1, 2. (a) Ne fakasino atu muamua ki a ai a pati a Iesu i te Mataio 24:12? (e) E fakaasi mai pefea ne te tusi o Galuega me i te tokoukega o Kelisiano mua ne tumau eiloa i te fakaasi atu o te alofa? (Onoono ki te ata i te kamataga.)

A TE vaega e tasi o te fakailoga ne tuku mai ne Iesu e uiga ki “te gataga o te olaga tenei” ko te ‘gasolo ifo o te sē a‵lofa o tino.’ (Mata. 24:3, 12) I te senitenali muamua, a te kau Iutaia, kolā ne fai mai i a latou ko tino o te Atua, ne talia ne latou ke gasolo ifo te lotou a‵lofa ki te Atua.

² I te suā feitu, a te ukega o Kelisiano i te taimi tenā ne fakalavelave faeloa i te “folafola atu a te tala ‵lei e uiga ki te Keliso” kae fakaasi atu te alofa o te Atua, ki taina Kelisiano, mo tino sē tali‵tonu. (Galu. 2:44-47; 5:42) E tiga eiloa te feitu tenā, ne talia ne nisi soko o Iesu i te senitenali muamua ke gasolo ifo te lotou a‵lofa.

3. Ne a mea ne fai ei ke gasolo ifo ki lalo a te a‵lofa o nisi Kelisiano?

³ Ne fai mai a Iesu, telā ko oti ne toetu aka, e uiga ki Kelisiano i te senitenali muamua kolā ne ‵nofo i Efeso: “Tenei loa te mea e se fiafia ei au ki a koe, me ko oti ne tiakina ne koe te alofa telā ne maua  muamua ne koe.” (Faka. 2:4) Se a te pogai e tasi mō te mea tenei? Kāti ne fakamalosi aka a soko mua konei o Keliso ne tino kolā e mafau‵fau faka-te-lalolagi. (Efe. 2:2, 3) E pelā mo fakai e uke i aso nei, ne ‵fonu a te fakai o Efeso i te senitenali muamua i mea ma‵sei. Se fakai maumea ‵ki telā ne fakatāua malosi ne tino i ei a mea ‵gali kae ‵togi ‵mafa, fakafiafiaga, mo te olaga faka-te-foitino ‵lei. Ne fakaseaoga ne fakafiafiaga kaima‵nako a te alofa sē kaiu. E se gata i ei, ne lauiloa malosi te amio matafatu mo te sē āva mo amioga fakatauavaga kolā e tapu i te tulafono.

4. (a) Ne a pogai e gasolo ifo ei te alofa i ‵tou aso nei? (e) Ne a feitu e tolu e mafai o tofotofo aka ei ‵tou a‵lofa?

⁴ Ne fakasino mai foki eiloa ki ‵tou aso nei a te valoaga a Iesu e uiga ki te gasolo ifo o te alofa. Ko gasolo ifo faeloa o foliki a te a‵lofa o tino i aso nei ki te Atua. Ne fulitua atu a te fia miliona o tino ki a ia kae ne ‵kilo atu ki fakapotopotoga a tāgata ke faka‵lei aka ei a fakalavelave o tino. Tela la, e tumau eiloa i te gasolo ifo o te alofa i tino kolā e se tapuaki ki a Ieova te Atua. Kae e pelā eiloa mo mea e fakaasi mai i tulaga i te fakapotopotoga i Efeso i te senitenali muamua, e mafai foki o lotoma‵lie a Kelisiano ‵tonu ki olotou tulaga kae talia ke gasolo ifo ki lalo te lotou a‵lofa. Ka mafau‵fau nei tatou ki feitu e tolu kolā e mafai o tofotofo aka ei ‵tou a‵lofa: (1) Alofa ki a Ieova, (2) alofa ki te munatonu i te Tusi Tapu, (3) mo te alofa ki ‵tou taina.

