mua o Ieova tou Atua i te koga ka filifili ne ia.” (Teu. 16:16) Ne ‵tau o tiaki ne latou olotou fale mo olotou fatoaga e aunoa mo se tino ke tausi ki ei. Kae ne tauto atu a Ieova ki a latou: “Ka seai se tino e manako ki tou laukele i te taimi e fanaka ei koe ki mua o Ieova tou Atua.” (Eso. 34:24) Mai te fakatuanaki katoatoa ki a Ieova, ne ‵kau atu a tino Isalaelu konei ki fakamanatuga i te tausaga. Tenā ne mafai ei o maua ne latou se taui lasi ‵ki, ne momea aka te lotou malamalama i te Tulafono a te Atua, mafaufau ‵loto ki tena aga‵lei, kae maua a fakamalosiga mai te ‵kau fakatasi mo taina tali‵tonu. (Teu. 16:15) E maua foki ne tatou a mea aoga tai ‵pau penā māfai e fai te ‵toe mea e mafai i taimi e ‵kau atu ki fakatasiga Kelisiano. Kae mafaufau ki te lasi o te fiafia o Ieova māfai e ‵kau atu tatou kae ko toka o fai ‵tou tali toe‵toe kae aoga.

10. E fai pefea a te usuga o pese e pelā me se vaega tāua o te ‵tou tapuakiga?

¹⁰ E tapuaki tatou ki a Ieova māfai e usu fakatasi atu ne tatou a pese. (Sala. 28:7) A te usuga o pese ne fai pelā me se vaega tāua o te tapuakiga a tino Isalaelu. Ne ‵tofi ne te Tupu ko Tavita a tino Levi e toko 288 ke usuusu i te faletapu. (1 Nofo. 25:1, 6-8) I aso nei, e fakaasi atu ne tatou te ‵tou a‵lofa ki te Atua māfai e usu atu ne tatou a pese o vikiga. A te ‵gali o ‵tou leo e se ko te ‵toe mea tāua. Mafaufau ki te fakatusaga tenei: Kafai tatou e fai‵pati, “a tatou katoa e ‵siga i taimi e uke,” kae e se taofi aka ne te mea tenā a tatou ke fai‵pati atu i te fakapotopotoga mo te galuega talai. (Iako. 3:2) I se auala tai ‵pau, e se ‵tau o talia ne tatou a te sē ‵gali o ‵tou leo usuusu ke taofi aka tatou mai te ‵viki atu ki a Ieova e auala i pese.

11. E ‵tusa mo te Salamo 48:13, kaia e ‵tau ei o fakatoka ne tatou a taimi mō sukesukega faka-te-Tusi Tapu a te kāiga?

¹¹ E tapuaki tatou ki a Ieova māfai e suke‵suke ki tena Muna kae akoako atu a ‵tou tama‵liki e uiga ki a ia. A te Sapati se avanoaga gali mō tino Isalaelu ke taofi olotou galuega kae ke ‵saga atu ki te lotou fesokotakiga mo Ieova. (Eso. 31:16, 17) Ne akoako ne tino fakamaoni i a latou olotou tama‵liki e uiga ki a Ieova mo tena aga‵lei. E ‵tau mo tatou katoa o fai‵tau kae suke‵suke ki te Muna a te Atua. A te mea tenei se vaega o te ‵tou tapuakiga ki a Ieova kae fesoasoani mai ke momea aka te ‵tou fakapili‵pili atu ki a ia. (Sala. 73:28) Kae kafai e suke‵suke fakatasi tatou e pelā me se kāiga, e fesoasoani atu eiloa tatou ki se kautama fou—ko ‵tou tama‵liki—ke ati aka se fesokotakiga totino kae pili mo te ‵tou Tamana alofa i te lagi.—Faitau te Salamo 48:13.

12. Ne a mea e tauloto ne tatou mai te kilokiloga a Ieova ki te galuega ne fai ne tino kolā ne faite ne latou a mea katoa mō te faleie tapu?

