Pa September 7, 2022, Khoti Lakuwona vya Wanangwa wa Ŵanthu ku Europe likadumura kaumaliro milandu yikuruyikuru yiŵiri yakuzirwa yakukhwaskana na Ŵakaboni ŵa Yehova. Pa June 7, 2022, khoti ili likadumura kuti chikaŵa chakwenelera yayi kuti boma la Russia likanizge milimo ya Ŵakaboni ŵa Yehova mu 2017. Pa zuŵa leneliri, khoti ili likasanga kuti boma la Lithuania likaswa dango la wupu wa European Convention on Human Rights apo likamupa mulandu Mubali Stanislav Teliatnikov pakuti wakakana kunjira usilikari chifukwa cha njuŵi yake.

Boma la Russia na la Lithuania likachita yayi apilu pa vigamuro ivyo khoti ili likapeleka pa June 7. Pa chifukwa ichi, khoti la ku Europe ili likaphalira vyaru viŵiri ivi kuti vichite vinthu mwakulondezga fundo izo khoti lili kudumura pa nkhani iyi, kweniso vyaru ivi vikwenera kuŵalipira ŵanthu awo ŵakakhwaskika.

Pa June 11, 2022, boma la Russia likasankha kuleka kuŵaso pasi pa khoti ili kuti ligwenthe kupulikira ivyo likaphalirika kuchita. Kweni khoti la ku Europe ili lili na wanangwa wa kudumura milandu iyo charu ichi chikapalamura pa kuswa fundo za mu wupu wa European Convention on Human Rights pambere pandafike pa September 16, 2022.

Tikulomba kuti mphanyi ivyo khoti la ku Europe ili ladumura kaumaliro pa nkhani ya kuŵa na wanangwa wa kusopa vyalondezgeka, mwakuti awo ŵakutemwa mtende ‘ŵakhalenge umoyo wa bata na wakufwasa kweniso kuti ŵasopenge Chiuta mwakukwana na kuŵikapo mtima.’—1 Timote 2:1, 2.