5. Kaia e ‵tau ei o a‵lofa tatou ki te Atua?

⁵ Mai mua o te aso ne fakailoa mai ei ne Iesu e uiga ki te galo atu o te alofa, ne faka‵mafa mai ne ia a te ‵toe alofa tāua. Ana muna: “‘E ‵tau mo koe o alofa ki a Ieova tou Atua mo tou loto kātoa mo tou foitino kātoa mo tou mafaufau kātoa.’ Tenei te ‵toe fakatonuga sili kae tu muamua.” (Mata. 22:37, 38) A te ‵tonuga loa, a te lasi o te alofa ki te Atua e fesoasoani mai ki a tatou ke faka‵logo ki fakatonuga a Ieova, ke kufaki, kae ke takalia‵lia ki mea ma‵sei. (Faitau te Salamo 97:10.) Kae e taumafai eiloa a Satani mo tena lalolagi o fakavāivāi ‵tou a‵lofa ki te Atua.

6. Ne a mea ne iku mai i te galo atu o te alofa ki te Atua?

⁶ E maua eiloa ne te lalolagi i ‵tou tafa se kilokiloga ‵fuli fakakotua e uiga ki te alofa. I lō te a‵lofa ki te Mafuaga, e “a‵lofa fua a tino ki a latou eiloa.” (2 Timo. 3:2) E fakamalosi aka ne te lalolagi tenei e pule ne Satani a “manakoga o te foitino mo manakoga o mata mo mea e sona fakamata‵mata ki ei a tino i te olaga nei.” (1 Ioa. 2:16) Ne fakailoa atu ne te apositolo ko Paulo ki taina Kelisiano ke fakaeteete i te fakafiafiaga o te foitino, ana muna: “Te mafaufau faeloa ki mea faka-te-foitino e fakauiga eiloa ki te mate . . . me i te mafaufau ki mea faka-te-foitino e fakauiga ki te fai fili mo te Atua.” (Loma 8:6, 7) A te ‵tonuga loa, a latou kolā ne fakamāumāu olotou olaga ki te kausaki atu ki mea faka-te-foitino io me ko te fakama‵liega olotou manakoga fakatauavaga sē ‵tau ne iku atu eiloa ki te fanoanoa mo te logo‵mae malosi.—1 Koli. 6:18; 1 Timo. 6:9, 10.

7. Ne a mea fakama‵taku e fe‵paki mo soko o Keliso i aso nei?

⁷ I nisi fenua, a tino sē tali‵tonu ki te Atua, tino tali‵tonu me seai se Atua, mo tino tali‵tonu ki te evolusione e fakamalosi aka ne latou a manatu ne fakatoka ke fakaseaoga ei a te alofa ki te Atua penā foki loa mo te talitonu ki a ia. Ne fai ne latou ke tali‵tonu a tino e tokouke me i te tino e talitonu ki se Mafuaga e se lava tena iloa io me ko tena atamai. Kae e fakaaloalo atu eiloa latou ki saienitisi, kolā e fai ne latou a tino ke se ‵saga atu ki te ‵tou Mafuaga. (Loma 1:25) Kafai e fakalogo‵logo tatou ki vaegā akoakoga penā, e mafai ei o tapea‵pea atu tatou keatea mai i a Ieova, kae e mafai foki o gasolo ifo ‵tou a‵lofa.—Epe. 3:12.

8. (a) Ne a tulaga fakaloto vāivāi e fe‵paki mo tino e tokouke o Ieova? (e) Se a te fakatalitonuga e maua ne tatou i te Salamo 136?

 ⁸ A te taliaga o te loto vāivāi e mafai o fakavāivāi ei ‵tou fakatuanaki kae fai ei ke gasolo ifo ‵tou a‵lofa ki te Atua. I te lalolagi masei tenei e pule ne Satani, e fe‵paki eiloa tatou katoa i nisi taimi mo tulaga fakaloto vāivāi. (1 Ioa. 5:19) Kāti ko fe‵paki nei tatou mo fakalavelave ona ko te olaga matua, masaki, io me ko tulaga faiga‵ta i mea tau tupe. Io me kāti e maua ne tatou a lagonaga me e se lava ‵tou atamai, fakamoemoega seki fakataunugina, io me ko vāivāiga totino. Kae e se ‵tau lele eiloa o talia ne tatou a vaegā tulaga io me ko lagonaga penā ke tali‵tonu ei me ko oti ne tiaki tatou ne Ieova. I lō te fai penā, e ‵tau o mafaufau ‵loto tatou ki pati a‵lofa e uiga ki te alofa tumau o Ieova ki a tatou. E maua ne tatou a vaegā pati penā i te Salamo 136:23, telā e fai mai: “Ne seki fakapuli ne ia tatou i taimi ne taka‵vale ei tatou; i tena alofa e se gata mai.” A te ‵tonuga loa, e tumau faeloa te alofa fakamaoni o Ieova ki ana tavini. Tela la, e mafai o mautinoa i a tatou me e lagona ne ia ‵tou “talosaga” mō se fesoasoani kae tali mai ki ei.—Sala. 116:1; 136:24-26.

