Ŵanthu 49,040 ku Belgium ŵakachitako Chikumbusko cha nyifwa ya Khristu mu chaka cha 2021. Chikumbusko cha nyifwa ya Khristu ni ungano wapadera chomene uwo Ŵakaboni ŵa Yehova ŵakuchita pa chaka kamoza. Aka nkhakwamba ku Belgium kuti ŵanthu ŵanandi nthena ŵachiteko Chikumbusko kufuma waka mu 1995. Chiŵelengero ichi chikujumpha kaŵiri chiŵelengero cha Ŵakaboni ŵa Yehova ŵa mu charu ichi.

Ichi ntchapadera chomene chifukwa ku Belgium ŵanthu ŵanandi ŵakusopa yayi. Mwachiyelezgero mu 1970, ŵanthu 90 pa ŵanthu 100 ku Belgium ŵakatenge Mbakhristu ndipo ŵanthu 6 pa ŵanthu 100, ŵakatenge ŵali mu chisopa chilichose yayi. Ndipouli, malipoti ghasonosono ghakulongora kuti chiŵelengero cha ŵanthu awo ŵakuti Mbakhristu chakhira kujumpha pa 60 peresenti. Awo ŵakuti ŵali mu chisopa chilichose yayi chiŵelengero chawo chakwera chomene kujumpha pa 40 peresenti.

Mu vyaka vyasonosono apa, mawayilesi, ma TV na manyuzipepara gha ku Belgium ghalembanga malipoti ghautesi ghakukhwaskana na Ŵakaboni ŵa Yehova. Nangauli vinthu vili nthena kweni ŵanthu ŵanandi mu charu ichi ŵakupenja ŵekha unenesko wakukhwaskana na Ŵakaboni ŵa Yehova. Ŵanthu ŵakunweka aŵa ŵakujiwonera ŵekha umo Ŵakaboni ŵa Yehova ŵakutemwerana ndipo ŵakujiwoneraso ŵekha umo umoyo wawo ukusinthira para ŵamba kulondezga fundo izo ŵakusambira mu Baibolo.—Yohane 13:35.

Mu February 2021, ofesi ya Ŵakaboni ŵa Yehova ku Belgium yikapeleka lipoti lakuti ŵanthu 11,804 ŵakusambira Baibolo. Pa avereji chiŵelengero ichi chikujumpha pafupifupi na 1,000 pakuyaniska na chiŵelengero cha mu chaka cha uteŵeti icho chajumpha. Mu vyaka 5 ivyo vyajumpha pa avereji ŵanthu 450 ŵakubatizika na kuŵa Ŵakaboni ŵa Yehova.

Malipoti ghakukondweska gha ku Belgium agha, ngamoza mwa malipoti ghachoko waka agho ghakulongora umo Ŵakaboni ŵa Yehova pa charu chose ŵakufiskira uchimi wa mu Baibolo uwo ukuti: “Muchoko chomene wazamuŵa chikwi, ndipo muchoko wazamuzgoka mtundu wankhongono.”—Yesaya 60:22.