TAŴANTHU TILI KUPANGIKA MWAPADERA CHOMENE—TINGALEMBA, TINGAPENTA, TINGAPANGA CHINTHU, KWENISO TIKUJIFUMBA MAFUMBO GHAKUZIRWA CHOMENE GHAKUKHWASKANA NA UMOYO: Chifukwa wuli kuli charu? Kasi taŵanthu tikaŵako wuli? Kasi chilato cha umoyo ni vichi? Kasi vinthu vizamuŵa wuli kunthazi?

Ŵanyake ŵakukhumba yayi kusanga mazgoro gha mafumbo agha, ŵakughanaghana kuti mazgoro ghake ngakusuzga kughasanga. Ŵanyake ŵakuwona kuti ntchamahara yayi kutangwanika na mafumbo agha chifukwa vyamoyo vikachita kusintha kufuma ku vinyake. Profesa William Provine wakusanda mdauko na vyaumoyo wakalemba kuti: “Kulije Chiuta ndipo umoyo nawo ulije chilato ndipo palije chifukwa chakuŵira na nkharo yiwemi chifukwa umoyo ulije phindu.”

Ndipouli, ŵanthu ŵanyake ŵakuwona nthena yayi. Iwo ŵakuwona kuti vinthu vya mu charu vili kulengeka mwapadera na munthu munyake wamahara, vili mu ndondomeko yiwemi, ni viwemi chomene kweniso vikwendera malango. Vinthu vya mu charu vili kupangika mwapadera chomene ndipo ŵanyake ŵakuyezga kutolerako pakupanga vinthu. Zuŵa lililose, ivyo vikuchitika mu charu vikulongora kuti walipo munyake waluso uyo wali kupanga vinthu ivi.

Awo ŵakugomezga kuti vyamoyo vikachita kusintha kufuma ku vinyake, para ŵakuwona chilengiwa vikuŵapangiska kusandaso ivyo ŵakugomezga. Wonani viyelezgero ivi.

DOKOTALA MUNYAKE ZINA LAKE ALEXEI MARNOV wakati: “Ku sukulu ŵakatisambizganga kuti kulije Chiuta ndipo vyamoyo vikachita kusintha kufuma ku vinyake. Uyo wakagomezganga kuti kuli Chiuta wakawonekanga kuti ngwambura kusambira.” Ndipouli, mu 1990 wakamba kusintha maghanoghano ghake pa nkhani iyi.

Dokotala uyu wakati: “Nkhaŵikapo mtima kuti nimanye makora umo vinthu vinyake vikugwilira ntchito kusazgapo wongo wa munthu. Wongo wa munthu ntchimoza mwa vinthu vyakusuzga kuvipulikiska pa charu chose. Kweni kasi wongo wa munthu uli kupangika waka kuti munthu wamanyenge vinthu, waŵe na maluso paumaliro na kufwa? Nkhawona kuti ivi ni vyakupulikikwa yayi. Ntheura nkhamba kujifumba kuti, ‘Chifukwa wuli tili na umoyo? Kasi umoyo uli na chilato wuli?’ Nkhati naghanaghanirapo mwakukwana, nkhamanya kuti kukwenera kuŵa Chiuta.”

Alexei wakamba kusambira Baibolo pakuti wakakhumbanga kumanya makora chilato cha umoyo. Muwoli wake uyo nayoso wakaŵa dokotala ndiposo wakagomezganga kuti Chiuta kulije, nayo wakamba kusambira Baibolo na chilato chakuti wamususke mfumu wake. Ndipouli, sono wose ŵakugomezga kuti Chiuta waliko ndipo ŵakupulikiska chilato cha umoyo nga umo Malemba ghakuyowoyera.

KASWIRI MUNYAKE ZINA LAKE HUABI YIN, wakasambira za physics. Ndipo mwanakazi uyu kwa vyaka vinandi wakafufuzanga umo zuŵa kuchanya liliri.

Iyo wakati: “Para taŵasayansi tikufufuza umo vinthu vikugwilira ntchito, nyengo zose tikusanga kuti vikuchita vinthu mwandondomeko, icho chikulongora kuti vikulondezga malango ghanyake. Ntheura nkhafumbanga kuti, ‘Kasi malango agha ghakafuma nkhu? Usange moto nanga ungaŵa uchoko waka tikuŵa nawo maso kuti uleke kunanga vinthu, ipo ni njani pera wali kuŵika malango kuti zuŵa lileke kunanga vinthu?’ Pati pajumpha nyengo, nkhasanga kuti zgoro lili pa vesi lakwamba la mu Baibolo ilo likuti: ‘Pakwamba, Chiuta wakalenga kuchanya na charu chapasi.’”—Genizesi 1:1.

Sayansi yawovwira nadi pakusanga mazgoro gha mafumbo ghanyake ghakuzirwa nga ghakuti: Kasi maselo gha wongo ghakugwira wuli ntchito? Kasi zuŵa likupanga wuli chithukivu na ungweru? Kweni Alexei na Huabi ŵakasanga kuti Baibolo lili na mazgoro gha mafumbo nga ghakuti: Chifukwa wuli kuli charu? Chifukwa wuli vinthu vya mu charu vikulondezga malango? Ndipo chifukwa wuli taŵanthu tiliko?

Pakuyowoya za charu chapasi, Baibolo likuti: “[Chiuta] wakachilenga waka yayi, kweni wakachipanga kuti ŵanthu ŵakhalengemo.” (Yesaya 45:18) Nadi, Chiuta wali kupanga charu chapasi na chilato. Nga umo tiwonerenge mu nkhani yakulondezgapo, chifukwa icho Chiuta wakalengera charu chapasi chikukolerana chomene na chigomezgo chithu cha munthazi.