¹² E tapuaki tatou ki a Ieova māfai e faite kae tausi faka‵lei atu ki koga tapuaki. E fai mai te Tusi Tapu me i te galuega ki te faitega o te faleie tapu mo mea katoa i ei se “galuega tapu.” (Eso. 36:1, 4) I aso nei, e kilo atu foki a Ieova ki te galuega ko te faitega o Fale Tapuaki mo nisi fale mō tena tapuakiga, e pelā me se taviniga tapu. E fakamāumāu ne nisi taina mo tuagane a taimi e uke mō vaegā galuega penei. E a, e se loto fakafetai tatou mō te fesoasoani tāua tenei ki galuega o te Malo? E tonu, e ‵kau atu foki latou ki te galuega talai. Kāti e ma‵nako a nisi o latou ke fai pelā me ne paenia. E mafai o fakaasi atu ne toeaina i te fakapotopotoga a te lotou ‵lago atu ki galuega fakatū‵tu konei, mai te talia ne latou ke paenia  a tāgata mo fāfine ga‵lue malosi konei māfai ko fetaui ‵lei latou. Faitalia me e atamai io me se apo tatou i galuega fakatū‵tu, e mafai ne tatou katoa o ga‵lue fakatasi i te tausiga o fale ke ‵ma kae ‵lei.

13. E pefea te ‵tou kilokiloga ki meaalofa e fai ne tatou ke ‵lago atu ki galuega a te Malo?

¹³ E tapuaki tatou ki a Ieova māfai e ‵lago atu tatou ki galuega o te Malo e auala i ‵tou meaalofa. E se ‵tau mo tino Isalaelu o olo atu ki mua o Ieova e aunoa mo ne mea i olotou lima. (Teu. 16:16) E ‵tau o aumai ne latou se meaalofa e ‵tusa mo olotou fakanofonofoga. Mai te fai penā, ko fakaasi atu ne latou te lotou loto fakafetai ki fakatokaga katoa ne fai ke maua ne latou a mea aoga i te feitu faka-te-agaga. E fakaasi atu pefea ne tatou te ‵tou a‵lofa ki a Ieova mo te ‵tou loto fakafetai mo fakatokaga faka-te-agaga ne maua ne tatou? A te auala e tasi ko te ‵lago atu o tatou i feitu tau tupe ki te ‵tou fakapotopotoga mo te galuega i te lalolagi kātoa māfai e fetaui ‵lei mo ‵tou fakanofonofoga. Ne fai mai te apositolo ko Paulo: “Kafai e toka se tino o tuku atu ana mea, e faigofie ke talia te mea tenā e ‵tusa eiloa mo mea e maua ne te tino, kae e se ko mea kolā e se maua ne se tino.” (2 Koli. 8:4, 12) E fakatāua ne Ieova a ‵tou meaalofa kolā e tuku atu mo te loto kātoa, faitalia me mu‵tana fua.—Male. 12:42-44; 2 Koli. 9:7.

14. E ‵tusa mo te Faataoto 19:17, se a te kilokiloga a Ieova ki te fesoasoani e tuku atu ne tatou ki taina fakaa‵lofa?

¹⁴ E tapuaki tatou ki a Ieova māfai e fesoasoani atu ki taina Kelisiano fakaa‵lofa. Ne tauto a Ieova ke toe taui atu ki tino Isalaelu kolā ne a‵lofa ki tino ma‵tiva. (Teu. 15:7, 10) E tonu, i so se taimi e fesoasoani tatou ki se taina tapuaki fakaalofa, e kilo atu a Ieova ki ei e pelā me se meaalofa ki a Ia. (Faitau te Faataoto 19:17.) E pelā mo te taimi ne avatu ei ne Kelisiano i Filipi se meaalofa ki te pagota ko Paulo, ne taku ne ia te mea tenā e pelā me “se taulaga telā e talia kae fakafiafia malosi atu ki te Atua.” (Fili. 4:18) Onoono ki te fakapotopotoga kae fesili ifo, ‘E mata, e isi se tino e mafai o fesoasoani au ki ei?’ E fiafia a Ieova māfai e lavea ne ia tatou e fakaaoga ‵tou taimi, malosi, ata‵mai, mo kope faka-te-foitino ke fesoasoani atu ki tino fakaa‵lofa. E kilo atu a ia ki mea konā e pelā me se vaega o te ‵tou tapuakiga.—Iako. 1:27.

