E PELĀ mo te masani, e ma‵nako tatou katoa ko tino ke mafau‵fau i a tatou ne tino aga‵lei. Kae ko oko eiloa i te faigata ke fai penā. E tokouke a tino ko “se fia‵fia ki te aga‵lei.” (2 Timo. 3:3) Kāti e tau‵tali eiloa latou ki olotou tulafono totino e uiga ki te mea ‵lei mo te mea masei, ko ala i ei o fai mai latou me i te “mea ‵lei e masei kae ko te mea masei e ‵lei.” (Isa. 5:20) Kae e faigata foki ke aga‵lei tatou ona ko te auala ne puti aka ei tatou mo tulaga sē ‵lei katoatoa. Tela la, e mafai o mafau‵fau tatou pelā mo Anne, * telā ne tavini atu ki a Ieova i se fia o tausaga kae ne fai mai penei, “Se mea faigata ke talitonu me e mafai o fai au pelā me se tino ‵lei.”

Se mea fakafiafia, me e mafai ne tatou katoa o ati aka te aga‵lei! Se vaega o fuataga o te agaga tapu o te Atua, kae e malosi fakafia atu tena agaga i lō so se mea faigata e mafai o fe‵paki mo tatou. Ke na suke‵suke faka‵lei nei tatou ki te uiga o te aga‵lei kae ke tauloto ki te auala e mafai ei o fakaasi katoatoa atu ne tatou a te uiga tenei.

A te aga‵lei se uiga io me fakasino atu loa ki faifaiga ‵lei o se tino. E aofia i ei a amioga mo faifaiga ‵lei, e aunoa mo se amioga masei. E lavea ‵lei atu a te uiga tenei i faifaiga a tino. A te tino ‵lei e kilo atu faeloa ki auala ke fesoasoani atu ki nisi tino kae fai a mea ‵lei mō latou.

E mautinoa eiloa me ne lavea ne koe a nisi tino e fai ne latou a mea ‵lei mō olotou kāiga mo taugasoa, kae e mata, e ‵tau fua o gata i konā? A te ‵tonuga loa, e seai se tino e mafai o fai ne ia a mea ‵lei i taimi katoa, me e fai mai te Tusi Tapu me “e seai se tagata amiotonu i te lalolagi e fai faeloa ne ia te mea ‵lei kae e se agasala.” (Fai. 7:20) Ne fai ‵tonu mai te apositolo ko Paulo, penei: “E iloa ne au me e seai se mea ‵lei e nofo i loto i toku foitino.” (Loma 7:18) Tela la, e manino ‵lei me e ‵tau eiloa o tauloto ne tatou a te auala ke ati aka te uiga aga‵lei mai i a Ieova.

Ne fakatoka ne Ieova te Atua a tulafono e uiga ki mea ‵lei. E uiga ki a ia, e fai‵tau tatou penei: “A koe e ‵lei kae e ‵lei foki au galuega. Akoako mai au ki au tulafono fo‵liki” (Sala. 119:68) Ke na suke‵suke nei tatou ki vaega e lua o te aga‵lei o Ieova telā ne taku mai i te fuaiupu tenā.

A Ieova e ‵lei. A te aga‵lei o Ieova e katoatoa, tela la, e fakaasi atu faeloa a tena aga‵lei i ana uiga katoa. Mafaufau ki te mea ne tupu i te taimi ne fai ei a Ieova ki a Mose: “Ka fai ne au ke lavea ne koe ki ou mata a toku aga‵lei.” I te taimi ne fakaasi atu ei ne Ieova tena ‵malu e aofia ei tena aga‵lei, ne lagona ne Mose a pati konei: “Ieova, Ieova, te Atua alofa fakamagalo kae alofa atafai, e tuai o ita kae ‵fonu i te alofa fakamaoni mo te munatonu, e fakaasi ne ia te alofa fakamaoni ki te fia afe o tino, kae fakamagalo ne ia a mea ‵se mo amioga solitulafono mo agasala, e fakasala eiloa ne ia a tino ma‵sei.” (Eso. 33:19; 34:6, 7) Kae e isi se pogai ke malamalama tatou me ne fakaasi mai ne Ieova tena aga‵lei i feitu katoa. E tiga eiloa a Iesu ko te fakaakoakoga ‵lei o te aga‵lei, kae ne fai mai eiloa a ia, penei: “E seai se tino e ‵lei, e tokotasi fua te tino ‵lei, ko te Atua.”—Luka 18:19.