9. Ne maua mai i fea ne Paulo a te malosi ke fakatumau tena alofa ki te Atua?

⁹ E pelā mo te faisalamo, ne maua ne Paulo a te malosi mai te mafaufau ki te fesoasoani tumau o Ieova. Ne tusi mai a Paulo: “A Ieova ko toku fesoasoani, ka se mataku lele au. Se a te mea e mafai o fai ne te tagata ki a au?” (Epe. 13:6) A te loto talitonu ‵mautakitaki tenā ki te alofa atafai o Ieova ne fesoasoani atu ki a Paulo ke fa‵ki i fakalavelave o te olaga. Ne seki talia ne ia a tulaga sē ‵lei konā ke fakavāivāi atu ki a ia. E tonu, i te taimi ko fai ei a ia mo pagota, ne tusi atu ne Paulo a nai tusi fakamalosi loto. (Efe. 4:1; Fili. 1:7; File. 1) Ao, kafai foki loa ko fi‵ta malosi tou tagata, ne tumau eiloa tena alofa ki te Atua. Se a te mea ne fakamalosi aka ei a ia? Ne tumau eiloa a ia i te fakalagolago ki “te Atua o fakamafanafanaga katoa, kae e fakamafanafana mai a ia ki a tatou i ‵tou puapuaga katoa.” (2 Koli. 1:3, 4) E fakaakoako atu pefea tatou ki a Paulo kae fakatumau te malosi o ‵tou a‵lofa ki a Ieova?

10. E fakatumau pefea ne tatou te malosi o te ‵tou a‵lofa ki a Ieova?

¹⁰ A te auala tāua e tasi ke fakatumau te malosi o ‵tou a‵lofa ki a Ieova ko te mea telā ne taku mai ne Paulo. Ne tusi atu a ia ki taina tali‵tonu: “‵Talo faeloa.” Fakamuli ifo ne tusi mai a ia: “Ke ‵talo faeloa.” (1 Tesa. 5:17; Loma 12:12) A te faipati atu e auala i ‵talo ko te fakavae o se fesokotakiga ‵pili mo te Atua. (Sala. 86:3) Kafai e lava te taimi ke fakaasi atu ‵tou mafaufauga mo lagonaga ‵loto ki a Ieova, e se mafai o gata te ‵tou pili atu ki te ‵tou Tamana faka-te-lagi, te Tino e ‘tali mai ki talosaga.’ (Sala. 65:2) E se gata i ei, kafai ko iloa ne tatou a te tali a Ieova ki ‵tou ‵talo, e gasolo aka ei ki luga ‵tou a‵lofa ki a ia. E kamata o iloa faka‵lei atu ne tatou me “e pili faeloa a [Ieova] ki a latou kolā e ka‵laga atu ki a ia.” (Sala. 145:18) Ka fesoasoani mai a te loto talitonu tenā ki te fesoasoani alofa o Ieova ke fa‵ki tatou i nisi tofotofoga o te fakatuanaki.

11, 12. E ati aka pefea ne tatou a te alofa ‵loto ki te munatonu i te Tusi Tapu?

