1. Kaia e isi se aiā o Ieova ke pule ki luga i mea katoa? (Ke onoono ki te ata i te kamataga.)

A MEA katoa i a Ieova! I ō ia te “lagi, ke oko foki eiloa ki te lagi o lagi, mo te lalolagi mo mea katoa i ei.” (Teu. 10:14; Faka. 4:11) Tela la, a tatou i o Ieova, me ne faite ne ia tatou. (Sala. 100:3) Kae e ‵tusa mo tala fakasolopito o tino, ne filifili eiloa ne te Atua se potukau fakapito o ana tino i se auala fakapito.

2. Ko oi a tino ne taku i te Tusi Tapu me ko tino o Ieova i se auala fakapito?

² E pelā me se fakaakoakoga, e fakasino atu te Salamo 135 ki tino tapuaki fakamaoni o Ieova i Isalaelu mua e pelā me ko “ana tino fakapito.” (Sala. 135:4) E se gata i ei, ne ‵valo mai i te tusi ko Hosea me ka fai a nisi tino mai fenua fakaa‵tea mo tino o Ieova. (Hosea 2:23) Ne fakataunu eiloa te valoaga a Hosea i te taimi ne filifili ei ne Ieova a tino mai fenua fakaa‵tea ke fai mo pule lagolago fakatasi mo Keliso. (Galu. 10:45; Loma 9:23-26) A te “fenua tapu” tenei o Ieova ne “tino fakapito” i se auala tu ‵kese, kae ko tino kolā e aofia i ei ne fakaekegina ki te agaga tapu kae ne filifili aka ke ola i luga i te lagi. (1 Pe. 2:9, 10) Kae e pefea te tokoukega o Kelisiano fakamaoni i aso nei kolā e maua ne latou te fakamoemoega i te lalolagi nei? E taku foki ne Ieova a latou ki ana “tino” kae ko ana “tino filifilia.”—Isa. 65:22.

3. (a) Ko oi e maua ne latou se fesokotakiga fakapito mo Ieova i aso nei? (e) Ne a mea ka sau‵tala tatou ki ei i te mataupu tenei?

³ I aso nei, a te “lafu mamoe foliki,” kolā e maua ne latou te fakamoemoega  ke ola i te lagi, mo “nisi mamoe” kolā e fakamoe‵moe ke ola i te lalolagi, e fai pelā me se “lafu mamoe e tasi” telā e fakatāua malosi ne Ieova e pelā me ko ana tino. (Luka 12:32; Ioa. 10:16) E mautinoa eiloa me e ma‵nako tatou o fakaasi atu te loto fakafetai ki a Ieova mo te mauaga ne tatou se fesokotakiga fakapito mo ia. Ka sau‵tala eiloa tatou i te mataupu tenei ki nisi auala kolā e mafai ne tatou o fakaasi atu te ‵tou loto fakafetai ki a Ieova mō te tukumaiga ne ia ki a tatou te tulaga fakapito tenā.

4. Se a te auala e tasi e mafai ne tatou o fakafetai atu ki a Ieova mō te mauaga o se fesokotakiga mo ia, kae ne fai pefea ne Iesu se mea i se auala tai ‵pau?

⁴ E fakaasi atu ‵tou loto fakafetai ki a Ieova mai te tuku atu o ‵tou ola ki a ia mo te loto kātoa. Mai te papatisoga ki te vai, ko fakailoa atu ne tatou i mua o tino me i a tatou ko fai mo tino o Ieova kae loto fia‵fia o faka‵logo ki a ia. (Epe. 12:9) Ne fai ne Iesu se mea tai ‵pau me i te taimi ne papatiso ei a ia, ne fai atu a ia ki a Ieova: “A te faiga o tou loto, e toku Atua, ko toku manakoga.” (Sala. 40:7, 8, fml.) Ne tuku atu ne Iesu a ia eiloa ke fai te loto o Ieova, e tiga eiloa ne fai a ia mo vaega o te fenua telā ne tuku atu ki te Atua talu mai tena fanaumaiga.

5, 6. (a) Ne a pati a Ieova ne fai i te taimi ne papatiso ei a Iesu? (e) Se a te tala fakatusa e mafai o fesoasoani mai ke malama‵lama tatou i lagonaga o Ieova e uiga ki ‵tou tukuatuga.

