A te manavase ki fakalavelave i te lalolagi e mafai o pokotia malosi i ei a tino i te feitu faka-te-foitino mo feitu tau lagonaga. A tino e tokouke kolā e pokotia i mea ‵tupu konei e mafai o ‵galo katoatoa olotou fakamoemoega. E ‵saga atu pefea latou ki ei?

• E ita fitifiti a nisi tino ke mafau‵fau ki aso mai mua.

• E faka‵galo ne nisi tino olotou manava‵se ki meainu ma‵losi mo vailakau tapu.

• E fakaiku aka ne nisi tino me e ‵lei atu ke ‵mate latou i lō te ola. “Kaia e ‵tau ei o ola tatou?” e fesili mai latou.

• E mafai o se tumau a nisi fakalavelave e fepaki mo koe kae e mafai o ‵fuli fakavave ki te ‵lei i se auala e seki fakamoemoegina.

• Kafai foki loa e se ‵fuli tou tulaga, e uke ‵ki a mea e mafai ne koe o fai ke fakafesagai faka‵lei atu koe ki ei.

• E fakamatala mai i te Tusi Tapu a te fakamoemoega tonu—se faka‵leiga tumau ki fakalavelave o tino.

E fai mai te Tusi Tapu: “Ke mo a ma manava‵se ki te aso ma taeao, me e manavase eiloa te aso ma taeao ki ana mea. E tofu eiloa te aso mo ana fakalavelave.”—Mataio 6:34.

Ke saga fua ki mea o te aso. Sa fai ke manavase koe ki te aso taeao telā ko se fai ei ne koe a mea e ‵tau o fai i te aso nei.

A te manavase ki mea sē ‵lei kolā kāti e mafai o ‵tupu, ka fakaopoopo atu fua ki tou fi‵ta kae fakavāivāi i ei tou fakamoemoega mō se olaga tai ‵lei atu i aso mai mua.

 Ne fai atu se faisalamo i aso mua i se ‵talo ki te Atua: “A tau muna se moli ki oku vae, kae se mainaga ki toku auala.” (Salamo 119:105) Mafaufau ki te auala e fai ei te Tusi Tapu—te Muna a te Atua—mo fai se mōli penā.

I se po pouli, e fesoasoani atu se mōli ke iloa ne tatou a te koga e ‵tau o sasale atu i ei. E penā foki te Tusi Tapu, e maua i ei a te poto aoga telā e mafai o takitaki atu tatou i te taimi ko ‵tau ei o fai se fakaikuga faigata.

E mafai o fakamaina ne se mōli a ‵tou auala ke mafai o lavea ‵mao atu a mea i ‵tou mua. I se auala tai ‵pau, e mafai o fakamaina ne te Tusi Tapu a ‵tou kilokiloga ki te olaga gali i aso mai mua nei.