A galuega a Ieova e ‵lei. E lavea ‵lei atu te aga‵lei  o te Atua i ana galuega ‵lei. “A Ieova e ‵lei ki tino katoa, kae ko tena alofa fakamagalo e lavea atu i ana galuega katoa.” (Sala. 145:9) E se fakailoga tino a Ieova i tena aga‵lei, me e tuku mai ne ia te ola mo mea e manakogina ke ola ki ei a tino katoa. (Galu. 14:17) Ne fakaasi mai foki tena aga‵lei i te taimi e fakamagalo ne ia tatou. Ne tusi mai te faisalamo: “Me i a koe e Ieova, e ‵lei kae e toka o fakamagalo.” (Sala. 86:5) E mafai o mautinoa i a tatou me “ka se taofi ne Ieova so se mea ‵lei mai i a latou kolā e sa‵sale i te fakamaoni.”—Sala. 84:11.

A tatou ne faite ki te fakatusa o te Atua, tela la e maua ne tatou te manakoga ke fai pelā me ne tino ‵lei kae fai te mea ‵lei. (Kene. 1:27) E tiga te feitu tenā, e fakamalosi mai te Muna a te Atua ki ana tavini ke “tauloto ke fai te mea ‵lei.” (Isa. 1:17) Kae e mafai pefea o tauloto tatou ke fai te mea ‵lei? Ke onoono nei tatou ki auala e tolu e mafai ei ne tatou o fai te mea tenei.

Muamua la, e mafai ne tatou o ‵talo atu mō te agaga tapu, telā e mafai o fesoasoani atu ki Kelisiano ke ati aka a te aga‵lei tonu. (Kala. 5:22) E tonu, e mafai o fesoasoani mai te agaga o te Atua ke fia‵fia tatou ki te mea ‵lei kae takalia‵lia ki te mea masei. (Loma 12:9) Ao, e fai mai te Tusi Tapu me e mafai o ‘faka‵mautakitaki ne Ieova tatou i galuega mo pati katoa e fai ne tatou.’—2 Tesa. 2:16, 17.

Te lua, e ‵tau mo tatou o fai‵tau ki te Muna tusia a te Atua. Ke fai penā, e akoako ne Ieova tatou i “te auala kātoa o te mea telā e ‵lei” kae fakatoka ne ia tatou “mō te faiga o galuega ‵lei katoa.” (Faata. 2:9; 2 Timo. 3:17) Mai te faitau kae mafaufau ‵loto, ko faka‵fonu ei ne tatou a ‵tou loto ki mea ‵lei e uiga ki te Atua mo tena loto, e pelā eiloa me e faka‵fonu ne tatou a koloa tāua ki ‵tou pusa ‵teu koloa.—Luka 6:45; Efe. 5:9.

Te tolu, e taumafai malosi tatou o “fakaakoako ki mea kolā e ‵lei.” (3 Ioa. 11) E maua ne tatou a fakaakoakoga ke tau‵tali ki ei i te Tusi Tapu. E tonu, a toe fakaakoakoga sili ko Ieova mo Iesu. Kae e mafai foki o sau‵tala tatou ki nisi tino kolā ne lauiloa ona ko te uiga aga‵lei. E tokolua a tino e mafai o mafau‵fau ki ei, ko Tapita mo Panapa. (Galu. 9:36; 11:22-24) E mafai o maua ne koe a mea aoga mai i lā tala, mai te sukesuke ki mea ne fai ne lāua ke fesoasoani atu ki nisi tino. Mafaufau ‵loto ki mea e mafai ne koe o fai ke fesoasoani atu ki nisi tino o tou kāiga io me ko te fakapotopotoga. Kae ke mo a ma manatu māmā ki mea aoga ne maua ne latou taki tokotasi konei ona ko te uiga aga‵lei. E mafai foki o maua ne tatou a mea aoga tai ‵pau penā.

E mafai foki o mafau‵fau tatou ki fakaakoakoga a tino i aso nei kolā e fai ne latou a mea ‵lei.  E pelā mo te mea tenei, mafaufau ki toeaina ga‵lue malosi i te fakapotopotoga kolā e ‘fia‵fia ki mea ‵lei.’ Ke mo a ma manatu mā‵ma ki tuagane fakamaoni kolā e fai pelā me ne “faiakoga o mea ‵lei” e auala i olotou pati mo fakaakoakoga ‵lei. (Tito 1:8; 2:3) E fai mai se tuagane e igoa ki a Roslyn, penei: “Ne taumafai malosi toku taugasoa ke fesoasoani kae fakamalosi atu a nisi tino i te fakapotopotoga. E mafaufau tou fafine ki olotou tulaga kae e tuku atu faeloa ne ia a tamā meaalofa io me fesoasoani atu ki a latou i nisi auala aka. E kilo atu au ki tou fafine e pelā me se tino aga‵lei.”

E fakamalosi ne Ieova ana tino ke “‵sala ki te mea ‵lei.” (Amo. 5:14) I te faiga tenā, ka se fakaasi atu fua ‵tou a‵lofa ki tulafono a Ieova kae e fakamalosi foki i ei ‵tou manakoga ke fai te mea ‵lei.

