1. E ‵tusa mo te Failauga 7:20, se a te mea ne akoako mai ne te tupu ko Solomona?

 NE TUSI mai te tupu ko Solomona: “Me e seai se tagata amiotonu i te lalolagi e fai faeloa ne ia te mea ‵lei kae e se agasala.” (Fai. 7:20) E tonu ‵ki eiloa! A tatou ne tino agasala katoa. (1 Ioa. 1:8) Tela la, e ‵tau eiloa o maua ne tatou katoa a te fakamagaloga a te Atua mo nisi tino.

2. Ne a ou lagonaga māfai ne fakamagalo koe ne se taugasoa pili?

² E mautinoa me e masaua ne koe se taimi ne fai ei ne koe ke kaitaua sou taugasoa pili. Ne manako koe ke fakatoka te fakalavelave kae ke faka‵lei te lua fesokotakiga, tela la, ne fakatoese atu koe mo tou loto kātoa ki a ia. Ne a ou lagonaga māfai ko fakamagalo ne ia koe? Filemu tou mafaufau? Ao, kae fiafia foki!

3. Ne a mea ka sau‵tala tatou ki ei i te mataupu tenei?

³ E ma‵nako tatou ke fai a Ieova mo fai ‵tou toe taugasoa pili, kae i nisi taimi e fai‵pati io me e fai ne tatou a mea kolā e fakafanoanoa ki a ia. Kaia e tali‵tonu tatou me i a Ieova e manako malosi o fakamagalo tatou? I auala fea e tu ‵kese ei a te fakamagaloga a Ieova mai te auala e fakamagalo ne tatou a nisi tino? Ako te ‵toe mea, ko oi e mafai o maua ne latou te fakamagaloga a te Atua?

4. Kaia e mautinoa i a tatou me e toka a Ieova o fakamagalo?

⁴ E fakamaoni mai ne te Muna a te Atua me e toka a Ieova o fakamagalo. I te taimi ne fakaasi atu ne Ieova a ia eiloa ki a  Mose i luga i te Mauga o Sinai, ne faipati atu a Ia e auala i se agelu: “Ieova, Ieova, te Atua alofa fakamagalo kae alofa atafai, e tuai o ita kae ‵fonu i te alofa fakamaoni mo te munatonu, e fakaasi ne ia te alofa fakamaoni ki te fia afe o tino, kae fakamagalo ne ia a mea ‵se mo amioga solitulafono mo agasala.” (Eso. 34:6, 7) A Ieova se Atua atafai kae alofa fakamagalo, telā e toka o fakamagalo a tino agasala māfai ko sala‵mō.—Nee. 9:17; Sala. 86:15.

5. E ‵tusa mo te Salamo 103:13, 14, ona ko te iloa ‵lei ne ia o tino, se a te mea ne fakamalosi atu ke fai ne Ieova?

⁵ E pelā me ko te ‵tou Mafuaga, e iloa ne Ieova a mea katoa e uiga ki a tatou. Mafaufau la! E iloa ne ia a fakamatalaga katoa e uiga ki tino taki tokotasi i te lalolagi tenei. (Sala. 139:15-17) Tela la, e mafai o lavea ne ia a tulaga sē ‵lei katoatoa o tatou kolā ne maua mai i ‵tou mātua. E se gata i ei, e iloa katoa ne ia a mea ne ‵tupu ki a tatou kolā ne māfua i ei ‵tou uiga. Se a te mea e fakamalosi atu ke fai ne Ieova ona ko te iloa ‵lei ne ia o tino? E fakamalosi aka ei ke fakaasi mai ne ia te alofa fakamagalo ki a tatou.—Sala. 78:39; faitau te Salamo 103:13, 14.

6. Ne fakamaoni mai pefea ne Ieova me e manako malosi a ia ke fakamagalo tatou?

⁶ Ne fakamaoni mai ne Ieova me e manako malosi a ia ke fakamagalo tatou. E malamalama a ia me ne fakasala tatou ki te agasala mo te mate ona ko faifaiga a te tagata muamua ko Atamu. (Loma 5:12) E se mafai lele eiloa ne tatou io me se isi tino o fakamagalo tatou mai te fakasalaga tenei. (Sala. 49:7-9) Kae e ui i ei, ne fakaasi mai ne te ‵tou Atua alofa a te atafai kae fakatoka ne ia se mea ke fakasaoloto ei tatou. Ne a ana mea ne fai? E pelā mo te Ioane 3:16, ne uga mai ne ia tena Tama fagasele ke mate mō tatou. (Mata. 20:28; Loma 5:19) Ne sui ne Iesu a tatou—ke logo‵mae kae fakasala ki te mate—ke fakasaoloto so se tino telā e fakaasi atu te fakatuanaki ki a ia. (Epe. 2:9) Ko oko eiloa i te logo‵mae o Ieova ke kilo ifo ki tena Tama pele e tigaina i se mate fakalogo‵mae kae fakamasiasi! E mautinoa me e se mafai o talia ne Ieova tena Tama ke mate māfai e se manako a ia ke fakamagalo tatou.

