Pa 9 October, 2024, Mubali Arsen Avanesov wali kufumiskika mu jele ku Russia. Pakwamba ŵakamusanga na mulandu ndipo pa 29 July, 2021 ŵakadumura kuti wakakhare ku jele vyaka 6 na hafu. Wati wachita apilu mulandu wake, mweruzgi mbwenu wakasazgirako chilango kuti wakakhale mu jele vyaka 7. Pakuti wakakhala kale mu jele vyaka viŵiri pambere ŵanderuzge mulandu wake, pasono ndikuti wali kumalizga kugwira chilango icho khoti likadumura.

Mubali Vilen Avanesov, awo mbadada wake ŵa Arsen, nawo ŵakaŵajulira mulandu wakuyana waka ndipo khoti likadumura kuti ŵakagwire jele vyaka 6. Ŵakafumiskika pa 9 February, 2024.

Arsen wakafiska kukhala mu jele chifukwa wakakhumbanga kuŵa wakugomezgeka kwa Yehova. Mu mazgu ghake ghaumaliro pambere ŵandadumure mulandu wake, wakayowoya kuti: “Nkhamulayizga Yehova kuti niŵenge wakugomezgeka kwa iyo. Nkhapeleka umoyo wane kwa iyo ndipo nkhachita nthena na mtima wose. Mulimose umo vingaŵira ningaswa yayi phangano ilo nkhachita na Yehova.” Mubali Arsen wakayowoyaso kuti wali na chipulikano chankhongono mwa Chiuta mwakuti wangasunkhunyika yayi. Iyo wakati: “Chipulikano chane chindachepepo, kweni chaŵa chankhongono chomene.”

Ndise ŵakukondwa kuti pasono Arsen wali pamoza na mbumba yake, kweni tilutilirenge kulombera ŵabali na ŵadumbu ŵithu awo ŵachali mujele. Ntchakukondweska kuwona kuti nangauli tikuŵa na “chitima chifukwa cha viyezgo vyakupambanapambana,” kweni tikusanga vitumbiko vinandi chifukwa cha chipulikano kweniso kuzizipizga.—1 Petrosi 1:6, 7.