⁵ Ne saga atu pefea a Ieova ki te papatisoga a Iesu? E fai mai te tala i te Tusi Tapu: “I tena otiga ne papatiso ne fanaka eiloa a Iesu mai te vai, kae kiloke! ne matala te lagi, kae ne matea ne Ioane a te agaga o te Atua e fanaifo e pelā me se lupe i luga i a Iesu. Kae kiloke! E isi foki se leo mai te lagi e fai mai penei: ‘Tenei eiloa taku Tama, ko taku fagasele telā ko oti ne talia ne au.’” (Mata. 3:16, 17) E tiga eiloa ko oti ne fai a Iesu mo Tama a tena Tamana faka-te-lagi, ne fiafia eiloa a Ieova ke lavea atu te loto fiafia o tena Tama ke fai katoatoa Tena loto. Tela la, e fiafia eiloa a Ieova o talia a ‵tou tukuatuga, kae ka tuku mai eiloa ne ia ki a tatou tena fakamanuiaga.—Sala. 149:4.

⁶ Ke fai se fakatusa, mafaufau la me tuku atu ne se mātua a mea‵kai ‵gali ki tena tamaliki fafine foliki. Kae ne avatu ne te tamaliki fafine a mea‵kai konā ke ‵kai fakatasi mo tena mātua. E mata, a mea‵kai konā e se i a te mātua? E mafai pefea o toe tuku atu ne te tamaliki fafine a mea‵kai kolā ne avatu ne tena mātua? Ka se mafaufau lele eiloa se mātua alofa ki vaegā fesili penā. Kae e fiafia eiloa tou fafine ke talia te meaalofa e pelā me se fakaasiga o te alofa o tena tamaliki fafine ki a ia. E mautinoa eiloa me e fakatāua ne ia a mea‵kai ‵gali konā mai tena tama i lō nisi mea‵kai aka. E penā foki a te fiafia lasi o Ieova māfai e tuku katoatoa atu a tatou ki a ia.—Eso. 34:14.

7. Ne faka‵mafa mai pefea ne Malaki a lagonaga o Ieova ki luga i tino kolā e loto fia‵fia o tavini atu ki a ia?

⁷ Faitau te Malaki 3:16. Kafai koe seki tukugina atu kae papatiso, ke mafaufau ki te tāua ke kausaki atu ki lāsaga tāua konā. A te ‵tonuga loa, mai te taimi ne fanau mai ei koe, ko oti ne fai koe mo tino o Ieova, e penā foki a nisi tino. Kae mafaufau la ki te lasi o te fiafia o Ieova māfai ne tuku atu tou ola ki a ia kae fai tena loto, ko te mea ke fakamaluga aka ei tena pulega sili. (Faata. 23:15) Kae ka iloa ‵lei ne Ieova a latou kolā e tavini atu ki a ia mo te loto kātoa, kae e tusi ne ia olotou igoa i tena “tusi o fakamasauaga.”

8, 9. Se a te mea e manako a Ieova ke fai ne latou kolā e tusi olotou igoa i tena “tusi o fakamasauaga”?

⁸ Ke tusi se igoa o se tino i luga i te “tusi o fakamasauaga” a Ieova, e isi ne tiute e olo tasi mo te mea tenā. Ne fakaasi ‵tonu mai ne  Malaki me e ‵tau mo tatou o ‘ma‵taku ki a Ieova kae mafaufau ‵loto ki tena igoa.’ A te tapuaki atu ki so se tino io me ko so se mea aka e mafai o iku atu ki te tapale kea‵tea o ‵tou igoa mai te tusi fakatusa o te ola a Ieova.—Eso. 32:33; Sala. 69:28.

⁹ Tela la, a te ‵tou tukuatuga ki a Ieova e aofia i ei a mea e uke atu i lō te tauto atu fua ke fai tena loto kae ke papatiso ki te vai. A mea konei e fai ne taimi i se taimi fua e tasi, kae ka fai pelā me ne vaega o mea kolā ko oti ne ‵tupu. Kae ko te ‵tu atu o tatou i te feitu o Ieova e pelā me ne ana tino, e manakogina i ei se fakaasiga ke tumau te ‵tou faka‵logo ki a ia i te taimi nei mo aso mai mua—i taimi katoa e ola ei tatou.—1 Pe. 4:1, 2.

10. Se a te ‵kesega e lavea faka‵lei atu i te vā o tino kolā e tavini ki a Ieova mo tino kolā e se tavini ki a ia?

¹⁰ E fakaasi mai i te mataupu mai mua a tala i te Tusi Tapu e uiga ki a Kaino, Solomona mo tino Isalaelu. Ne ma‵nako katoa latou o tapuaki atu ki a Ieova, kae ne katoatoa eiloa te lotou tapuakiga ki a Ieova. E fakaasi mai i fakaakoakoga konei me i tino ‵tonu o Ieova e ‵tau o ‵tu ‵mautakitaki i te feitu o te amiotonu kae ‵teke atu ki amioga ma‵sei. (Loma 12:9) I te otiga ne fakasae mai ne Malaki a te “tusi o fakamasauaga,” ne faipati eiloa a Ieova ki te “‵kese o te tino amiotonu mo te tino amio masei, te tino e tavini atu ki te Atua mo te tino e se tavini atu ki a ia.”—Mala. 3:18.