15. E manakogina a taimi mo taumafaiga i te tapuakiga tonu, kae kaia e se ‵mafa i ei?

¹⁵ E manakogina a taimi mo taumafaiga i te tapuakiga tonu. Kae e sē se mea ‵mafa. (1 Ioa. 5:3) Kaia? Me i a tatou e tapuaki ki a Ieova ona ko te ‵tou a‵lofa ki a ia. Mafaufau ki se tamaliki foliki telā e manako o tuku atu se mea ki tena tamana. Kāti e fakamaumāu ne ia a itula e uke ke ‵lomi se ata mō ia. E se salamō eiloa te tamaliki tenā ki te uke o taimi ne fakamāumāu ne ia ki ei. E alofa a ia ki tena tamana, kae fiafia o tuku atu te meaalofa tenā ki a ia. I se auala tai ‵pau, ona ko te ‵tou a‵lofa ki a Ieova, e fia‵fia tatou o fakamāumāu a taimi mo taumafaiga ke tapuaki atu ki a ia.

16. E ‵tusa mo te Epelu 6:10, se a te kilokiloga a Ieova ki ‵tou taumafaiga ke fakafiafia atu ki a ia?

¹⁶ E se fakamoe‵moe a mātua a‵lofa ke ‵pau a meaalofa mai i olotou tama‵liki. E iloa ne latou me e kese‵kese a tama‵liki taki tokotasi e pelā foki mo olotou fakanofonofoga. I se auala tai ‵pau, e malamalama te ‵tou Tamana i te lagi i ‵tou fakanofonofoga kese‵kese. Kāti e uke atu au mea e mafai o fai i lō tino kolā e iloa kae alofa koe ki ei. Io me kāti e se uke au mea e mafai o fai e pelā mo nisi tino ona ko tou tulaga matua, masaki, io me ko tiute i te kāiga. Ke mo a ma loto vāivāi. (Kala. 6:4) Ka se mafai  o puli i a Ieova au galuega. Kafai e fai ne koe te ‵toe mea e mafai mō se pogai tonu, ka fiafia eiloa a ia. (Faitau te Epelu 6:10.) E lavea foki ne Ieova a manakoga o tou loto. E manako a ia ke fiafia koe kae lotomalie ki te tapuakiga e mafai ne koe o tuku atu ki a ia.

17. (a) Kafai e faigata ki a tatou a nisi vaega o te ‵tou tapuakiga, ne a mea e mafai o fai ne tatou? (e) Ne fesoasoani atu pefea ki a koe se vaega e tasi i te pokisi “ Mea Kolā e Fai ei ke Sili Atu Tou Fiafia”?

¹⁷ Kae e a māfai e faigata ke ‵kau atu tatou ki nisi vaega o te ‵tou tapuakiga, e pelā mo te faiga o sukesukega totino io me ko te galuega talai? Kāti ka iloa aka ne tatou me ko te uke o ‵tou taimi e fakaaoga ki faifaiga konei, ko te lasi foki o te ‵tou fia‵fia ki ei kae maua a mea aoga mai i ei. E mafai o fakatusa ne tatou a te ‵tou tapuakiga ki nisi faifaiga, kāti e pelā mo te fakamalosilosi foitino io me ko te fakaakoako ki te tātā kitala. Kafai e fai fua ne tatou a mea konā i nai taimi, kāti ka se mafai o gasolo atu tatou ki mua. Kae mafaufau la me ko fakaiku aka ke fai ne tatou te mea tenā i aso takitasi. Kāti e kamata o fai ne tatou mō se taimi toetoe fua kae fakamuli ifo ko tai leva atu. Kafai ko lavea ne tatou a ikuga ‵lei o ‵tou taumafaiga, ka olioli kae fia‵fia malosi eiloa tatou ki ei. E a, e lavea ne tatou a te auala e mafai o fakagalue ne tatou a te faifaiga tenei i ‵tou tapuakiga?

18. Se a te ‵toe mea tāua e mafai o fai ne tatou, kae ne a mea ka iku mai i ei?

¹⁸ A te tapuaki atu ki a Ieova mo ‵tou loto kātoa, ko te ‵toe mea tāua e ‵tau o fai i ‵tou olaga. Kafai e fai penā, ka maua ne tatou se olaga fiafia kae aoga kae maua foki te fakamoemoega ke tapuaki atu ki a Ieova ki te se-gata-mai. (Faata. 10:22) Ko maua ne tatou te filemu o te mafaufau me e iloa ne tatou i a Ieova e fesoasoani ki ana tino tapuaki māfai ko fe‵paki mo fakalavelave. (Isa. 41:9, 10) E maua eiloa ne tatou a pogai ‵lei ke fia‵fia i te taimi e tapuaki atu ei tatou ki ‵tou Tamana alofa telā e ‵tau o maua ne ia “te vikiga mo te ‵malu” mai i ana mea katoa ne faite!—Faka. 4:11.