Pa April 3, 2021, Baibolo la Malemba Ghakupatulika mu Mang’anamuliro gha Charu Chiphya likafumiskika lakupulinta kweniso la pa Intaneti mu chiyowoyero cha ku Cambodia. Pulogiramu ya kufumiska Baibolo ili yikajambulikirathu ndipo ŵapharazgi mu mipingo na magulu ku Cambodia ŵakachita kuwonelera. Mubali Kenji Chichii, uyo ngwa mu Komiti ya Munthavi ya Japan, a ndiyo wakadumba nkhani ya kufumiska Baibolo ili.

Chiyowoyero cha ku Cambodia chikuyowoyeka na ŵanthu pafupifupi 16 miliyoni. Ŵapharazgi ŵakujumpha 1,100 ŵakuteŵetera ku chigaŵa icho ŵakuyowoya chiyowoyero ichi.

Mubali Masahiro Harada, uyo ngwa mu Komiti ya Munthavi ya Japan wakati: “Tikugomezga kuti Baibolo ili liwovwirenge ŵaŵazgi kuti ŵakawone makhaliro ghakukondweska gha Chiuta, nga ntchitemwa, chiwuravi na lusungu. Tikukayika yayi kuti ŵanthu ŵa mitima yiwemi ŵaguzikirenge kwa Yehova chifukwa cha Baibolo lakung’anamurika makora ili na kupeleka malumbo kwa iyo.”

Ŵanthu 6 ndiwo ŵakachita mulimo wa kung’anamura Baibolo ili, ndipo ŵakagwira kwa vyaka vinayi kuti ŵamalizge. Yumoza uyo wakang’anamurako wakati: “Mu Baibolo ili mulije mazgu ghanonono panji ghakale chomene. Likunifika pa mtima mwaluŵiro chomene. Nane nkhujipulika nga ngwamasalimo uyo wakalemba mazgu gha pa Salimo 139:17, agho ghakuti: ‘Ntheura, maghanoghano ghinu ngakuzirwa nadi kwa ine!’”

Munyakeso uyo wakang’anamurako wakati: “Nkhugomezga kuti para ŵabali na ŵadumbu ŵakaŵerenga Baibolo liphya ili, vyamuŵawovwira kuti ŵasendelere pafupi chomene na Yehova. Lamuŵawovwira kuti ŵakajipulikenge kuti ŵali pafupi na Yehova usange ŵachita phukwa. Para ŵasangana na masuzgo ŵamujipulikanga ŵakuvikilirika. Ŵamuŵa na mtende wa mu mtima para ŵamba kwenjerwa. Para ŵakumana na viyezgo, ŵamukhozgeka nalo chomene.”

Tikugomezga kuti Baibolo ili liwovwirenge kuti ŵanthu ŵanandi ŵamumanye Mlengi wawo Mukuru, Yehova, na kumupa ntchindi na malumbo ivyo vikumwenelera.—Chivumbuzi 4:11.