Ndise ŵakukondwa kumumanyiskani kuti Yehova wakaŵatumbika ŵanthu ŵake ku Ukraine mwakuti ŵabali na ŵadumbu ŵithu mu charu chose ichi ŵakafiska kuchita Chikumbusko cha nyifwa ya Khristu. Nangauli mu Nyumba za Ufumu zinandi izo zili ku manjiliro gha dazi kwa Ukraine mukukhala ŵabali na ŵadumbu awo ŵali kusama mu nyumba zawo, kweni ndimoso mukachitikira Chikumbusko ndipo ŵabali aŵa ŵakasangikapo. Kweni ŵabali ŵanandi ŵakachita Chikumbusko mu tumagulu, ndipo awo ŵakatondeka kuŵapo maso na maso ŵakachita kujoyina kwizira pa videoconference.

Mu vigaŵa vinandi vya charu ichi, ma alamu ghakuchenjezga kuti kukwiza mabomba ghakalira muhanya wose pa zuŵa la Chikumbusko. Kweni apo zuŵa likaŵa pafupi kunjira, ma alamu ghakaleka kulira. Sherhiy wa ku Druzhkivka, ku Chigaŵa cha Donetsk wakati: “Tikalombanga kuti Chikumbusko chizakaleke kutimbanizgika chifukwa cha kuphulika kwa mabomba. Kanyengo kachoko waka pambere Chikumbusko chindambe, mabomba ghakaleka kuphulika ndipo ma alamu nagho ghakaleka kulira.”

Kagulu ka ŵapharazgi awo ŵakaŵa ŵachekuru kweniso ŵalwari ku Nemishaeve, kufupi na Kyiv, kakatondekanga kuchita maungano pafupifupi kujumpha mwezi umoza. Ntheura ŵakalombanga kuti ŵazakachiteko Chikumbusko. Vitaliy, uyo ni mubali mulara, wakaŵawovwira ŵapharazgi aŵa kuti ŵachite Chikumbusko. Iyo wakuti: “Kukaŵavya magesi, ntheura tikachita kugwiliskira ntchito tochi pakupanga Chikumbusko. Kukaŵavya vyakovwira kuti kuthukirenge. Tikaŵavya sumu, ntheura mwana wane wakachita kulizga gitara kuti tileke kusuzgika kwimba sumu.”

Oleksandr, uyo ni mubali mulara ndipo wakukhala ku chigaŵa icho nkhondo yasuzga, wakati: “Pa nyengo yakuchemera ŵanthu ku Chikumbusko, tikatondeka kuti tiŵalembere makalata ŵanthu ŵa mu chigaŵa chithu cha kupharazgako chifukwa nyumba zinandi zikaphuliskika na mabomba ndipo zinyake ŵanthu ŵakasamukamo. Ntheura tikachemerako waka awo tikumanyana nawo, awo tikabisamira lumoza mu tuvipinda twapasi, na awo tikachimbilira lumoza kuya uko vinthu viliko makora. Ŵanandi awo tikasangananga nawo ŵakaŵa kuti ŵandakumanepo na Ŵakaboni ŵa Yehova. Ŵanthu ŵanandi ŵakasangikapo pa Chikumbusko.”

Nangauli tindapokere lipoti lose lakufuma mu mipingo yose ya ku Ukraine, kweni pasono tikumanya kuti ŵanthu ŵakujumpha 210,000 ŵakasangikapo pa Chikumbusko.

Pakuyowoyapo umo wakujipulikira chifukwa cha Chikumbusko, mubali munyake wa ku Ukraine wakati: “Nga umo kachigongwe ako kali na gesi kakovwilira awo ŵakwenda pa nyanja kumanya kuti ŵali pafupi na mtunda, Chikumbusko cha nyifwa ya Yesu nacho chikunovwira kumanya kuti zuŵa la Yehova lili pafupi chomene. Chikumbusko cha chaka chino chanovwira chomene kusimikizga fundo iyi.”

Kufika pa April 21, 2022, tili kupokera chiŵelengero icho chili pasi apa kufuma ku Ukraine. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero chenecho chikwenera kuŵa chakukwera, chifukwa pasono ntchakusuzga chomene kuyowoyeskana mu vigaŵa vyose vya charu ichi.

• Ŵapharazgi 35 ŵali kufwa

• Ŵapharazgi 60 ŵali kupwetekeka

• Ŵapharazgi 43,792 ŵali kuchimbira mu nyumba zawo na kuluta ku vigaŵa ivyo vinthu vili makorako mu charu chenechichi

• Nyumba 374 zili kusakazikirathu

• Nyumba 347 zili kunangika chomene

• Nyumba 874 zili kunangika pachoko waka

• Nyumba ya Ufumu yimoza yili kusakazikirathu

• Nyumba za Ufumu 10 zili kunangika chomene

• Nyumba za Ufumu 27 zili kunangika pachoko waka

• Makomiti Ghakovwira Para Kwachitika Soka 27 ghali kwimikika ku Ukraine

• Ŵapharazgi 44,971 ŵakawovwirika na Makomiti Ghakovwira Para Kwachitika Soka kuti ŵasange pakukhala mu vigaŵa ivyo vinthu viliko makora

• Ŵapharazgi 19,961 awo ŵali kuchimbilira ku vyaru vinyake ŵakovwirika na Ŵakaboni ŵanyawo