11. Kaia e ‵tau o lavea ‵lei ne nisi tino me e tapuaki katoatoa atu tatou ki a Ieova?

¹¹ Kae tenei te suā auala e mafai ne tatou o fakaasi atu ‵tou loto fakafetai ki a Ieova mō te fai ne ia o tatou mo fai ana tino. E ‵tau o “lavea ‵lei ne tino katoa” a ‵tou ga‵solo ki mua i te feitu faka-te-agaga. (1 Timo. 4:15; Mata. 5:16) Ke ‵sili ifo ki a koe eiloa, penei: ‘E mata, e lavea ‵lei atu ne nisi tino a toku fakamaoni katoatoa ki a Ieova? E mata, e ‵sala atu au ki avanoaga ke fakaasi atu ki tino i a au se Molimau a Ieova?’ Ka fanoanoa malosi a Ieova telā ne filifili ne ia tatou mo fai ana tino, māfai ne manatu mā‵ma tatou o fakailoa atu ki nisi tino me i a tatou ko ana tino.—Sala. 119:46; faitau te Maleko 8:38.

12, 13. I auala fea ne fakafaigata ei ne nisi tino a te lotou iloga e pelā ne Molimau a Ieova?

 ¹² Se mea fakafanoanoa me e tau‵tali atu a nisi Molimau i te “agaga o te lalolagi,” ko ala ei o ‵pau latou mo tino kolā e se tapuaki atu ki a Ieova. (1 Koli. 2:12) E fakamalosi aka ne te agaga tenā a ‘manakoga o te foitino’ i se tino. (Efe. 2:3) E pelā me se fakaakoakoga, faitalia a pati fakatonutonu ne tuku mai e uiga ki te mataupu, koi fia‵fia eiloa a nisi tino ki vaegā gatu mo teuga kolā e se ‵tau. Koi pei eiloa ne latou a vaegā gatu kolā e sai‵tia kae āta, ki maopoopoga faka-Kelisiano. Io me filifili aka ne latou a vaegā ‵katiga io me ko teuga o ulu kolā e se ‵tau. (1 Timo. 2:9, 10) Tela la, kafai ko ‵nofo atu latou mo tino e tokouke, se mea faigata ke matemate aka me ko oi a tino o Ieova kae ko oi foki a “taugasoa o te lalolagi.”—Iako. 4:4.

¹³ I nisi feitu, ne seki tiakina eiloa ne nisi Molimau a amioga faka-te-lalolagi. A vaegā ‵saka io me ko faifaiga a latou i pa‵tī ko silia atu mo mea kolā e ‵tau o fai ne Kelisiano. E faka‵pa ne latou a ata o latou eiloa kae fai manatu ki ei i luga i te itaneti telā e se mata ‵tau ki tino faka-te-agaga. Kāti ne seki polopoloki ‵mafa latou i fakatasiga Kelisiano mō te faiga o se agasala matagā, kae e mafai o fai latou e pelā me se fakamalosiga masei ki olotou taugasoa kolā e taumafai ke fakatumau a amioga ‵lei i mua o tino o Ieova.—Faitau te 1 Petelu 2:11, 12.

14. Se a te auala tāua telā e mafai o puipui ei ‵tou fesokotakiga fakapito mo Ieova?

¹⁴ E fakamalosi aka eiloa ne te lalolagi masei tenei a “manakoga o te foitino mo manakoga o mata mo mea e sona fakamata‵mata ki ei a tino i te olaga.” (1 Ioane 2:16) Kae ona ko tatou ko tino o Ieova, ne fakamalosigina tatou ke “‵teke tatou ki amioga sē amioatua mo manakoga faka-te-lalolagi kae ke ola i te mafaufau ‵lei mo te amiotonu mo te tapuaki fakamaoni ki te Atua i loto i te olaga tenei.” (Tito 2:12) A ‵tou pati, te auala e ‵kai kae inu ei tatou, ‵tou gatu mo teuga, ‵tou galuega—ko mea katoa kolā e fai ne tatou—e ‵tau o fakamaoni atu ki tino kolā e kilo‵kilo mai ki a tatou me e tapuaki fakamaoni atu tatou ki a Ieova.—Faitau te 1 Kolinito 10:31, 32.

15. Kaia e ‵tau ei o fakaasi atu te atafai mo te alofa ki ‵tou taina tapuaki?

¹⁵ A te ‵tou loto fakafetai ki te vā fakataugasoa fakapito mo Ieova e fakaasi atu e auala i ‵tou faifaiga ki ‵tou taina tapuaki. A latou foki ko tino o Ieova. Kafai e fakatāua ne tatou a te mea tenei, ka fakaasi atu faeloa ne tatou ki ‵tou taina mo tuagane a te atafai mo te alofa. (1 Tesa. 5:15) Ne fai atu a Iesu ki ana soko: “Ona ko te mea tenei, ka iloa ei ne tino katoa i a koutou ko oku soko—māfai e fakatau a‵lofa koutou.”—Ioa. 13:35.

