Pa March 5, 2023, Mubali David Splane, uyo ngwa mu Wupu Wakulongozga, wakafumiska Baibolo la Malemba Ghakupatulika mu Mang’anamuliro gha Charu Chiphya Mateyu-Chivumbuzi mu chiyowoyero cha mawoko cha ku South Africa, icho chikumanyikwa kuti South African Sign Language. Kweniso wakafumiska buku la Mateyu mu chiyowoyero cha Chindonga. Mubali Splane wakafumiska Mabaibolo agha pa pulogiramu yapadera iyo yikachitikira ku ofesi ya munthavi ya South Africa. Mipingo yinandi yikajoyina ku pulogiramu iyi. Ŵanthu wose awo ŵakawungana ŵakajumpha 130,000. Ndipo nyengo yeneyiyo likati lafuma waka, Mabaibolo agha ghakamba kusangika pa intaneti mwakuti ŵanthu ŵachite dawunilodi.

Baibolo la chiyowoyero cha mawoko cha ku South Africa likamba kung’anamurika mu 2007 pa ofesi ya munthavi iyo yili ku Johannesburg, South Africa. Mu 2022, timu ya ŵakung’anamura mabuku yikasamira ku ofesi yakung’anamulirako mabuku ku Durban. Pakuyowoyapo vya Baibolo ili lati lafumiskika mu chiyowoyero cha mawoko cha ku South Africa, Mubali Ayanda Mdabe, uyo ngwakumangwa kweniso ni mulara, wakayowoya kuti: “Pasono kuluska kumanyuma kose, ŵakumangwa ŵapulikiskenge makora chomene unenesko wa Mazgu gha Chiuta kweniso kuti ngankhongono. Kuŵa na Baibolo ili la Chiyowoyero cha mawoko cha ku South Africa kwanovwira chomene kupulikiska mikhaliro iyo Yesu wakaŵa nayo kweniso fundo za mu Baibolo. Ntheura lanovwira kuwumba kaghanaghaniro kane na kuŵa kaphya.”

Chindonga chikuyowoyeka chomene ku Namibia, ndipo ofesi yakung’anamulirako mabuku mu Chindonga ili ku Ondangwa. a Munyake uyo wakang’anamurako wakayowoya kuti: “Kufumiskika kwa Baibolo ili kwanikumbuska fundo yakuti Yehova wakutemwa ŵanthu ndipo wakukhumba kuti wose ŵafike pakumumanya makora.”

Tikukondwa nawo lumoza ŵabali kweniso ŵadumbu ŵithu awo ŵapindulenge na Mabaibolo ghaphya agha. Mabaibolo ghakung’anamulika makora agha ghaŵawovwirenge kuti ŵalutilire kuwona kuti malango gha Yehova ngakuzirwa.—Zintharika 2:1.