Pa January 27, 2021, Mphara ya Malango ya Baden-Württemberg, Germany, yikayowoya chomene vya Ŵakaboni ŵa Yehova apo yikakumbukiranga ŵanthu awo ŵakatambuzgika mu nyengo ya muwuso wa Nazi pa nyengo ya Nkhondo Yachiŵiri ya pa Charu Chose. Chifukwa cha muliri wa COVID-19, chakuchitika ichi chikachitika kwizira pa intaneti. Ŵanthu ŵakujumpha 37,000 kufuma ku Austria, Germany, Netherlands, na Switzerland ŵakawonelera chakuchitika ichi. Pamanyuma pulogiramu yakujamburika kale ya chakuchitika ichi yikawonelerekaso maulendo ghakujumpha 78,000.

Muhterem Aras, uyo ni pulezidenti wa Mphara ya Malango ya Baden-Württemberg, wakazomerezga fundo yakuti “mbiri ya umo Ŵakaboni ŵa Yehova ŵakatambuzgikiranga yili kulembeka makora chomene, . . . kweni mbanthu ŵachoko waka awo ŵakuyimanya.” Iyo wakalutizga kulongosora kuti Ŵakaboni awo ŵakaŵako mu nyengo yakusuzga iyi, “ntchiyelezgero chiwemi kwa ise mazuŵa ghano cha umo tingachitira kuti tileke kuŵa na thinkho, sankho na kugega kwambiska viwawa.”

Pulezidenti wa Mphara ya Malango, Aras, wakalongosora nkhani ya Anna Denz, uyo ni Kaboni wakufuma ku Lörrach, Baden-Württemberg. Ŵapapi ŵake ŵakafwira ku misasa yakusuzgirako ŵanthu. Apo Anna wakaŵa ku sukulu wakakana kuyowoya mazgu ghakuti “Ntchindi kwa Hitler.” Kufuma apo wakachimbilira ku Switzerland mwakovwirika na Ŵakaboni ŵanyake. Paumaliro, Anna wakasamukira ku United States pamoza na mfumu wake. Pulezidenti wa Mphara ya Malango Aras wakati: “Anna Denz wakaŵa na chikanga ndipo wakathera yayi. Iyo wakaleka kuthera chifukwa cha chipulikano chake.”

Wakusanda mbiri yakale, Dr. Hans Hesse wakalongosora umo Ŵakaboni ŵa Yehova ŵakakanizgikira kuchita milimo yawo mu Germany mu 1933, pati pajumpha waka myezi yiŵiri kufuma apo chipani cha Nazi chikambira kuwusa. Dr. Hesse wakalongosolera awo ŵakawoneleranga kuti ŵabali ŵithu “ŵakalongora kuti ŵakathera yayi mwa kulutilira kugaŵira mathirakiti panji kulutilira kuchita ntchito ya kupharazga.”

Wakusanda mbiri yakale uyu wakalongosora nkhani ya Mubali Gustaf Stange. Apo Mubali Stange ŵakamutolera ku khoti chifukwa wakakana kunjira usilikari chifukwa cha njuŵi yake, awo ŵakwimira boma pa milandu ŵakamufumba kuti: “Ntchivichi chingachitika usange waliyose wangachita nga ndiwe?” Mubali withu wakazgora kuti: “Mbwenu nkhondo yimarenge nyengo yeneyiyo.”

Mu pulogiramu iyi mukaŵaso na sumu yakufuma mu buku lithu yakuti “Koleskani imwe Ŵakaboni!” Mubali Wolfram Slupina, uyo wakulaŵilira ntchito ya Dipatimenti yakuwona vya Nkhani ku ofesi ya munthavi ya Central Europe, wakalongosora kuti Mubali Erich Frost, uyo wakaŵa wakwimba, ndiyo wakalemba mazgu gha mu sumu iyi apo wakaŵa mu msasa wakusuzgirako ŵanthu wakuchemeka Sachsenhausen mu 1942. Vyaka vinandi ivyo vyajumpha apo ŵakachezga nayo Mubali Frost, wakalongosora kuti chilato cha sumu iyi chikaŵa kukhozga ŵakayidi ŵanyake, chifukwa pa nyengo iyo “ŵakatambuzgikanga chomene ndipo chikaŵa chakusuzga kuzizipizga.”

Mara na Finn Kemper, ŵa vyaka 13 na 15, awo nawo Mbakaboni ŵa Yehova, ŵakachezga na Mudumbu Simone Arnold Liebster, uyo wakapona mu nyengo ya muwuso wa chipani cha Nazi. Mudumbu Liebster wakasuskikanga chomene apo wakaŵa mwana kweni wakazizipizga. Chifukwa chakuti wakakana kujoyina chipani cha Nazi, ŵamazaza ŵa chipani ichi ŵakamutuma ku sukulu ya ŵana awo ŵapalamura milandu. Iyo wakalongosora kuti “wakakondwa chomene” pakumanya kuti walutilira kuŵa wakugomezgeka kwa Chiuta nangauli wakatambuzgikanga.

Ndise ŵakukondwa kuti chakuchitika ichi chikapangiska kuti ŵanthu ŵanandi ŵasambire vya Yehova, uyo nyengo zose wakutovwira para tikutambuzgika mu nthowa yiliyose.—Ŵahebere 13:6.