16. Se a te fakaakoakoga mai te Tulafono a Mose telā e fakamatala mai i ei a lagonaga o Ieova ki luga i ana tino?

¹⁶ Ke fai se fakatusa ki te auala e fai faka‵lei ei ne tatou a nisi tino i te fakapotopotoga, mafaufau ki mea konei. A meāfale katoa i te faletapu o Ieova ko oti ne tuku katoatoa atu mō te tapuakiga ‵ma. Ne fakamatala likiliki mai i te Tulafono a Mose a te auala ke tausi atu ki meāfale katoa konā, kae ka tamate eiloa so se tino telā e soli ne ia te tulafono. (Nume. 1:50, 51) Kafai ne puipui faka‵lei ne Ieova a mea ‵mate konā i tena tapuakiga, ko sili atu la i te tāua ki a ia ke puipui ana tino tapuaki fakamaoni kolā ko oti ne filifili ne ia ke fai mo ana tino! I te faipatiga ki ana tino, ne folafola atu a Ieova, penei: “So se tino telā e fakapatele atu ki a koutou ko fakapatele eiloa ki toku ‵kano mata.”—Saka. 2:8.

17. Ne a mea e “saga kae fakalogologo” mai ki ei a Ieova?

¹⁷ Se mea gali me ne fakamatala mai ne Malaki a Ieova e pelā me “saga atu faeloa ki a latou kae fakalogologo” i te taimi e fakatau fesokotaki atu ei Ana tino. (Mala. 3:16) Se mea tonu me e “iloa ne Ieova ana tino.” (2 Timo. 2:19) E lavea ‵lei ne ia a ‵tou faifaiga mo ‵tou pati e fai. (Epe. 4:13) Kafai ko sē atafai tatou ki ‵tou taina tapuaki, e ‘saga kae fakalogologo’ mai a Ieova. Kafai e uiga talimālō, kaima‵lie, fakamagalo kae fakatau atafai tatou, e mautinoa eiloa me ka lavea ‵lei ne Ieova a te mea tenā.—Epe. 13:16; 1 Pe. 4:8, 9.

18. E mafai pefea o fakaasi atu ne tatou te loto fakafetai mō te tauliaga ke fai tatou mo tino o Ieova?

¹⁸ E mautinoa eiloa me e olioli tatou ke fakaasi atu ‵tou loto fakafetai ki a Ieova mō te tauliaga ke fai tatou mo ana tino. E iloa ne tatou me kafai e tuku atu ‵tou ola ki a ia, a te mea tenā se filifiliga poto eiloa. Kafai foki loa e ‵nofo atu tatou i “loto i te kautama fai mea piko‵piko kae ‵numi valevale tenei,” e ma‵nako tatou ke lavea ne tino me i a tatou e “‵ma kae seai se mea e ‵losi mai ki a tatou, . . . kae maina atu e pelā me ne moli i te lalolagi.” (Fili. 2:15) E tu ‵mautakitaki tatou o ‵teke atu a amioga ma‵sei. (Iako. 4:7) Kae e a‵lofa kae āva tatou ki ‵tou taina tapuaki, mai te iloa atu me e fai foki latou mo tino o Ieova.—Loma 12:10.

19. E taui atu pefea ne Ieova a latou kolā e fai mo ana tino?

¹⁹ E tauto mai te Tusi Tapu: “A Ieova ka se tuku tiaki ne ia ana tino.” (Sala. 94:14) A te folafolaga mautinoa tenei ka fakagalue aka faitalia so se fakalavelave telā e fe‵paki mo tatou. E se mafai foki ne te mate o ‵vae kea‵tea te alofa o Ieova mō tatou. (Loma 8:38, 39) “Kafai e ola tatou, e ola tatou mō Ieova, kae kafai e ‵mate tatou, e ‵mate foki tatou mō Ieova. Tela la, faitalia me e ola io me ‵mate tatou, a tatou ko tino o Ieova.” (Loma 14:8) E olioli eiloa tatou ki te aso telā ka aumai ei ne Ieova a te ola ki ana taugasoa fakamaoni katoa kolā ko oti ne ‵mate. (Mata. 22:32) Kae e maua foki loa ne tatou i aso nei a fakamanuiaga e uke. E pelā mo pati a te Tusi Tapu, “ke fiafia te fenua telā ko Ieova te lotou Atua, ko tino kolā ko oti ne filifili ne ia ke fai mō ia.”—Sala. 33:12.