Mubali Giandomenico Gullà, uyo wakugwira ntchito pa chipatala chinyake ku Erba, kufupi na Como, ku Italy, wakhwaskika chomene na muliri uwu wa COVID-19. Ndipouli, chipulikano icho mubali uyu wali nacho chikumovwira kuti waŵe na mtende wa mu mtima kweniso kuti wakhozgenge ŵanyake. (2 Ŵakorinte 1:4) Ukaboni wa fundo iyi uli mu ivyo mubali uyu wakayowoya mwasonosono apo wakachezganga na Dipatimenti Yakuwona vya Nkhani ya ofesi ya munthavi ya Italy.

Ivi ni vinyake ivyo Mubali Gullà wakayowoya apo wakachezganga na dipatimenti iyi. Mazgu ghanyake taghasintha pachoko kuti fundo zake zipulikikwe makora.

Kasi vinthu vili wuli kwa imwe apo tili mu nyengo ya muliri iyi?

Giandomenico Gullà: Pa chipatala icho nkhugwira ntchito, vinthu vikasintha mwamabuchi chomene nga umo vikuŵira na chimphepo cha tsunami. Vinthu vinandi pa chipatala ichi ŵavisintha kuti paŵe madipatimenti ghanyake agho ghakovwira ŵanthu ŵekha awo ŵasangika na matenda gha COVID-19. So mu nyengo ya muliri iyi, ŵanthu awo ŵakulwara ndipo ŵaŵagoneka mu chipatala, ŵakuwonana maso na maso yayi na ŵamumbumba yawo, ŵachibali panji ŵabwezi ŵawo. Ntheura ine ndine nkhuchita kuŵayimbiranga foni ŵamumbumba zawo kuti niŵaphalire umo mulwari waliri. Zuŵa linyake, pakati pa usiku, nkhayimbira foni mwana wa mama munyake kumuphalira kuti amama ŵake ŵakhala pasingo pera. Nkhagwiliskira ntchito foni yane kuti nimuyimbire. Ivi vikawovwira kuti mwana uyu wawonane kaumaliro na amama ŵake nangauli ŵakaŵa kuti ŵakhala pa singo pera. Yikaŵa nyengo ya chitima chomene.

Kasi ivyo muli kusambira mu Baibolo vikumukhozgani wuli?

GG: Nkhuwona ŵanyane ku ntchito ŵakusuzgika chomene maghanoghano ndipo ŵakumanya yayi kuti ntchivichi chikuchitika. Kweni kwa ine nkhuwona kuti sambiro la namwene likunovwira kuti nilutilire kuŵa na mtende wa mu mtima. Sono nkhupulikiska kuti Yehova wali kutinozgekereska kale umo tingachitira mu nyengo zakusuzga nga ni izi. Pakuti nkhumanya kuti muliri uwu ukufiska uchimi unyake wa mu Baibolo, vikunovwira kuti niwonenge vinthu mu nthowa yakwenelera. Chipulikano chane chakhozgeka chomene.

Pakuti imwe mukupembuzgika na Yehova, kasi mukuchita vichi kuti namwe mupembuzge ŵanji?

GG: Mzimu utuŵa wa Chiuta ukunipa nkhongono kweniso ukutovwira tose pamoza na mbumba yane, nanga kungaŵa ku ntchito. Ivi vikunovwira kuti nane novwireso ŵabali awo ŵakusangana na masuzgo chifukwa cha muliri.

Kasi Yehova wakumovwirani wuli kuti mukhozge mbumba yinu?