7. Ne a nisi fakaakoakoga i te Tusi Tapu e uiga ki tino kolā ne fakamagalo ne Ieova?

⁷ E ‵fonu te Tusi Tapu i tala o tino kolā ne fakamagalo ne Ieova. (Efe. 4:32) Ko oi  e mafaufau koe ki ei? Kāti ko te tupu ko Manase. A te tagata masei tenā ne agasala ki a Ieova i auala matagā. Ne fai ne ia ke ‵kau atu a nisi tino ki a ia i tapuakiga ‵se. Ne tamate ne ia ana tama‵liki kae ofo atu e pelā me ne taulaga ki atua fapaupau. E se gata i ei, ne tuku ne ia se fakatusa faite o se atua ‵se i te faletapu ‵malu o Ieova. Ne fai mai te Tusi Tapu e uiga ki a ia: “Ne fai ne ia a mea matagā e uke i te kilokiloga a Ieova, telā ne fai ei ke kaitaua a ia.” (2 Nofo. 33:2-7) Kae i te taimi ne fakaasi atu ne Manase tena salamō tonu, ne fakamagalo a ia ne Ieova. Ne toe fakafoki atu a ia ki tena tulaga tupu. (2 Nofo. 33:12, 13) Kāti ko mafaufau foki koe ki te tupu ko Tavita, telā ne fai ne ia a agasala matagā ki a Ieova, e aofia i ei te mulilua mo te tatino. Kae e tiga eiloa te feitu tenā, i te taimi ne salamō tonu kae talia tena mea ‵se, ne fakamagalo foki a ia ne Ieova. (2 Samu. 12:9, 10, 13, 14) Ao, e tali‵tonu tatou i a Ieova e manako malosi ke fakamagalo tatou. Kae e pelā mo te mea ka lavea ne tatou, e tu ‵kese eiloa tena malosi ke fakamagalo māfai e fakatusa ki tino.

8. Se a te sokoga i te tulaga tu ‵kese o Ieova e pelā me se Famasino mo tena malosi ke fakamagalo atu?

⁸ A Ieova ko te “Famasino o te lalolagi kātoa.” (Kene. 18:25) A te Famasino ‵lei e manakogina ke lasi tena iloa i te tulafono. Kae e penā foki eiloa a Ieova, me i tafa o te fai pelā me ko te ‵tou Famasino, a ia foki ko te ‵tou Tino Fai Tulafono. (Isa. 33:22) E seai eiloa se tino e ‵pau mo Ieova i te lasi o tena iloa i te mea tonu mo te mea ‵se. Ne a mea e manakogina ke fai ne se famasino ‵lei? E ‵tau o iloa ne ia a fakamatalaga ‵tonu katoa e uiga ki se tagi a koi tuai o fai tena fakamasinoga. I te tulaga tenei, ko Ieova tokotasi fua te ‵toe Famasino ‵lei.

9. Ne a fakamatalaga e iloa ne Ieova māfai e fai tena fakaikuga ke fakamagalo?

⁹ E ‵kese mo nisi famasino, e iloa ‵lei ne Ieova a fakamatalaga ‵tonu katoa e uiga ki so se tagi e fai atu ki a ia. (Kene. 18:20, 21; Sala. 90:8) E seai sena tapula ki mea kolā e lavea kae lagona ne tino. E iloa ne ia me e māfua mai a faifaiga a tino mai i ana mātua, tena putiakaga, mo te koga e nofo a ia i ei, penā foki mo ana lagonaga mo te tulaga o tena mafaufau. E lavea foki ne Ieova a loto o tino. E iloa ‵lei ne ia a manakoga o tino taki tokotasi. E seai eiloa se mea e mafai o ‵funa mai i a Ieova. (Epe. 4:13) Tela la, a te fakamagaloga a Ieova e fakavae faeloa ki te katoatoa o tena iloa e uiga ki te tulaga o se tino.

10. Kaia e fai ei tatou me i fakamasinoga a Ieova e ‵tonu faeloa? (Teutelonome 32:4)

¹⁰ A fakamasinoga a Ieova e ‵tonu faeloa. E se fakailoga tino a ia. E se fakavae tena fakamagaloga ki foliga o se tino, tena maumea, tena takutakua, io me ko ana taleni. (1 Samu. 16:7; Iako. 2:1-4) E sē se tino e mafai o faimālō io me e ‵togi fakakolekole ne ia a Ieova. (2 Nofo. 19:7) E se mafai o pokotia ana fakaikuga ona ko te kaitaua io me ko te kilokiloga a nisi tino. (Eso. 34:7) E sē se fakalotolotolua me i te malamalama o Ieova mo te lasi o tena iloa e fai ei a ia mo fai te ‵toe Famasino ‵lei.—Faitau te Teutelonome 32:4.