Ke fai pelā me se tino ‵lei, e se manakogina ke fai ne koe a mea fakaofoofogia io me tuku atu ki a latou a meaalofa ‵togi ‵mafa. Ke fai se fakatusa:Ke fakaola se lakau, e se manakogina a vai e uke ke fakasiusiu atu ki ei, i lō te fai penā, e mu‵tana fua aofaki o vai e fakaaoga kae fakasiusiu ne tatou i taimi e uke. I se auala tai ‵pau, e mafai o lavea ‵lei atu a ‵tou aga‵lei i tamā fesoasoani kolā e tuku atu ne tatou ki nisi tino.

E fakamalosi mai te Tusi Tapu ki a tatou ke “toka” tatou o fai so se galuega ‵lei. (2 Timo. 2:21; Tito 3:1) Kafai e iloa faka‵lei ne tatou a fakanofonofoga o tino, ko mafai ei o iloa foki ne tatou a auala ke fakafiafia atu ‵tou tuakoi “mō tena ‵lei, ke fakamalosi aka ei a ia.” (Loma 15:2) E mafai o aofia i te mea tenā a te tuku atu o mea e maua ne tatou. (Faata. 3:27) E mafai o ‵kami ne tatou se tino ke ‵kai fakatasi tatou io me ki se maopoopoga ‵lei. Kafai e iloa ne tatou se tino e masaki, e mafai o lafo atu ne tatou se tamā tusi, asi ki a ia, io me telefoni atu. E tonu, e mafai o ‵sala atu tatou ki avanoaga e uke ke fai atu “a pati ‵lei fua kolā e ati aka ei a tino e ‵tusa mo te mea e manakogina, ko te mea ke mafai o tuku atu a mea aoga ki tino kolā e fakalogo‵logo mai.”—Efe. 4:29.

E pelā mo Ieova, e taumafai tatou o fai te mea ‵lei ki tino katoa, mai te sē fakailoga tino. A te auala ‵lei e tasi ke fai penā ko te talai atu o te tala ‵lei o te Malo ki tino katoa. E pelā mo mea ne fakatonu mai ne Iesu, e ‵tau o kausaki tatou o fai te mea ‵lei ki a latou foki kolā e takalia‵lia mai ki a tatou. (Luka 6:27) E sē se mea masei ke fakaasi atu te atafai kae ke fai te mea ‵lei ki nisi tino, me e “seai se tulafono e ‵teke ki mea konei.” (Kala. 5:22, 23) Kafai e fai ne tatou a mea ‵lei faitalia a ‵tekemaiga io me ko fakalavelave, e mafai eiloa o ‵taki mai ne tatou a nisi tino ki te munatonu kae ke ‵viki atu latou ki te Atua.—1 Pe. 3:16, 17.

“Te tagata ‵lei e tau ne ia a te taui o ana mea ne fai.” (Faata. 14:14) Ne a nisi taui ka maua ne tatou? Kafai e fai mea ‵lei tatou ki nisi tino, ka fai faka‵lei foki ne latou a tatou. (Faata. 14:22) Kafai foki loa e se fai penā a nisi tino, e mafai ne ‵tou uiga ‵lei o ‵fuli olotou kilokiloga.—Loma 12:20.

E molimau ne tino e tokouke a te aoga o te fulitua atu ki te faiga o mea ma‵sei kae fai a mea ‵lei. Mafaufau la ki te tala o Nancy. “I taku tupuakaga, ne fai au pelā me se tino kaitaua, amio masei, kae sē āva,” ko ana pati. “Kae i te taimi ne tauloto ei ne au a tulafono o te Atua e uiga ki te mea ‵lei, ne kamata o maua ne au se lagonaga fiafia. Nei la, ko iloa ne au o fakaasi atu te āva.”

A te pogai tāua e ati aka ei ne tatou a te aga‵lei, me i te faiga tenā e fai ei ke fiafia a Ieova. Kafai foki e se lavea ne tino e tokouke a mea e fai ne tatou, kae e lavea eiloa ne Ieova. E lavea ‵lei ne ia a uiga mo mafaufauga ‵lei o tatou katoa. (Efe. 6:7, 8) Kae e taui mai pefea ne ia tatou? “A te tino ‵lei e maua ne ia te taliaga a Ieova.” (Faata. 12:2) Tela la, ke na tumau i te ati aka ne tatou a te aga‵lei. E tauto mai a Ieova me ka tuku mai ne ia “te ‵malu mo te fakaaloalo mo te filemu mō tino katoa kolā e ga‵lue ke maua a mea ‵lei.”—Loma 2:10.