¹¹ E pelā me ne Kelisiano, e fakatāua kae puke ‵mautakitaki tatou ki te munatonu. A te Muna a te Atua ko te māfuaga sili o te munatonu. I se ‵talo ki tena Tamana, ne fai mai a Iesu: “A tau muna ko te munatonu.” (Ioa. 17:17) Tela la, e kamata eiloa te alofa ki te munatonu e auala i te mauaga o te iloaga tonu o te Muna a te Atua. (Ko. 1:10) Kae e uke atu a mea e aofia i ei i lō te mauaga fua o te iloaga. Mafaufau ki te auala ne fesoasoani mai a te tino ne fakaosofia ke tusi ne ia te Salamo 119 ke malamalama i te uiga o te alofa ki te munatonu i te Tusi Tapu. (Faitau te Salamo 119:97-100.) E mata, e fakaaoga faka‵lei ne tatou a taimi e lava ke mafaufau ‵loto, io me mafaufau faeloa ki fuaiupu i te Tusi Tapu i  te aso kātoa? Ka momea aka te fakatāua ne tatou a te munatonu i te Tusi Tapu māfai e mafaufau ‵loto tatou ki auala e maua ne tatou a mea aoga i te taimi e fakagalue aka ei i ‵tou olaga.

¹² Ne toe fai mai te faisalamo: “Ko oko eiloa te suamalie o au tulafono, e suamalie atu i te hani.” (Sala. 119:103) E tonu, e mafai o suamalie ki a tatou a mea‵kai faka-te-agaga kolā e fakavae ki te Tusi Tapu kae e maua ne tatou mai te fakapotopotoga a te Atua. E ‵tau o ‵teu aka a mea konā i se koga fakatusa ko te mea ke mafai o toe fakamasausau ne tatou “a muna fakamafanafana loto” o te munatonu kae fakaaoga ke fesoasoani atu ki nisi tino.—Fai. 12:10.

13. Se a te mea ne fesoasoani atu ki a Ielemia ke alofa ki te munatonu faka-te-Tusi Tapu, kae ne fakamalosi aka pefea a ia i ei?

¹³ Ne alofa malosi a te pelofeta ko Ielemia ki te munatonu i te Tusi Tapu. Mafaufau ki te ma‵losi o muna a te Atua i tena loto. “Ne faipati mai koe ki a au, kae ne fakalogo faka‵lei eiloa au ki au muna katoa ne fai. Te Aliki te Atua Malosi, au e o koe, tela la, au muna e aumai ne ia te fiafia ki toku loto.” (Iele. 15:16) Ne fakalogologo faka‵lei eiloa a Ielemia ki muna tāua a te Atua mai te mafaufau ‵loto ki ei. I te faiga penā, ne ati aka ei ne ia a te loto fakafetai ki te tauliaga ke tauave ne ia te igoa o te Atua. E mata, ne fakamalosi aka tatou ne te ‵tou a‵lofa ki te munatonu i te Tusi Tapu ke lavea atu a te tauliaga tu ‵kese ke tauave te igoa o te Atua kae folafola atu tena Malo i te taimi tenei o te gataga?

14. E fakamalosi aka pefea ne tatou ‵tou a‵lofa ki te munatonu i te Tusi Tapu?

¹⁴ I tafa o te faitauga ki te Tusi Tapu mo ‵tou tusi faka-te-Tusi Tapu, ne a nisi auala e mafai o ati aka ei se alofa ‵loto ki te munatonu i te Tusi Tapu? E mafai o momea aka ‵tou a‵lofa ki te munatonu i te Tusi Tapu mai te ‵kau atu faeloa ki fakatasiga a te fakapotopotoga. A te sukesukega ki te Tusi Tapu i vaiaso katoa fakatasi mo te fesoasoani o Te Faleleoleo Maluga ko te auala fakavae e akoakogina ei tatou. Ke malamalama faka‵lei i te mataupu telā e sukesuke ki ei, e ‵tau o fakatoka faka‵lei tatou i taimi takitasi mō te Sukesukega ki te Faleleoleo Maluga. E tasi o auala ke fai penā ko te onoono ki tusi fai‵tau katoa i te Tusi Tapu. I aso nei, ko mafai o ‵kopi mai a Te Faleleoleo Maluga mai te fakatuatusi i te itaneti ko te  jw.org io me e onoono ki ei i te polokalame o te JW Library i ‵gana e uke. Nisi polokalame e mafai ei o onoono fakavave ki tusi fai‵tau mai mataupu mō sukesukega takitasi. Kae faitalia me se a te auala e fakaaoga ne tatou, a te faitau faka‵lei ki tusi fai‵tau konei kae mafaufau ‵loto ki ei ka fai ei ke ‵loto atu ‵tou a‵lofa ki te munatonu i te Tusi Tapu.—Faitau te Salamo 1:2.

