Kai faitau faka‵lei eiloa koe ki lōmiga ‵fou o Te Faleleoleo Maluga? Onoono aka, me e mafai o tali mai ne koe a fesili konei:

Kafai ko tuku mai a fakatonuga mai te fakapotopotoga a te Atua, se a te kilokiloga e ‵tau o maua ne taina, e pelā mo ovasia o te fenua mo toeaina o te fakapotopotoga?

E ‵tau o faka‵logo vave latou. E mafai o fesili ifo latou: ‘E mata, e fesoasoani atu au ki te feitu faka-te-agaga o tino i oku tafa? E mata, e talia vave kae ‵lago atu foki au ki fakatonuga kolā ne tuku mai?’—w16.11, itu. 11.

Anafea ne ‵nofo fakapagota ei a Kelisiano ‵tonu mai i lalo i Papelonia?

Ne tupu eiloa te mea tenei mai tua malie o te taimi ne ‵mate atu ei a te kau apositolo. I te taimi tenā, ne kamata o sae aka se potukau o faifeau. Ne fakamalosi aka ne te Lotu mo te Malo a te Lotu Kelisiano aposetate kae taumafai ke fakaseai atu a leo o Kelisiano kolā e fai pelā me ne saito. Kae i te fia sefulu o tausaga mai mua o te 1914, ne kamata o ‵vae keatea a te kau fakaekegina.—w16.11, itu. 23-25.

Kaia ne tāua ‵ki eiloa a te galuega ne fai ne Lefèvre d’Étaples?

Talu mai te 1520, ne ‵fuli ne Lefèvre a te Tusi Tapu ki te ‵gana Falani ko te mea ke mafai o fai‵tau ki ei a tino masani. Ne fakamalosi atu ki a Martin Luther, Wiiliam Tyndale, mo John Calvin ana fakamatalaga e uiga ki fuaiupu i te Tusi Tapu.—wp16.6-E, itu. 10-12.

Se a te ‵kese o “te mafaufau faeloa ki mea faka-te-foitino” mo “te mafaufau faeloa ki te agaga”? (Loma 8:6)

A te tino telā e fai ne ia te mea muamua e saga atu ki manakoga mo takitakiga o te foitino sē ‵lei katoatoa, mai te faipati e uiga ki ei mo te tavae atu faeloa o mea faka-te-foitino. A te tino telā e fai ne ia a te mea fakamuli e fakavae tena olaga ki mea kolā e isi se lotou sokoga ki te Atua mo ana mafaufauga; e takitaki eiloa a te vaegā Kelisiano tenā ne te agaga tapu. E iku atu a te mea muamua ki te mate, kae ko te mea fakamuli ki te ola mo te filemu.—w16.12, itu. 15-17.

Ne a nisi faifaiga aoga ke fakafeoloolo aka ei te manavase?

Fakatulaga muamua a mea kolā e tāua, fai ne fakamoemoega ‵lei, fakaavanoa faeloa se taimi i aso katoa mō koe eiloa, mafaufau ki mea ne faite ne te Atua, tumau i ou uiga fai fa‵kata, mo te fakamalosi faeloa o te foitino kae ke lava foki te malōlō.—w16.12, itu. 22-23.

“Ne ave ei keatea a Enoka ko te mea ke se lavea ne ia te mate.” (Epe. 11:5) Ne ave keatea pefea?

E foliga mai me ne avatu faka‵lei ne te Atua a Enoka mai te ola ki te mate e aunoa mo te iloa ne ia me i a ia ko mate.—wp17.1-E, itu. 12-13.

Kaia koi tāua eiloa a te agamalu?

E aofia i te agamalu a te mauaga o se kilokiloga ‵lei e uiga ki a tatou kae iloa ‵lei foki ‵tou tapula. E ‵tau o fakaeteete tatou ki te pokotia o nisi tino i ‵tou amioga kae ke mo a ma tō fakatāua ne tatou a tatou eiloa.—w17.01, itu. 18.

Se a te fakamaoniga me ne takitaki ne te Atua a te potukau pule i te senitenali muamua, e pelā eiloa mo te takitakiga ne ia o latou kolā e aofia i te Potukau Pule i aso nei?

Mai te fesoasoani o te agaga tapu, e malamalama latou i muna‵tonu i te Tusi Tapu. Ne tausi ne latou te faiga o te galuega talai, fakatasi mo te fesoasoani o agelu, kae ne fakalagolago latou ki te Muna a te Atua i te taimi e tuku mai ei ne latou a takitakiga. E penā foki eiloa i aso nei.—w17.02, itu. 26-28.

Ne a manatu ‵tonu kolā e fai ei ke ‵kilo atu tatou ki te togiola e pelā me se mea tāua?

E fa a manatu ‵tonu: Ko oi ne tuku mai ne ia, kaia ne tuku mai ei, se a te taulaga ne aofia i ei, kae se a te manakoga tonu ne fakataunu mai i ei. E ‵tau mo tatou o mafau‵fau ‵loto ki te auala ne aofia ei a manatu ‵tonu konā.—wp17.2-E, itu. 4-5.

Kafai ko oti ne fakaiku aka se mea, se a te mea e mafai o ‵fuli ei ne se Kelisiano tena mafaufau?

E ‵tau o fakamaoni tatou ki ‵tou pati. Kae i nisi taimi e ‵tau o toe mafaufau ki se fakaikuga. I te taimi ne sala‵mo ei a tino, ne ‵fuli ne te Atua tena fakaikuga e uiga ki Nineva. I nisi taimi, e manakogina ke fai tatou penā ona ko fakanofonofoga io me ko fakamatalaga ‵fou.—w17.03, itu. 16-17.

Kaia e fakamataku ‵ki ei a pati fakamasei?

E mafai o fai ne pati fakamasei ke gasolo aka o masei se fakalavelave i se auala telā ko se mafai o toe faka‵lei. Faitalia me ko tatou e ‵tonu io me ‵se, a te fai atu o pati fakalogo‵mae ka se fakafeoloolo aka ei te fakalavelave.—w17.04, itu. 21.