A DON, se Molimau a Ieova i Kanata, ne taumafai malosi i se auala fakapito ke faipati atu ki tino kolā e ‵nofo i auala. Ne fakamatala mai ne Don se mea e uiga ki se tokotasi o latou konei: “E tokotasi te tagata e seai sena fale e igoa ki a Peter, tasi o toe tagata lailai eiloa ne lavea ne au i auala. Ne fakatakalialia ‵ki a ia kae ne poto foki a ia i te faiga o tino ke faka‵mao mai i a ia. Ne ‵teke atu faeloa a ia ki faifaiga atafai e uke a tino.” E sili atu i te 14 tausaga ne galue ei a Don i nisi taimi mo te kufaki ke fakaasi atu te uiga atafai ki te tagata tenei e seai sena fale.

I te aso e tasi, ne fesili atu a Peter ki a Don: “Kaia e saga mai faeloa koe ki a au? Ko se fia ‵saga mai ki a au a tino katoa. Kaia e atafai mai ei koe ki a au?” Ne fakaaoga eiloa mo te atamai ne Don a tusi fai‵tau e tolu mai te Tusi Tapu i se taumafaiga ke oko atu ki te loto o Peter. Muamua la, ne fesili atu a ia ki a Peter me e iloa ne ia i te Atua e isi sena igoa totino kae fakamolemole atu ke faitau eiloa a ia ki ei mai te Tusi Tapu i te Salamo 83:18. Oti aka, ke fakaasi atu te pogai e atafai atu ei a ia, ne fai ne Don ke faitau ne Peter te Loma 10:13, 14, telā e fakamatala mai i ei me i “tino katoa kolā e ka‵laga ki te igoa o Ieova ka ‵sao.” Ako te ‵toe mea, ne faitau atu ne Don a te Mataio 9:36 kae fai atu ki a Peter ke toe faitau mai eiloa ne ia. E fai mai te fuaiupu tenā penei: “I te laveaga ne ia o te vaitino, lagona ei ne ia tena alofa ki a latou me ko pa‵ka kae tuku tiaki latou e pelâ me ne mamoe kolā e seai se lotou tino tausi.” I konā, ne fesili atu a Peter mo loimata i ana mata: “E a, au se tokotasi o mamoe konei?”

Ne kamata o ‵fuli a Peter. Ne koukou, ‵kati faka‵lei tena talafa, kae pei ki gatu ‵lei kolā ne tuku atu ne Don. Ne fakatumau eiloa ne Peter ana foliga ‵ma.

Ne tausi ne Peter se tusi telā e fakamau i ei a mea ‵tupu i aso katoa. A vaega kamata o tena tusi tenā ne seki ‵gali kae fakafanoanoa, kae ne ‵kese eiloa ana mea fakamuli ne tusi ki lalo. E tasi mai i ei, e faitau penei: “Ne tauloto au ki te igoa o te Atua i te aso nei. Nei la, kafai ko ‵talo atu au, e mafai o ‵talo atu au ki a Ieova. Se mea gali ‵ki ke iloa  atu tena igoa. E fai mai a Don me e mafai o fai a Ieova mo fai toku Taugasoa, se tino telā e lava tena taimi ke fakalogologo mai ki a au, faitalia te taimi io me se a foki te mea e fai atu ki a ia.”

Ne fai atu eiloa a toe pati a Peter ki ana taina mo tuagane. Ne tusi mai a ia:

“E se malosi ‵lei au i te aso nei. Kāti ko te olaga matua ko tolotolo mai. Kae kafai tenei foki loa toku toe aso, e iloa ne au me ka toe fetaui māua mo toku taugasoa ko [Don] i te Palataiso. Kafai e faitau koe ki te tusi tenei, kae ko oti ne galo atu au. Kae kafai e lavea ne koe se tagata i te lotu o toku mate telā e se ‵tau o nofo atu i ei, faipati atu ki a ia, kae fakamolemole faitau ki te tamā tusi lanu moana tenei [e fakasino atu ki te tusi faka-te-Tusi Tapu ko “The Truth That Leads to Eternal Life” telā ne maua ne ia i te fia o tausaga ko ‵teka]. * E fai mai i ei me ka toe fetaui māua mo toku taugasoa i te Palataiso. E talitonu au ki te mea tenei mo toku loto kātoa. Ko te otou taina mo te tuagane pele, ko Peter.”

Mai tua o te lotu mō te mate, ne fakamatala mai a te tuagane o Peter ko Ummi: “Kāti ne fesokotaki mai a Peter ki a au i se lua tausaga ko ‵teka. Mai te fia o tausaga ko ‵teka, ne fatoa lavea atu eiloa mō te taimi muamua me ne foliga fiafia mai a ia. Ko fakamisikata foki a ia.” Ne fai atu tou fafine ki a Don: “Ka faitau au ki te tusi me i so se mea telā ne pokotia ei te loto o toku tuagane e ‵tau eiloa o tāua ‵ki.” Ne talia foki ne Ummi ke sukesuke a ia ki te tusi fou ko te Ne a Mea e Akoako ‵Tonu Mai i te Tusi Tapu? mo se Molimau a Ieova e tokotasi.

E mafai foki o se fakatāua ne tatou a foliga i tua, fakaasi atu te alofa tonu, kae kufaki ki tino katoa. (1 Timo. 2:3, 4) I te taimi e fai ei tatou penā, e mafai ei o fakamalosi ne tatou a tino, e pelā mo Peter, kolā e se mata‵gali i te kilokiloga a tino kae e ‵lei olotou loto. E mafai eiloa o mautinoa i a tatou me i te Atua telā e “kilo ki te loto,” ka fai eiloa ne ia ke ola aka te munatonu i loto o tino kolā e fetaui ‵lei ki ei.—1 Samu. 16:7; Ioa. 6:44.