11. Se a te mea e tu ‵kese i ei a te fakamagaloga a Ieova?

¹¹ A tino tusitala o Tusitusiga Epelu, ne iloa ne latou a te tu ‵kese o te fakamagaloga a Ieova. I nisi taimi, e fakaaoga ne latou se pati Epelu telā e fai mai se tusi e tasi, me “e fakaaoga fua ke fakasino ki te fakamagaloga ne te Atua se tino agasala, kae e se mafai o fakasino ki te fakamagaloga ne se tino a te suā tino.”  Ko Ieova tokotasi fua e maua ne ia te malosi ke fakamagalo katoatoa se tino agasala. Ne a ikuga māfai ko fakamagalo tatou ne Ieova?

12-13. (a) Ne a mea fakafia‵fia ka maua ne se tino māfai ko fakamagalo ne Ieova? (e) E pefea te leva o te aoga o te fakamagaloga a Ieova?

¹² Kafai e talia ne tatou a te manatu tonu me ko oti ne fakamagalo ne Ieova a tatou, e maua ne tatou te “malosi fou,” e aofia i ei a te filemu o te mafaufau mo se loto lagona ‵lei. A te vaegā fakamagaloga tenā e se maua mai i tāgata, kae e maua fua mai “i a Ieova.” (Galu. 3:19) Kae kafai e fakamagalo tatou ne Ieova, e toe faka‵lei katoatoa ne ia a te ‵tou fesokotakiga mo ia, e pelā eiloa me ne seki agasala tatou ki a ia.

¹³ Kafai ko fakamagalo tatou ne Ieova, e se mafai o toe fakamasino io me fakasala ne ia tatou ki te agasala tenā. (Isa. 43:25; Iele. 31:34) E faka‵mao ne Ieova a ‵tou agasala “e pelā eiloa mo te ‵mao o te saegala mai te togala.” * (Sala. 103:12) Kafai e mafau‵fau tatou ki te lasi o te fakamagaloga a Ieova, ka lasi ‵ki eiloa te ‵tou loto fakafetai mo te fia‵fia. (Sala. 130:4) Kae ko oi e mafai o maua ne latou te fakamagaloga tenei mai i a Ieova?

14. Ne a mea ko oti ne tauloto ne tatou e uiga ki te fakaikuga a Ieova ke fakamagalo se tino?

¹⁴ E pelā mo te mea ne lavea ne tatou, a te fakaikuga a Ieova ke fakamagalo e se fakavae ki te lasi io me ko te foliki o te agasala. E se gata i ei, ne tauloto ne tatou me e fakaaoga ne Ieova tena poto e pelā me ko te ‵tou Mafuaga, te Tino Fai Tulafono, mo te ‵tou Famasino māfai ko fakaiku aka ne ia ke fakamagalo se tino. Ne a mea e mafaufau ki ei a Ieova a koi tuai o fakamagalo ne ia se tino?

15. E ‵tusa mo te Luka 12:47, 48, se a te mea e tasi e onoono ki ei a Ieova?

¹⁵ E tasi te mea e onoono ki ei a Ieova, me ko te tino e iloa ne ia io me ikai a te ‵se o tena mea ne fai. Ne fakaasi faka‵lei mai ne Iesu a te mea tenei i te Luka 12:47, 48. (Faitau.) A te tino telā e mafaufau mo te loto fiafia ke fai ne ia se mea masei—kae e iloa ‵lei ne ia me se mea e fakafanoanoa ki a Ieova—e agasala a ia i se auala matagā. E fakamataku te tulaga o te tino tenā me e mafai o se fakamagalo tena  agasala. (Male. 3:29; Ioa. 9:41) Kae e fakaasi ‵tonu atu ne tatou me i nisi taimi, e iloa ne tatou a te ‵se o te mea ne fai ne tatou. E mata, e mafai o fakamoe‵moe tatou ke maua te fakamagaloga? Ao! Me e isi foki se mea telā e onoono ki ei a Ieova.

