•   “Charu cha China chapeleka lipoti lakuti chaka chino kwawotcha chomene ndipo nkhachitatu kuti kuŵe chilangalanga chikuru nthena.”—The Guardian, September 7, 2022.

•   “Mu vyaka vyakulondezgana waka 5, vigaŵa vinyake vya ku Africa vyasangana na suzgo likuru la chilangalanga.”—UN News, August 26, 2022.

•   “Vikuwoneka kuti mu vigaŵa vyakujumpha hafu vya ku Europe muchitikenge chilangalanga chakofya chomene kuluska ivyo vikaŵako vyaka 500 kumanyuma uku.”—BBC News, August 23, 2022.

 Ŵakuwona vya nyengo ŵanandi ŵakuti suzgo la chilangalanga ili lilutilirenge ndipo panji nyengo zinyake lingafika paheni chomene. Kasi pali chigomezgo chilichose chakuti vinthu vizamuŵa makora kunthazi uku? Kasi Baibolo likutipo wuli?

 Baibolo likayowoyerathu kuti mu mazuŵa ghithu ghano:

•   “Kuzamuŵa . . . njara . . . mu malo na malo.”—Luka 21:11.

 Kanandi chilangalanga chikwambiska njara. Ŵanthu ŵakutambura panji kufwa chifukwa cha njara, ndipo vyose ivi vikufiska waka uchimi wa mu Baibolo.—Chivumbuzi 6:6, 8.

 Baibolo likutiphalira chifukwa chikuru icho suzgo ili likuyira munthazi. Likuti:

•   “Munthu uyo wakwenda wangalongozga yayi mendero ghake.”—Yeremiya 10:23.

 Fundo iyi yikung’anamura kuti ŵanthu ‘ŵangalongozga yayi mendero ghawo,’ panji titi ŵangafiska yayi kujilongozga ŵekha. Chifukwa chakuti ŵakusankha uheni vyakuchita, vikwambiska masuzgo nga ntchilangalanga na kusoŵa kwa maji.

•   Ŵasayansi ŵanandi ŵakuzomerezga kuti ŵanthu ndiwo ŵapangiska kuti charu chiwotchenge chomene, ivyo vikwambiska suzgo la chilangalanga pa charu chose.

•   Uryezi na malango agho ŵakuŵika kwambura kughanaghanira vya panthazi, vikupangiska kuti makuni ghamare, charu chinangike, chilengiwa chisakazike, kweniso paumaliro maji ghakukamuka umo ghakasangikanga.

 Ndipouli, Baibolo likutipa chigomezgo.

 Baibolo likulayizga kuti Chiuta wazamumazga suzgo la kusoŵa kwa maji. Mwawuli?

1.  1. Chiuta ‘wazamuparanya awo ŵakunanga charu chapasi.’ (Chivumbuzi 11:18) Iyo wazamuwuskapo chinthu chimoza icho chikwambiska suzgo la kusoŵa kwa maji—ŵanthu ŵaheni, na ŵaryezi awo vyakuchita vyawo vikunanga chilengiwa.—2 Timote 3:1, 2.

2.  2. “Charu chambura maji chizamuŵa visapa vya maji.” (Yesaya 35:1, 6, 7) Chiuta wazamunozga vinthu vyose ivyo vyanangika chifukwa cha chilangalanga na kuzgora charu chapasi kuŵa paradiso ndipo maji ghazamuŵaso ghakusoŵa yayi.

3.  3. “Mukupwelelera charu chapasi, mwachipa vipasi vyakuzara na usambazi unandi.” (Salimo 65:9) Chiuta wazamuchitumbika charu chapasi ndipo tizamuŵa na chakurya chinandi kweniso maji ghawemi.