Ao, a te Tiapolo se tino tonu. A ia ko “te pule o te lalolagi,” se tino faka-te-agaga telā ne fai mo fai se tino masei kae ‵teke ki te Atua. (Ioane 14:30; Efeso 6:11, 12) E fakaasi mai i te Tusi Tapu a uiga o te Tiapolo i igoa mo fakamatalaga konei:

•   Satani, tena uiga “Tino ‵Teke.”—Iopu 1:6.

•   Tiapolo, tena uiga “Tino Gutu Fatufatu.”—Fakaasiga 12:9.

•   Se Gata, telā ne fakaaoga sāle i te Tusi Tapu ki se “Tino Faitogafiti.”—2 Kolinito 11:3.

•   Tino fakaosooso.—Mataio 4:3.

•   Tino loi.—Ioane 8:44.

E sē se lagonaga io me se uiga masei

 E ‵kilo atu a nisi tino ki a Satani te Tiapolo e pelā me se lagonaga io me se uiga masei i loto i a tatou. Kae e fakamau i te Tusi Tapu se sau‵talaga i te va o te Atua mo Satani. A te Atua e ‵lei katoatoa, tela la, e se mafai o faipati atu a ia ki se vaega masei i loto i a ia. (Teutelonome 32:4; Iopu 2:1-6) E penā foki loa, ne fakaosooso ne Satani a Iesu, telā e seai sena agasala. (Mataio 4:8-10; 1 Ioane 3:5) Tela la, e fakaasi mai i te Tusi Tapu me i te Tiapolo se tino tonu kae e sē se mea masei fua.

 E mata, e ‵tau o ‵poi tatou me e tokouke a tino e se tali‵tonu i te Tiapolo se tino tonu? Ikai, me e fai mai te Tusi Tapu i a Satani e fakaaoga ne ia a amioga faitogafiti ke fakataunu ei ana fakamoemoega. (2 Tesalonia 2:9, 10) E tasi o ana togafiti magoi, ko te fakapouli ne ia a mata o tino e tokouke ke mo a ma iloa ne latou i a ia se tino tonu.—2 Kolinito 4:4.

 Manatu tonu: A te pati Epelu i nisi Tusi Tapu telā ne ‵fuli ki te “Lusifelo” e fakauiga ki “te mainaga.” (Isaia 14:12) E fakaasi mai i te mataupu kātoa me e fakasino atu te tugapati tenei ki te fakasologa o tupu o Papelonia, kolā ne fakamasiasi ne te Atua ona ko olotou uiga fakamaua‵luga. (Isaia 14:4, 13-20) A te tugapati “te mainaga” ne fakaaoga ke fakatauemu atu ki tupu o Papelonia mai tua o te lotou fakatakavalega.

 Manatu tonu: A te Tiapolo ko te fili o te Atua, kae e se ko tena tavini. E ‵teke kae fakamasei ne Satani te Tiapolo a tino kolā e tavini atu ki te Atua.​—1 Petelu 5:8; Fakaasiga 12:10.