16. Se a te salamō, kae kaia e tāua ei māfai e ma‵nako tatou ke fakamagalo ne Ieova?

¹⁶ A te suā mea telā e onoono ki ei a Ieova me ko te tino agasala e salamō tonu io me ikai. Se a te uiga o te salamō? A te salamō e fakauiga ki te “‵fuli o te mafaufau, te kilokiloga, io me se manakoga o se tino.” E aofia i ei a te manatu me e fanoanoa a te tino ki mea ma‵sei ne fai ne ia io me ko te sē fai ne ia a mea ‵tonu kolā ne ‵tau o fai ne ia. A te tino salamō e se fanoanoa fua ki mea ‵se ne fai ne ia, kae fanoanoa foki i te sē ‵lei o tena tulaga faka-te-agaga telā ne iku atu ei ki te faiga o mea ‵se konā. Masaua me i te tupu ko Manase mo Tavita, ne fai ne lāua a agasala matagā; kae ne fakamagalo ne Ieova lāua ona ko te lā sala‵mō tonu. (1 Tupu 14:8) Ao, e mafai fua o fakamagalo ne Ieova tatou māfai e lavea atu ne ia a fakamaoniga o te salamō tonu. Kae e isi aka foki ne mea e ‵tau o fai ne tatou mai tafa o te salamō io me ko te fanoanoa ki agasala ne fai ne tatou. E ‵tau foki o toka tatou o fai a mea e ‵tau o fai. * Kae tenā te suā mea e onoono ki ei a Ieova.

17. Se a te ‵fuliga, kae kaia e tāua ei ke se toe fai ne tatou a agasala mua? (Isaia 55:7)

¹⁷ A te suā mea tāua e onoono ki ei a Ieova ko te ‵fuliga. A te ‵fuliga e fakauiga ki te “tiaki.” I nisi tugapati, e ‵tau mo se tino o ‵fuli ana auala mai te tiaki o ana auala ma‵sei kae kausaki atu ki auala o Ieova. (Faitau te Isaia 55:7.) E ‵tau mo te tino o ‵fuli tena mafaufau ko te mea ke takitaki a ia ne te mafaufau o Ieova. (Loma 12:2; Efe. 4:23) E ‵tau o fakaiku aka ne ia ke tiaki ana mafaufauga mo faifaiga ma‵sei. (Kol 3:7-10) E tonu, ko te ‵tou fakatuanaki ki te taulaga a Keliso, e tuku mai i ei a te fakavae tonu, ke fakamagalo kae faka‵ma ‵tou agasala ne Ieova. Ka fakaaoga foki ne Ieova a te aoga o te taulaga tenā ki a tatou māfai e lavea ne ia me e taumafai malosi tatou o ‵fuli ‵tou faifaiga.—1 Ioa. 1:7.

18. Ne a mea ne onoono tatou ki ei e uiga ki te fakamagaloga a Ieova?

¹⁸ Ke toe onoono malie tatou ki manatu tāua ne sau‵tala tatou ki ei. A Ieova ko te ‵toe Tino sili i te iunivesi i te fakamagalo o tino agasala. Kaia e fai atu ei tatou penā? Muamua, me e toka faeloa a ia o fakamagalo. Te lua, e iloa ‵lei ne ia tatou. E iloa ‵lei ne ia te ‵tou faitega kae e fai foki a ia mo fai te ‵toe Tino ‵lei ke fakaiku aka me e salamō ‵tonu tatou io me ikai. Ako te tolu, kafai e fakamagalo tatou ne Ieova, e fakamagalo katoatoa ne ia tatou e pelā me e seki agasala aka eiloa tatou. E fai ei ne te mea tenei ke maua ne tatou se lagonaga ‵ma mo tena taliaga.

19. E tiga eiloa ‵tou tulaga sē ‵lei katoatoa, kaia e mafai o fia‵fia tatou?

¹⁹ E tonu, ka fai faeloa ne tatou a te agasala ona ko tatou e se ‵lei katoatoa. Kae e tiga eiloa te feitu tenā, e maua ne tatou se fakamafanafanaga mai i pati i te Insight on the Scriptures, Tusi 2, itulau 771: “Ona ko Ieova e masaua ne ia mo te alofa a vāivāiga o ana tavini, e se manakogina ke fanoa‵noa faeloa latou ona ko olotou mea ‵se ne fai kolā ne iku mai i te lotou tulaga sē ‵lei katoatoa. (Sala. 103:8-14; 130:3) Kafai e taumafai malosi latou o sa‵sale faeloa i auala o te Atua, ka fia‵fia eiloa latou. (Fpi 4:4-6; 1Io 3:19-22).” Ko oko eiloa i te fakamalosi loto o te manatu tenā!

20. Ne a mea ka onoono tatou ki ei i te suā mataupu?

²⁰ E loto fakafetai tatou me i a Ieova e toka o fakamagalo tatou māfai e sala‵mō tonu ki ‵tou agasala. Kae e mafai pefea o fakaakoako tatou ki te loto fakamagalo o Ieova? E ‵pau kae ‵kese foki pefea a te fakamagaloga ne tatou a nisi tino mo te fakamagaloga a Ieova? Kaia e tāua ei ke iloa ne tatou a te ‵kesega tenā? Ka tali aka a fesili konā i te suā mataupu.