15, 16. (a) E ‵tusa mo te Ioane 13:34, 35, se a te tiute e maua ne tatou? (e) Se a te sokoga i te alofa ki ‵tou taina mo te alofa ki te Atua mo te Tusi Tapu?

¹⁵ I tena toe po i te lalolagi, ne fai atu a Iesu ki ana soko: “Ko tuku atu ne au ki a koutou se fakatonuga fou, ke fakatau a‵lofa koutou; e pelā eiloa mo au ne alofa ki a koutou, ke fakatau a‵lofa foki koutou. Ona ko te mea tenei ka iloa ei ne tino katoa i a koutou ko oku soko, manafai e fakatau a‵lofa koutou.”—Ioa. 13:34, 35.

¹⁶ A te alofa ki ‵tou taina mo tuagane e isi sena sokoga ki te ‵tou a‵lofa ki a Ieova. A te ‵tonuga loa, e se mafai o fai ne tatou se mea e tasi e aunoa mo te suā mea. Ne tusi mai te apositolo ko Ioane: “Me ko te tino telā e se alofa ki tena taina, telā ko oti ne matea ne ia, e se mafai o alofa ki te Atua, telā e seki matea ne ia.” (1 Ioa. 4:20) E se gata i ei, a te ‵tou a‵lofa ki a Ieova mo ‵tou taina e isi sena sokoga ki te ‵tou a‵lofa ki te Tusi Tapu. Kaia? Me e fakamalosi aka tatou ne te alofa ki te munatonu i te Tusi Tapu ke faka‵logo mai i ‵tou loto ki fakatonuga faka-te-Tusi Tapu ke a‵lofa ki te Atua mo ‵tou taina.—1 Pe. 1:22; 1 Ioa. 4:21.

17. Ne a nisi auala e mafai o fakaasi atu ne tatou a te alofa?

¹⁷ Faitau te 1 Tesalonia 4:9, 10. Ne a nisi auala aoga e mafai o fakaasi atu ne tatou te alofa i ‵tou fakapotopotoga? Kāti se taina io me se tuagane matua e manako ki se fesoasoani ke kau ki fakatasiga Kelisiano. Kāti e manako se fafine ko mate tena avaga ke faite a nai koga ma‵sei i tena fale. (Iako. 1:27) Faitalia me koi fo‵liki io me ko ma‵tua, e ‵tau eiloa o ‵saga atu, fakamalosi atu, kae fakamafanafana atu ne tatou a taina mo tuagane kolā ne loto vāi‵vai io me loto mafatia io me fe‵paki mo nisi tofotofoga. (Faata. 12:25; Ko. 4:11) E tuku atu ne tatou a fakamaoniga me e a‵lofa tonu tatou ki ‵tou taina mo tuagane māfai e fakaasi atu ne tatou i pati mo faifaiga me e manava‵se malosi tatou “ki a latou kolā e kāiga tatou i te tapuakiga tonu.”—Kala. 6:10.

18. Se a te mea ka fesoasoani mai ke fakatoka faka‵lei a tamā kinauga i va o taina tali‵tonu?

¹⁸ Ne ‵valo mai i te Tusi Tapu me i “aso fakaoti” o te olaga masei tenei ka fakamailoga ki se uiga kaiu kae kaimanako. (2 Timo. 3:1, 2) E pelā me ne Kelisiano, e ‵tau o ga‵lue malosi tatou o ati aka ‵tou a‵lofa ki te Atua, te munatonu i te Tusi Tapu, mo ‵tou taina. E tonu, e mafai o isi ne tamā kinauga i va o taina tali‵tonu. Kae se fakamanuiaga gali ‵ki māfai e fakamalosi aka a tino katoa i te fakapotopotoga ne te alofa ke fakatoka faka‵lei a mea konā i se auala alofa! (Efe. 4:32; Ko. 3:14) Tela la, ke mo a eiloa ma talia ne koe ke gasolo ifo tou alofa! I lō te fai penā, ke na tumau eiloa tatou i te fakaasi atu o te alofa ‵loto ki a Ieova, tena Muna, mo ‵tou taina.