GG: Nangauli nkhugwira ntchito maora ghanandi ku chipatala, kweni nkhuyezgayezga kuti nilutilire kuchita vinthu vyauzimu lumoza na mbumba yane. Nkhuwona kuti para nkhuchita nthena, muwoli wane wakukhozgeka chomene. Vikutovwira kuti tilutilire kukolerana. Kusopa kwa pa mbumba nako kukunovwira kuti nikhozge mwana withu msungwana, Ginevra, uyo wali na vyaka vitatu. Nayo wakumanya kuti vinthu vili makora yayi ndipo wakutemwa kuyowoya kuti: ‘Nkhukhumba yayi kuti Adada ŵalute ku ntchito chifukwa kuli coronavirus,’ panji ‘Nkhopa kuti Adada ŵangaleka kukaweraso.’ Kuti timukhozge, tikuŵikapo waka sumu za mu broadcasting, pakutora na nyengo wuwo yayi kuti wambeso kumwemwetera.

Pelekani chiyelezgero cha umo mukakhozgera munyinu munyake ku ntchito.

GG: Munyane uyo tikugwira dipatimenti yimoza, wakamba kusambira Baibolo mwasonosono apa. Nkhakumana nayo vyaka vichoko waka ivyo vyajumpha ku chipatala icho nkhagwiranga ntchito, ndipo tikadumbiskanapo fundo za mu Baibolo. Wakamba kusambira Baibolo pambere muliri uwu undayambe ndipo wakawona kuti wakwenera kulutizga kusambira. Pasono, nyengo zinyake tikusambiranga kaŵiri pa sabata kwizira pa pulogiramu yinyake ya pa kompyuta. Nkhakondwa chomene apo wakaniphalira kuti: “Ivyo nkhusambira mu Baibolo vikunovwira kuti niŵe na umoyo uwemi. Sono nili na mtende wa mu mtima. Nkhusanga mazgoro gha mafumbo ghanandi ghakukhwaskana na chifukwa icho tikalengekera kweniso chifukwa icho vinthu viliri nthena pasono. Chipulikano chane chikukhora ndipo vikunovwira kuti niŵe na chigomezgo chiwemi cha munthazi.”

Kasi mukukhozga wuli ŵabali na ŵadumbu mu mpingo?

GG: Chachitima ntchakuti, mudumbu munyake mu mpingo withu [Mudumbu Daniela Sgreva] wakasangika na matenda agha gha COVID-19 ndipo wakeneranga kwiza kuno ku chipatala. Nkhayimbira foni ŵabali ŵaŵiri awo ŵali na ambulance ndipo tikapanga ndondomeko yakuti ŵamunyamure mudumbu uyu kwiza nayo ku chipatala. Ŵabali aŵa ŵakenda mtunda wa makilomita ghakujumpha 50 kuti ŵakamutore mudumbu uyu. Mudumbu uyu wakakondwa chomene wakati waŵawona ŵabali aŵa. Wakati wafika ku chipatala, mudumbu uyu wakakhozgeka chomene apo tikakumana nayo mu chipinda icho ŵakamugoneka kuti timuwone. Nkhamupokelera, ndipo pakuti ŵabali ŵaŵiri awo ŵakiza nayo, nawoso mba vyachipatala, mudumbu uyu wakaŵa pakati pa ŵabali awo ŵakalongora pakweru kuti ŵakumufipira mtima. Mudumbu uyu wakakhozgeka chomene na wovwiri kweniso chitemwa icho ŵabali ŵakamulongora. Pakuwonga iyo wakati: “Nkhumanya kuti Yehova wakutipulikiska, kweni apa wanichitira vikuru kuluska ivyo ine nakhazganga!”

Zuŵa lililose, nkhugomezga chomene Yehova kuti wanipe nkhongono zake. Para nkhwendeska galimoto yane pa kuluta na kuwera ku ntchito, nkhutegherezganga sumu za mu JW Broadcasting, izo zikunovwira kuti niŵe na nkhongono izo nkhukhumbikwa zuŵa ilo. Nkhuwonga chomene Yehova chifukwa cha wovwiri uwo wakunipa, ndipo para nkhutegherezga sumu ya mutu wakuti Yehova Wakutovwira Nyengo Zose, nane nkhuwerezgapo mazgu ghakuti: ‘Yehova wakunovwira. Nkhugomezga; wanovwirenge; nane nijipate.’