KASI CHARU ICHI CHIPONENGE?
Nyanja Zikuru
MU NYANJA ZIKURU ndimo mukufuma chakurya chinandi icho tikurya, kweniso vinthu vinandi ivyo ŵakupangira munkhwala. Kujumpha hafu ya mphepo izo tikuthuta pa charu chose chapasi, zikupangika mu nyanja zikuru. Kweniso zikonkha vimphepo viheni ivyo vikufuma ku vinthu ivyo ŵanthu ŵakupanga mu charu. Nyanja zikuru ndizo zikovwiraso kuti nyengo yileke kusinthasintha pa charu chapasi.
Nyanja Zikuru Zili Pangozi
Kusintha kwanyengo kwapangiska kuti vyakumera vya mu maji, somba kweniso vyamoyo vinandi vya mu maji vifwe. Ŵasayansi ŵakusachizga kuti vyakumera vyose ivyo vili mu maji ivyo ntchakurya cha vyamoyo vyose ivyo vili mu nyanja zikuru vili pangozi yakuti vingafwa mu vyaka 30 ivyo vikwiza.
Nkhwantha zikusachizga kuti viyuni vinandi ivyo vikusanga chakurya chawo mu nyanja zikuru vikwenera kuti vili kurya mapulasitiki, ndipo mapulasitiki ghakuwoneka kuti ghakukoma vyamoyo vinandi mu nyanja zikuru chaka chilichose.
Mu chaka cha 2022, mulembi mulara wa wupu wa United Nation (UN) António Guterres, wakayowoya kuti “kwa nyengo yitali nyanja zikuru tazinanga chomene, mwakuti lero nyanja zili pangozi yikuru chomene.”
Charu Chikalengeka Kuti Chiŵepo Kwamuyirayira
Nyanja zikuru na vyamoyo vyose ivyo vilimo vili kulengeka kuti vijitozgenge vyekha para ŵanthu ŵandavinange mwakujumphizga. Buku la Regeneration: Ending the Climate Crisis in One Generation likulongosora kuti para ŵanthu ŵandazinange mwakujumphizga, “nyanja zikuru zingajitozga zekha.” Wonani viyelezgero vichoko waka:
-
Mu nyanja zikuru muli twamoyo tunyake tuchokotuchoko (phytoplankton) uto tukonkha na kusunga mphepo ziheni izo ŵasayansi ŵakugomezga kuti zikupangiska kuti pa charu chapasi pawotchenge chomene. Mphepo izo twamoyo utu tukusunga zikuyana waka na mphepo zose izo zikusungika na makuni, utheka na vyakumera vyose ivyo vili pa charu chapasi.
-
Twamoyo tuchokotuchoko (Microbes) uto tukukhala mu nyanja, tukurya minga na viwangwa vya somba izo zafwa, ivyo para vingalekeka waka vingananga maji gha mu nyanja. Pamanyuma twamoyo tuchokotuchoko utu nato tukuryekaso na vyamoyo vinyake vikuruvikuru. Webusayiti yinyake ya Smithsonian Institution Ocean Portal yikati “ndondomeko iyi yikovwira kuti maji gha mu nyanja ghalutilire kuŵa ghawemi na ghakutowa.”
-
Umo somba zinandi zikugayira vyakurya ivyo zarya vikovwira kuchepeska mapoyizoni ghanandi agho ghakunanga vyakumera vya mu maji, nkhonyo za mu maji, na vyamoyo vinyake.
Ivyo Ŵanthu Ŵakuchita
Para tikugwiliskira ntchito tuvikwama na mabotolo gha maji tikuchepeskako unandi wa viswaswa ivyo vikunjira mu nyanja
Nyanja zikuru zingakhumbikwira kutozgeka yayi para vinthu viheni vingaleka kunjira mu nyanja izi. Nkhwantha zikusachizga kuti pakugura vinthu ntchiwemi kugulira mu tuvikwama, mu makonitena panji vinthu vinyake vyakuti tingayegherangamo maulendo ghanandi m’malo mwa kugulira mu mapulasitiki ghakugwiliskira waka ntchito kamoza na kutaya.
Kweni ni vinandi vikukhumbikwa. Mwasonosono apa, mu chaka chimoza pera, wupu unyake wakuwona vya chilengiwa ukayora viswaswa vyakukwana matani 9,200 ivyo ŵanthu ŵakavileka mumphepete mwa nyanja mu vyaru 112. Kweni ivi, ni viswaswa vichoko chomene pakuyaniska na viswaswa vyose ivyo vikunjira mu nyanja zikuru chaka chilichose.
Magazini ya National Geographic yikati “maji gha mu nyanja zikuru ghanangika chomene mwakuti yangaweleraposo yayi kuti ghaŵe ghawemi.” Nangauli vyamoyo ivyo vikukhala mu nyanja vili kupangika kuti vitozgenge nyanja kweni vikukwaniska yayi “chifukwa cha vinthu viheni ivyo vikunjira mu nyanja nga ni vimafuta na vinthu vinyake ivyo ŵanthu ŵakupanga.”
Kasi Baibolo Likutipa Chigomezgo Wuli?
“Charu chapasi ntchakuzura na ivyo muli kupanga. Kuli nyanja, njikuru na yisani, mukwenda vyamoyo vinandi chomene, vichoko na vikuru.”—Salimo 104:24, 25.
Mlengi withu wali kupanga nyanja kuti zijitozgenge zekha. Ghanaghanirani fundo iyi: Usange wakumanya makora nyanja na vyamoyo vyose ivyo vili mu nyanja, kasi wangatondeka kumazga vinthu vyose ivyo vikunanga nyanja zithu? Wonani nkhani ya mutu wakuti, “Chiuta Walayizga Kuti Charu Ichi Chiponenge,” pa peji 15.
